އިންޑިއާއަށް އަންނަ ކުރިއެރުމާއެކު ސަރަހައްދުގެ ޤައުމުތަކަށް ރައްކާތެރިކަމާ އިގްތިސާދީ ކުއެރުން ހޯދައިދިނުމަށް އިންޑިއާގެ ބޮޑުވަޒީރު ނަރެންދްރަ މޯދީ ގެންގުޅުއްވާ 'ސާގަރް' ސިޔާސަތު އިތުރަށް ފުޅާކޮށް، މަހާސާގަރް އިފްތިތާހްކުރައްވައިފިއެވެ.

މޮރިޝަސްއަށް ކުރައްވަމުން ގެންދަވާ ދަތުރުފުޅުގައި މޯދީ ވިދާޅުވީ މީގެ ދިހަ އަހަރުކުރިން ސާގަރް ސިޔާސަތު އިއުލާންކުރެއްވީވެސް މޮރިޝަސްގައި ހުންނަވައިގެން ކަމަށާއި، އެ ސިޔާސަތު މުޅު ދުނިޔޭގެ ދެކުނު ބިތުގެ ގައުމުތަކަށް، ނުވަތަ 'ގްލޯބަލް ސައުތަށް' ފުޅާކުރެއްވުމަށް މަހާސާގަރް ސިޔާސަތު އިއުލާންކުރައްވާކަމަށެވެ. ސާގަރް – ނުވަތަ 'ސެކިއުރިޓީ އެންޑް ގްރޯތު ފޯރ އޯލް އިން ދަ ރީޖަން' އަކީ ޗައިނާގެ ބެލްޓް އެންޑް ރޯޑް އިނީޝިއޭޓިވްއާ ވާދައަށް މޯދީ ފެއްޓެވި އިންޑިއާގެ ސިޔާސަތުކަމަށް މުހައްލިލުން ދެކެއެވެ.

އާ ސިޔާސަތުގެ ދަށުން ވިޔަފާރިއާއި ސަލާމަތީ ދާއިރާއިން ގައުމުތަކާއެކު އިންޑިއާއިން އިތުރަށް ގުޅުން ބަދަހިކުރާނެއެވެ. އަދި ޤައުމުތަކަށް އިންޑިއާއިން ފޯރުކޮށްދޭ ލޯނާއި ހިލޭ އެހީގެ އަދަދު އިތުރުކޮށް، ގައުމުތަކާއެކު ޓެކްނޮލޮޖީ ހިއްސާކުރުން އިތުރުކުރާނެއެވެ.

Advertisement

އިންޑިއާގެ ބޮޑުވަޒީރު ނަރެންދްރަ މޯދީ މޮރިޝަސްއަށް ކުރައްވާ ދެ ދުވަހުގެ ދަތުރުފުޅަކީ މޮރިޝަސްގެ ޤައުމީ ދުވަހުގެ މުނާސަބަތުގައި އެގައުމުގެ ރައީސް ނަވިންޗަންދްރަ ރާމްގޫލަމްގެ ދައުވަތަކަށް ކުރައްވާ ދަތުރުފުޅެކެވެ. މި ދަތުރުފުޅުގައި ދެ ބޭފުޅުން އެކުގައި މަޝްވަރާތަކެއް ބާއްވަވާފައިވާއިރު، ދެޤައުމުގެ މެދުގައި 8 ދާއިރާއަކުން އެއްބަސްވުންތަކުގައި ސޮއިކުރިއެވެ.