ޔުއެފާ ޔޫރޮޕާ ލީގުގެ ރައުންޑް އޮފް 16 ގެ ދެވަނަ ލެގުގައި ބުރާސްފަތި ދުވަހުގެ ރޭ އަމިއްލަ ދަނޑުގައި ރެއާލް ސޮސިއެޑާޑް 4-1 ގެ ނަތީޖާއަކުން ބަލިކޮށް، މުބާރާތުގެ ކުއާޓާ ފައިނަލުން މެންޗެސްޓާ ޔުނައިޓެޑް ޖާގަހޯދައިފިއެވެ.

މިދިޔަ ހަފްތާގައި ސޮސިއެޑާޑް ދަނޑުގައި ކުޅުނު ފުރަތަމަ ލެގު 1-1 ގެ ނަތީޖާއަކުން އެއްވަރުވެފައިވާއިރު، ޔުނައިޓެޑް ކުއާޓާ ފައިނަލުން ޖާގަހޯދީ 5-2 ގެ އެގްރިގޭޓް ނަތީޖާއަކުން ކުރިހޯދައިގެންނެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ރެއާލް ސޮސިއެޑާޑުންނެވެ. ނަމަވެސް ފުރަތަމަ ހާފު ނިމުމުގެ ކުރިން ޔުނައިޓެޑުން ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފައެވެ. 

Advertisement

ދެވަނަ ހާފުގައި ޔުނައިޓެޑުން އެޓީމުގެ އެޓޭކުތައް އިތުރަށް ވަރުގަދަކުރިއިރު، މިހާފުގައި އެޓީމުން ވަނީ އިތުރު ތިން ލަނޑު ކާމިޔާބުކޮށްފައެވެ. އެގޮތުން މިމެޗުގައި އެޓީމުގެ ކެޕްޓަން ބުރޫނޯ ފެނާންޑޭސް ތިން ލަނޑު ކާމިޔާބުކޮށް ހެޓްރިކް ހެދިއިރު އޭގެ ތެރޭގައި އެޓީމަށް ލިބުނު ދެ ޕެނަލްޓީ އިން ކާމިޔާބުކުރި ދެލަނޑު ވެސް ހިމެނެއެވެ. އަދި އެޓީމުގެ އަނެއް ލަނޑު ކާމިޔާބުކޮށްދިނީ ޑިފެންޑަރު ޑިއޯގޯ ޑަލޮޓް އެވެ. 

މީގެ އިތުރުން މިމެޗުގައި ރެއާލް ސޮސިއެޑާޑް އިން ކާމިޔާބުކުރި ހަމައެކަނި ލަނޑު އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ މިކޭލް އޮޔަރްޒަބަލް އެވެ. އަދި ދެވަނަ ހާފުގެ 63 ވަނަ މިނެޓުގައި ޑިފެންޑަރު ޖޯން އަރަމްބުރުއަށް ދެއްކި ރަތް ކާޑާއެކު ސޮސިއެޑާޑުން މެޗުގެ ބާކީބައި ފުރިހަމަކުރީ އެއްކުޅުންތެރިއަކު މަދުކޮށެވެ.

މި ނަތީޖާއާއެކު ޔުނައިޓެޑުން ކުއާޓާ ފައިނަލުގައި ކުޅެންޖެހެނީ ފްރާންސްގެ ލިޔޯން އާއި ދެކޮޅަށެވެ. ލިޔޯނުން ކުއާޓާ ފައިނަލުން ޖާގަހޯދީ 7-1 އެގްރިގޭޓް ނަތީޖާއަކުން ސްޓެއުއާ ބުކަރެސްޓް ބަލިކުރުމަށްފަހު އެވެ.