ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ކޮމިޓީތައް އެކުލަވާލައި މިދިޔަ ދެ އަހަރުގެ ހިސާބުތައް އޮޑިޓް ކުރާނެ އޮޑިޓް ފާމެއް ކަނޑައަޅައިފިއެވެ. 

ހެންވޭރި މީރުމާ ހޮޓެލްގައި ރޭ ބޭއްވި އެފްއޭއެމްގެ ކޮންގްރެސް ފުރަތަމަ ޑިވިޝަނުގެ ފަސް ކުލަބުކަމަށްވާ ކްލަބް އީގަލްސް، ޔުނައިޓެޑް ވިކްޓަރީ (ޔޫވީ) ގްރީން ސްޓްރީޓް، ސުޕަ ޔުނައިޓެޑް ސްޕޯޓްސް (ސަސް) ބުރު ސްޕޯޓްސް އިން ބޮއިކޮޓްކުރި ނަމަވެސް އެކުލަބުތަކާއި ނުލައި ކޯރަމް ހަމަކޮށް ކޮންގްރެސް ވަނީ ކުރިއަށް ގެންގޮސްފައެވެ.

ފުރަތަމަ ޑިވިޝަނުގެ ކްލަބްތަކުގެ ތެރެއިން ވޯޓް ދިނުމުގެ ހައްގު ލިބިފައިވާ ކްލަބްތަކުގެ ތެރެއިން ކޮންގްރެސްގައި ބައިވެރިވީ ކްލަބް ވެލެންސިއާ، މާޒިޔާ އަދި ޓީސީ އެވެ. އަދި ކްލަބު ޕީކޭ އިން ކޮންގްރެސް ބޮއިކޮޓް ކުރާނެ ކަމަށް ކުރިން އަޑު ފެތުރި ނަމަވެސް ކްލަބުން ވަނީ ކޮންގްރެސް އަށް ހާޒިރުވެފައެވެ.

Advertisement

އެފްއޭއެމް އޮޑިޓް ކުރަން ދެފަރާތަކުން ޕްރަޕޯސަލް ހުށަހެޅިއިރު، އޭގެ ތެރޭގައި ހިމެނެނީ ކުރިން ވެސް އެ އެސޯސިއޭޝަންގެ އޮޑިޓްގެ މަސައްކަތް ކުރި އެމްއެޗްޕީއޭގެ އިތުރުން ޕްރޫޑެންޓް ޗާޓާޑް އިންނެވެ. އަދި އޭގެ ތެރެއިން އެމްއެޗްޕީއޭ އިން ހުށަހެޅީ 2023 ގެ އޮޑިޓް 62,640ރ. އަގަކަށް ކޮށްދިނުމަށެވެ.

ނަމަވެސް ޕްރޫޑެންޓް ޗާޓާޑް އިން ހުށަހެޅީ 2023 އަދި 2024 ގެ އޮޑިޓްގެ މަސައްކަތް ޖުމުލަ 88,650ރ. އަގަކަށް ކޮށްދިނުމަށެވެ. އަދި ދެ ޕްރަޕޯސަލް އަށް ބެލުމަށް ފަހު އެންމެ ރަނގަޅު ޕްރަޕޯސަލްއެއްގެ ގޮތުގައި ޕްރޫޑެންޓް ޗާޓާޑްގެ ޕްރަޕޯސަލް ޝޯޓްލިސްޓްކޮށް ނޯމަލައިޒޭޝަން ކޮމިޓީން އެ ނަން ކޮންގްރެސް އަށް ހުށަހެކުމުން ކޮންގްރެސްގައި ބައިވެރިވި ކްލަބްތަކުން އެ ފާމަށް ވަނީ ރުހުން ދިނެވެ.

އެފްއޭއެމްގެ އެޕީލްސް ކޮމިޓީއަށް ހޮވުނު މެންބަރުނަކީ މުހައްމަދު ޝަފާޒް ވަޖީހް، އަހްމަދު ނާޒިމް މުހައްމަދު, އަޒީނާ ޢަބްދުލް މަތީން އަދި މުހައްމަދު ޒައީމް އެވެ. އަދި ޑިސިޕްލިނަރީ ކޮމިޓީއަށް ހޮވުނު މެންބަރުނަކީ މުއައްވިޒު ރަޝީދު، މުޙައްމަދު ސަމާހް، ހުސައިން ރަޝީދު، އިސްމާއީލް ޒުމައިލް ރަޝީދު އަދި ބައްސާމް ރަޝީދު އެވެ.

މީގެ އިތުރުން އެފްއޭއެމްގެ އެތިކްސް ކޮމީޓީއަށް ހޮވުނު މެންބަރުނަކީ މުހައްމަދު އިބްރާހިމް، އުމަރު މަމްދޫހް އަދި އާއިޝަތު ރިއުޝާނާ އެވެ.