އަހަރުގެ މިހާތަނަށް އާއިރު ދައުލަތަށް ލިބުނު އެއްޗަކަށްވުރެ ނިސްބަތުން ކުރެވުނު ހަރަދު ކުޑަކަމަށް މާލީ ވުޒާރާގެ ތަފާސްހިސާބުތަކުން ދައްކައިފިއެވެ.

މާލީ ވުޒާރާއިން ނެރެ އާއްމުކޮށްފައިވާ ދައުލަތުގެ ހަރަދުބަރަދުގެ ތަފްސީލް އަންގައިދޭ މާލީބަޔާނަށް ބަލާއިރު، މިހިނގާ މާރޗްމަހުގެ ހަވަނަ ދުވަހުގެ ނިޔަލަށް ދައުލަތަށް ޖުމްލަ އާމްދަނީގެ ގޮތުގައި 7.1 ބިލިއަން ރުފިޔާ ލިބުނުއިރު، ހަރަދުތައް ހުރީ 5.7 ބިލިއަން ރުފިޔާގައެވެ.

ހިސާބުތަކަށް ބަލާއިރު އަހަރުގެ މިހާތަނަށް ދައުލަތަށް ޓެކްސް އާމްދަނީގެ ގޮތުގައި 5.1 ބިލިއަން ރުފިޔާ ލިބުނުއިރު، ނޮން ޓެކްސް އާމްދަނީގެ ގޮތުގައި 1.2 ބިލިއަން ރުފިޔާ ވަނީ ލިބިފައެވެ. މި މުއްދަތުގެ ތެރޭގައި ހަރަދުތައް ހުރި ގޮތަށް ބަލާއިރު، ރިކަރަންޓް ހަރަދުގެ ގޮތުގައި 5.3 ބިލިއަން ރުފިޔާ ހަރަދުވެފައިވާއިރު، ކެޕިޓަލް ހަރަދުގެ ގޮތުގައި ހަރަދުވެފައިވަނީ، 394.6 މިލިއަން ރުފިޔާއެވެ.

އަހަރުގެ މިހާތަނަށް އެންމެބޮޑު އާމްދަނީއެއް ލިބިފައިވަނީ ޖީއެސްޓީންނެވެ. އެއީ 3.2 ބިލިއަން ރުފިޔާއެވެ. ޖީއެސްޓީއަށްފަހު ދެން އެންމެގިނައިން އާމްދަނީ ލިބިފައިވަނީ، ވިޔަފާރީގެ ފައިދާއިން ނަގާ ޓެކްސްގެ އިތުރުން އިންކަމް ޓެކުހުންނެވެ. 

ކުރެވުނު ރިކަރަންޓް ހަރަދުތަކަށް ބަލާއިރު މުސާރަ އާއި ޕެންޝަނަށް 2.4 ބިލިއަން ރުފިޔާ ހަރަދުވިއިރު، އިދާރީ ހަރަދުތަކުގެ ގޮތުގައި 2.9 ބިލިއަން ރުފިޔާ ވަނީ ހަރަދުވެފައެވެ.

މިހިނގާ 2025 ވަނަ އަހަރަށް ރައްޔިތުންގެ މަޖިލީހުން ފާސްކޮށްފައިވަނީ 56.6 ބިލިއަން ރުފިޔާގެ ބަޖެޓެކެވެ. މި އަހަރުގެ ބަޖެޓުގެ ޖުމުލަ ޚަރަދަކީ 49.2 ބިލިއަން ރުފިޔާއެވެ. އެއީ، ރިކަރަންޓް ޚަރަދުގެ ގޮތުގައި 35.9 ބިލިއަން ރުފިޔާއާއި ކެޕިޓަލް ޚަރަދުގެ ގޮތުގައި 13.3 ބިލިއަން ރުފިޔާއެވެ. މި އަހަރުގެ ޖުމުލަ އާމްދަނީއާއި ހިލޭ އެހީ 39.8 ބިލިއަން ރުފިޔާއަށް އަރާނެ ކަމަށްވަނީ އަންދާޒާކޮށްފައެވެ. އެއީ، ހިލޭ އެހީގެ ގޮތުގައި 2.5 ބިލިއަން ރުފިޔާ ހިމަނައިގެންނެވެ. ދަރަނި އަނބުރާ ދައްކަން ބަޖެޓުގައި 3.9 ބިލިއަން ރުފިޔާ ވަނީ ހިމަނާފައެވެ.