މުއިވެޔޮ ފަސްއަނގޮޅި ކަންމަތީން އިންތިޒާމުކުރާ ޤުރުއާން މުބާރާތް މި އަހަރު ވެސް ބޭއްވުމަށް ނިންމައިފި އެވެ.

މި މުބާރާތަކީ އެ ސަރަހައްދުގައި ދިރިއުޅޭ އާއިލާތަކަށް ޚާއްސަކޮށްގެން މިދިޔަ އަހަރު ބާއްވަން ފެށި މުބާރާތެކެވެ. ބޭނުމަކީ ކުޑަކުދީންގެ ހިތްތަކުގައި ކީރިތި ޤުރުއާނަށް ލޯބި ޖެއްސުމާއި މުއިވެޔޮ ސަރަހައްދުގައި ދިރިއުޅޭ މީހުންގެ މެދުގައި ގުޅުން ބަދަހި ކުރުމެވެ.

މި މުބާރާތް ރާވާ ހިންގަނީ އެ ސަރަހައްދުގައި ވިޔަފާރި ހިންގާ "ދޫނި ފިހާރަ" އިންނެވެ.

މިދިޔަ އަހަރުގެ މުބާރާތުގައި ދަރިވަރަކު ކިޔަވަނީ

މި އަހަރުގެ މުބާރާތަށް ވެސް މިހާރު އޮތީ ހުޅުވާލާފަ އެވެ. މުބާރާތް ފެށުމަށް ހަމަޖެހިފައިވަނީ ރޯދަ މަހުގެ 27 ވަނަ ދުވަހު އެވެ.

މުބާރާތް ކުރިއަށް ގެންދަނީ 6 އަހަރުން ދަށް 9 އަހަރުން ދަށް އަދި 12 އަހަރުން ދަށުގެ އުމުރުފުރާއަށް ހާއްސަކޮށެވެ.

ދޫނި ފިހާރައިން ބުނީ މުބާރާތުގައި ބައިވެރިވުމުގެ ފުރުސަތު މިހާރު ވެސް އޮންނާނެ ކަމަށެވެ. މުބާރާތާއި ގުޅޭ މައުލޫމާތު ހިމެނޭ ޕޯސްޓަރުތައް އެ ސަރަހައްދު ގައި ވަނީ ހިއްޕާފަ އެވެ.

މިދިޔަ އަހަރުގެ މުބާރާތުގައި ދަރިވަރަކު ކިޔަވަނީ

އެ ޕޯސްޓަރުތަކުގައިވާ ކިއުއާރު ކޯޑް ސްކޭން ކޮށްލުމުން މުބާރާތުގައި ބައިވެރިވުމުގެ ފޯމް ފެންނާނެ އެވެ. އެ ފޯމް ފުރިހަަމަ ކުރުމަށް ފަހު ހުށައެޅުމަށް ވަނީ އެދިފަ އެވެ.

މިދިޔަ އަހަރު މި މުބާރާތް ވަނީ ވަރަށް ކާމިޔާބު ކަމާއކެު ބާއްވާފަ އެވެ. މުބާރާތުގެ އެއްވަނަ އަށް އައި ދަރިވަރަށް 10,000 ރުފިޔާ ދީފައިވެ އެވެ. ދެވަނަ ދަރިވަރަށް 7,500 އަދި ތިންވަނަ ދަރިވަރަށް 5,000 ރުފިޔާ ވަނީ ދީފަ އެވެ.

މުބާރާތަށް އިނާމު ހުށައެޅުމުގެ ފުރުސަތު ވެސް ވަނީ ހުޅުވާލާފަ އެވެ.

މިދިޔަ އަހަރު މުބާރާތުން އެއްވަނަ ހޯދި ދަރިވަރު

އިންތިޒާމު ކުރާ ފަރާތުން ބުނި ގޮތުގައި މި އަހަރުވެސް މުބާރާތުން ވަނަވަނައަށް ހޮވޭ ދަރިވަރުންނަށް ބޮޑެތި ފައިސާގެ އިނާމު ހުށައަޅާނެ އެވެ. ނަމަވެސް އެ އަދަދު އަދި ކަނޑައެއް ނާޅަ އެވެ. މި މުބާރާތަށް މުއިވެޔޮ ފަސްއަނގޮޅި ކަންމަތީން ހިމެނޭ ވަރަށް ގިނަ އާއިލާތަކާއި ވިޔަފާރިވެރީން އިނާމު ހުށައަޅަ އެވެ.

އެ ހުރިހާ އިނާމުތަކަށް ބެލުމަށް ފަހު ވަނަވަނައަށް އަންނަ ބައިވެރީންނަށް އިނާމު ކަނޑައަޅާނެ ކަމަށް ބުންޏެވެ.

"ކުރީ އަހަރަށް ވުރެ ކުޑައެއް ނުވާނެ އިރާދަކުރެއްވިއްޔާ. އަޅުގަނޑުމެންގެ ޓާގެޓަކީ އަހަރުން އަހަރަށް އިނާމު ބޮޑުކުރުން," މުބާރާތް އިންތިޒާމު ކުުރުމުގައި ހަރަކާތްތެރިވާ އޮފިޝަލަކު ވިދާޅުވި އެވެ.

މިދިޔަ އަހަރު މުބާރާތުން ވަނަ ލިބުނު ދަރިވަރެއް ޓްރޮފީއާއެކު

ކޮންމެ އުމުރުފުރާއަކުން އެއްވަނަ، ދެވަނަ އަދި ތިންވަނަ ހޮވާނެ އެވެ. މުޅި މުބާރާތުން ވެސް އެއްވަނަ، ދެވަނަ އަދި ތިންވަނަ ހޮވާނެ އެވެ.    

މީގެ އިތުރުން މުބާރާތުގައި ކިޔަވާ ކޮންމެ ދަރިވަރަކަށް ވެސް އިނާާމު ދިނުމަށް ވަނީ ހަމަޖެހިފަ އެވެ.

އެގޮތުން ކިޔަވާ ނިމުމުން ކޮންމެ ދަރިވަރަކަށް ވެސް އިނާމު ދޭނެ އެވެ. އަދި މުބާރާތުގެ ނަތީޖާ ފާޅުކުރާ ރޭ ވެސް ކޮންމެ ދަރިވަރަކަށް ޚާއްސަ އިނާމެއް ދިނުމަށް ވަނީ ނިންމާފަ އެވެ.

މުއިވެޔޮ ފަސްއަނގޮޅި ކަންމަތީން ދިރިއުޅޭ އާއިލާތަކުގެ ބަދަހިކަމަށް އެ ސަރަހައްދުގައި އިސްކޮށް އުޅޭ މީހުން ވަރަށް ގިނަ ހަރަކާތްތައް ރާވާ ހިންގަ އެވެ. އެއީ ވަރަށް އެއްބައިވަންތަ ބަޔަކު ދިރިއުޅޭ ނަމޫނާ ސަރަހައްދެކެވެ.