އެމްޑީޕީގެ މުޒާހަރާގައި ކުޑަކުއްޖެއްގެ ކަރާމާތް ނަގާލާ ވާހަކަ ދެއްކުމާއި އެ ވާހަކަތައް ޓީވީން ޗެނެލަކުން ވަގުތުން ދެއްކި ދެއްކުން ޗިލްޑްރަންސް އޮމްބަޑްސްޕާސަން އޮފީހުން ކުށްވެރި ކޮަށްފި އެވެ.

އެ އޮފީހުން ވަނީ ބަޔާނެއް ނެރެ އެކަން ކުށްވެރި ކޮށްފަ އެވެ.

އިދިކޮޅު އެމްޑީޕީން ކުރި މުޒާހަރާގައި އެމްޑީޕީގެ އެކްޓިވިސްޓް މަރިޔަމް ޒުބައިރު (މަންދީ) ވަނީ، ރާއްޖޭގައި ވޭޕު މަނާކުރި ސަބަބު އޮޅުވާލާ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދަރިކަލުންނާއި ގުޅުވާ ދޮގު ވާހަކަތަކެއް ދައްކާފައެވެ. އެ ވާހަކަތައް ރާއްޖެޓީވީން ވަނީ ބްރޯޑްކާސްޓް ކޮށްފަ އެވެ.

Advertisement

ޗިލްޑްރަންސް އޮމްބަޑްސްޕާސަން އޮފީހުން ބުނީ ކުޑަކުދީންނަކީ ހާއްސަ ރައްކާތެެރިކަމެއް ލިބެން ޖެހޭ ބައެއްކަން ގާނޫނު އަސާސީގައި ކަނޑައަޅާފައިވާ ކަމަށެވެ. އެހެން ކަމުން އެފަދައިން އަމަލުކުރުމަކީ ދިވެހި މުޖްތަމައުގެ ދިރިއުޅޭ އެންމެންގެ މައްޗަށް އޮތް ޒިންމާއެއް ކަމަށެވެ.

އެ އޮފީހުން ވަނީ އެމްޑީޕީގެ ސިޔާސީ ހަރަކާތެއްގައި ކުޑަކުއްޖެއްގެ ކަރާމާތަށް އުނިކަން އަންނަ ގޮތަށް ވާހަކަ ދެއްކުމާއި ރަޖިސްޓްރީ ކޮށްގެން ހިންގާ މީޑިއާއަކުން އެ މަންޒަރާއި އަޑު ބްރޯޑްކާސްޓް ކޮށްފައިވާތީ އެކަން ކުށްވެރި ކޮށްފަ އެވެ.

“ކުޑަކުދީންނާއިމެދު ހިންގާ މިފަދަ އަމަލުތަކަކީ އޭގެ ސަބަބުން އެކުދީންގެ އަމިއްލަ ނަފްސަށް ކުރާ އިތުބާރު ކުޑަވެ ނަފްސާނީ ގޮތުން އެ ކުދީންނަށް ބޮޑެތި އަސަރުތަައް ތަހަންމަލު ކުރުވާ ފަދަ ކަންކަމެވެ،”
އެހެން ކަމުން އެފަދަ ކަންކަން ތަކުރާރު ނުވާނެ ގޮތެއްގެ މަތީން ކަންކަން އިންތިޒާމު ކުރުމަށް ގޮވާލާފައިވެ އެވެ.

މި މައްސަލަ ދައުލަތުގެ ކަމާގުޅުން ހުރި އިދާރާތަކުގެ ސަމާލުކަމަށް ގެނެސްފައިވާ ކަމަށާ އެކަން ގާތުން ބަލަމުންދާނެ ކަމަށް ވެސް ޗިލްޑްރަންސް އޮމްބަޑްސްޕާސަން އޮފީހުން ބުންޏެވެ.

މަންދީގެ ވާހަކަތައް ވަރަށް ގިނަ ބަޔަކު ދަނީ ކުށްވެރި ކުރަމުންނެވެ.