އިނގިރޭސި ލީގު ކަޕްގެ ފައިނަލުގައި މުބާރާތުގެ އެންމެ ކާމިޔާބު ޓީމު ލިވަޕޫލް 2-1 ގެ ނަތީޖާއަކުން ބަލިކޮށް ނިއުކާސަލް ޔުނައިޓެޑުން މުބާރާތުގެ ޗެންޕިއަންކަން ހޯދައިފިއެވެ.

މުބާރާތުގެ ފައިނަލުން ނިއުކާސަލް ޖާގަހޯދީ ސެމީފައިނަލުގައި 4-0 ގެ އެގްރިގޭޓް ނަތީޖާއަކުން އާސެނަލް ބަލިކުރުމަށްފަހު އެވެ. އަދި ލިވަޕޫލް ފައިނަލުން ޖާގަހޯދީ ސެމީފައިނަލްގެ ދެވަނަ މެޗުގައި 4-1 ގެ އެގްރިގޭޓް ނަތީޖާއަކުން ޓޮޓެންހަމް ބަލިކުރުމަށްފަހު އެވެ.

އާދިއްތަ ދުވަހުގެ ރޭ ވެމްބްލީ ސްޓޭޑިއަމްގައި ކުޅެވުނު ފޯރިގަަދަ ފައިނަލް މެޗުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ 45 ވަނަ މިނެޓުގައި ނިއުކާސަލް އިން ވަނީ ލަނޑެއް ކާމިޔާބުކޮށް މެޗުގެ ލީޑިހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ޑިފެންޑަރު ޑޭން ބާން އެވެ.

ނިއުކާސަލް އިން ލީޑު ފުޅާކުރި ލަނޑު ދެވަނަ ހާފުގެ 52 ވަނަ މިނެޓުގައި ފޯވާޑް އެލެގްޒެންޑާ އިސާކް ކާމިޔާބުކުރިއިރު، އޭގެ މިނެޓެއް ކުރިން ވެސް އިސާކް ލަނޑެއް ކާމިޔާބު ކުރިއެވެ. ނަމަވެސް ވީއޭއާރުން ބެލުމަށް ފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ.

ލިވަޕޫލުން ނަތީޖާގެ ފަރަގު ކުޑަކުރި ލަނޑު ފަހުހާފުގެ އިތުރު ވަގުތުގެ ހަތަރުވަނަ މިނެޓުގައި ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނިކުތް ފެޑެރީކޯ ކިއޭސާ އެވެ.

މިމުބާރާތުގެ ޗެންޕިއަންކަން ލިވަޕޫލުން 10 ފަހަރު ހޯދާފައިވާއިރު، މިއީ 1955 ވަނަ އަހަރު އެފްއޭކަޕް ކާމިޔާބުކުރި ފަހުން ނިއުކާސަލް އިން ބޮޑު މުބާރާތެއްގެ ޗެންޕިއަންކަން ހޯދި ފުރަތަމަ ފަހަރެވެ.