އަންހެނުންގެ ހައްގުތަކަށް ވަކާލާތުކޮށް ބާރުވެރިކުރުވާ ސިޔާސީ މައިދާނުގައި އަންހެނުންނަށް ފުރުސަތުތައް ފަހިކޮށް ދިނުމަށް މަސައްކަތް ކުރާ ވިމެން އެންޑް ޑިމޮކްރަސީން އާ ޕްލެޓްފޯމެއް ލޯންޗުކޮށްފި އެވެ.

ވިމެން އެންޑް ޑިމޮކްރަސީ އަކީ މީގެ 10 އަހަރު ކުރީން އުފައްދާފައިވާ އެންޖީއޯ އެކެވެ. މިދިޔަ 10 އަހަރުތެރޭ އެ ޖަމިއްޔާ އިން ވަނީ އަންހެނުންގެ ހައްގުތަކަށް ވަކާލާތުކޮށް ބާރުވެރިކުރުވާ ސިޔާސީ މައިދާނުގައި އަންހެނުންނަށް ފުރުސަތުތައް ފަހިކޮށް ދިނުމަށް ގިނަ މަސައްކަތްތަކެއް ކޮށްފަ އެވެ.

ހާއްސަކޮށް ކޮންމެ ލޯކަލް ކައުންސިލް އިންތިހާބަކާ ދިމާކޮށް ސިޔާސީ ދާއިރާ އިން ކުރިއަށްދާން ބޭނުންވާ އަންހެނުންނަށް އެހީތެރިކަން ފޯރުކޮށް ދެ އެވެ. އެންމެ ފަހުން އޮތް ކައުންސިލް އިންތިހާބާ ދިމާކޮށްވެސް 350 އަންހެން ކެންޑިޑޭޓުން ޓްރެއިން ކޮށްފައިވެ އެވެ.

ޑަބްލިއުޕީޖީއެން ޕްލެޓްފޯމް އިފްތިތާޙު ކުރުން

ވިމެން އެންޑް ޑިމޮކްރަސީ އަށް 10 އަހަރު ވުމާއި ދިމާކޮށް އަދި ކުރިއަށް އޮތް ލޯކަލް ކައުންސިލް އިންތިހާބުގައި އަންހެނުންނަށް ފުރުސަތު ފަހިކޮށް ދިނުމުގެ ބޭނުމުގައި އެ ޖަމިއްޔާ އިން މިހާރު ވަނީ ހާއްސަ ޕްލެޓްފޯމެއް ގާއިމުކޮށްފަ އެވެ. 
"ވިމެން ޕިއާ ގްރޫޕް ނެޓްވޯކް" ނަމުގައި އުފެއްދި މި ޕްލެޓްފޯމް މެދުވެރިކޮށް ސިޔާސީ ދާއިރާއަށް ވަންނަ ޝައުގުވެރިވާ އަންހެނުންނާއި އިންތިހާބީ މަގާމުތަކަށް ޝައުގުވެރިވާ އަންހެނުންނަށް ފުރުސަތު ހޯދާދޭން މަސައްކަތް ކުރާނެ އެވެ.

ޑަބްލިއުޕީޖީއެން ޕްލެޓްފޯމް އިފްތިތާޙު ކުރުން

އެގޮތުން ކައުންސިލް އިންތިހާބުގެ ކުރީން މި ފަހަރު ވެސް މެންޓާޝިޕް ޕްްރަގްރާމެއް ހިންގުމަށް ވަނީ ހަމަޖެހިފަ އެވެ. ތަފާތު ގުރޫޕްތައް އުފައްދައިގެން ހިންގާ މި ޕްރަގްރާމްގައި ސިޔާސީ އެކި ޕާޓީތަކުގައި އެންމެ ފާހަގަކޮށްލެވޭ އަންހެން ބޭފުޅުން އެ ބޭފުޅުންގެ ތަޖުރިބާތައް ހިއްސާކޮށް ކުރިއަށް ދެވޭނެ ގޮތްތައް ކިޔައިދޭނެ އެވެ.

ޑަބްލިއުޕީޖީއެން ޕްލެޓްފޯމް އިފްތިތާޙު ކުރުން

ޑަބްލިއުޕީޖީއެން ޕްލެޓްފޯމްގައި ސިޔާސީ ހުރިހާ ފިކުރެެއްގެ ބޭފުޅުން ހަރަކާތްތެރިވީ ނަމަވެސް މިއީ ވަކި ސިޔާސީ ވިސްނުމެއް ގައި މަސައްކަތް ކުރާނެ ޕްލެޓްފޯމެއް ނޫނެވެ. އޭގެ ބަދަލުގައި އަންހެނުން ބާރުވެރިކޮށް އަންހެނުންނަށް ދިމާވާ ހުރިހާ ކަމެއްގައި އެކުގައި މަސައްކަތްކޮށް ހައްލު ހޯދުމަށް މަސައްކަތް ކުރާނެ އެވެ.

އަދި ސިޔާސީ ދާއިރާއަށް އަންހެނުން ނެރެދީ އެ މީހުންނަށް ހިތްވަރު ދޭ ޕްލެޓްފޯމަކަށް ވާނެ އެވެ.

ޑަބްލިއުޕީޖީއެން ޕްލެޓްފޯމް އިފްތިތާޙު ކުރުން

މި ޕްލެޓްފޯމް މެދުވެރިކޮށް ވަރުގަދަ ސަޕޯޓް ސިސްޓަމެއް ގާއިމުކޮށް ކެޕޭސިޓީ ބިލްޑިން އެންޑް ސްކިލް ޑިވެލޮޕްމަންޓް އިތުރުކުރެވޭނެ އެވެ. ސޯޝަލް މީޑިއާގެ ވަސީލަތައް މެދުވެރިކޮށާއި އެ ނޫން ގޮތްގޮތުން އަންހެނުންނަށް ކުރެވޭ ފުރައްސާރައާ ދެކޮޅު ހަދާ އެކަންކަމާއި ގުޅިގެން ކުރިމަތިލާނެ އެވެ.