ޔޫރަޕިއަން ޔޫނިއަންއާއި ޗައިނާއާ ދެމެދު ޑިޕްލޮމެޓިކް ގުޅުން ގާއިމްކުރިތާ 50 އަހަރު ފުރުން ފާހަގަކުރުމަށް ބެލްޖިއަމްގެ ވެރިރަށް ބްރަސަލްސްގައި ބާއްވާ ޚާއްސަ ސަމިޓަށް ޗައިނާގެ ރައީސް ޝީ ޖިންގްޕިންގް އަށް ދައުވަތު އެރުވިނަމަވެސް ޝީ ވަޑައިނުގަންނަވާނެކަމަށް އަންގަވައިފިއެވެ.
ޝީގެ ބަދަލުގައި ޔޫރަޕިއަން ކޮމިޝަންގެ ރައީސްއާއި ޔޫރަޕިއަން ކައުންސިލްގެ ރައީސްއާއި ބައްދަލުކުރައްވާނީ ޗައިނާގެ ބޮޑުވަޒީރު ލީ ކިއާންގް އެވެ. އާއްމުގޮތެއްގައިވެސް އީޔޫ-ޗައިނާ ސަމިޓްތައް ބްރަސަލްސްގައި ބާއްވާއިރު ބައިވެރިވެވަޑައިގަންނަވަނީ ޗައިނާގެ ބޮޑުވަޒީރެވެ. އަދި ބެއިޖިންގގައި ސަމިޓް ބާއްވާއިރު ސަމިޓް ހޯސްޓްކުރައްވަނީ ސީދާ ޗައިނާގެ ރައީސްއެވެ. އެހެންނަނަވެސް މިއަހަރަކީ ޗައިނާއާއި ވިލާތުގެ އިއްތިހާދުގެ ސިޔާސީ ގުޅުމަށް 50 އަހަރު ފުރޭ އަހަރުކަމަށްވުމާއެކު، ޚާއްސަ މުނާސަބަތެއްގެ ގޮތުގައި މިއަހަރުގެ ސަމިޓްގައި ޝީ ބައިވެރިވެވަޑައިގަތުމަށް ޔޫރަޕުން ބޭނުންވީއެވެ.
ރަޝިޔާ-ޔޫކްރެއިން ހަނގުރާމައާއެކު ޗައިނާއާއި ޔޫރަޕްގެ ގުޅުންވެސް ވަނީ ގޯސްވެފައެވެ. ބްރަސަލްސްއިން ތުހުމަތުކުރާ ގޮތުގައި ބެއިޖިންގ އިން ދަނީ ހަނގުރާމައިގައި ރަޝިޔާއަށް ވާގިވެރިވަމުންނެވެ. އަދި ދާދިފަހުން ޔޫރަޕުން ވަނީ ޗައިނާއިން އެތެރެކުރާ އިލެކްޓްރިކް ކާރުތަކުން ޓެރިފްވެސް ނަގަން ފަށާފައެވެ. އެހެންކަމުން ޗައިނާއާއި ވިލާތުގެ އިއްތިޙާދާއި، އަދި އެ އިއްތިޙާދުގައި ހިމެނޭ ގައުމުތަކާއެކު އޮންނަ ގުޅުން ވަނީ ވަރަށް ބޮޑަށް މިފަހުން ހީނަރުވެފައެވެ.
Advertisement
This content is created and paid for by advertisers and does not involve Voice Journalists
