މުސްލިމުންގެ ގަބުރުސްތާނުތައް ތަޅާ ސުންނާފަތިކޮށް، އެތަންތަނަކީ ކުޅިވަރުތަކާއި ނާޗަރަނގީ ކުޅޭ ތަންތަންކަމުގައި ހެދުމަކީ ކަނޑައެޅިގެން ޙަރާމްވެގެންވާ އަދި ބޮޑުވެގެންވާ މުންކަރާތެއް ކަމަށް ބައެއް ޢިލްމުވެރީން ވިދާޅުވެއްޖެ އެވެ.

މާލޭގެ ސަހަރާތަކުން ބައެއް ސާފުކޮށް އެހެން ބޭނުންތަކަށް ޚާއްސަ ކުރާ މައްސަލަ އަކީ ބޮޑު މައްސަލައެކެވެ. މައްޗަންގޮޅީ ސަހަރާގެ ބައެއް ނަގާ އެތަނުގައި ވަނީ ޕާކެއް ހަދާފަ އެވެ. ސިޓީ ކައުންސިލުން ދަނީ މާފަންނު ސަހަރާގެ ބައެއް ވެސް ސާފު ކުރަމުންނެވެ.

ސާފުކޮށްފައިވާ ސަރަހައްދު ގައި މިހާރު ވަނީ ބައިބަލާ ކުޅެން ރިންގެއް ވެސް އަޅާފަ އެވެ. އެކަމާ ގުޅިގެން އެތައް ބަޔަކު ދަނީ ފާޑުކިޔަމުންނެވެ.

Advertisement

ޝެއިހް މުހައްމަދު ނަޝީދު ވިދާޅުވި ގޮތުގައި މިސްކިތްތަކާއި ގަބުރުސްތާނުތަކަކީ ވަޤުފު ބިންތަކެކެވެ. އަދި އެތަންތަން އުވާލުމަކީ ނުވަތަ އެެހެން ބޭނުމަކަށް ބަދަލުކުރުމުގެ ބާރު ރައީސުލްޖުމްހޫރިއްްޔާއަށް ވެސް މޭޔަރަށް ވެސް އަދި ރައްޔިތުންނަށް ވެސް ލިބިގެން ނުވާ ކަމަށެވެ.

ޝެއިހް އަހްމަދު ނިޝާން ވެސް ވިދާޅުވީ މުސްލިމުންގެ ގަބުރުސްތާނުތައް ތަޅާ ސުންނާފަތިކޮށް، އެތަންތަނަކީ ކުޅިވަރުތަކާއި ނާޗަރަނގީ ކުޅޭ ތަންތަންކަމުގައި ހެދުމަކީ ކަނޑައެޅިގެން ޙަރާމްވެގެންވާ އަދި ބޮޑުވެގެންވާ މުންކަރާތެއް ކަމަށެވެ.

“މިކަން ވަގުތުން ވަގުތަށް ހުއްޓުވުމަށް ސަރުކާރަށް އިލްތިމާސްކޮށް ގޮވާލަން،”ޝެއިހް ނިޝާން ވިދާޅުވި އެވެ.