ސިޔާސީ ކަންކަމުގައި ޅަދަރީންގެ ކަރާމާތަށް އަރައިގަތުމަކީ ލާއިންސާނީ އަމަލެއް ކަމަށާ އެފަދަ ވާހަކަތައް ދިފާއުކުރަން ދައްކާނެ ބަހަނާއެއް ނޯންނާނެ ކަމަށް ދަ ޑިމޮކްރެޓްސްގެ ނާއިބު ރައީސާ އާޝިޔަތު އަލައިކާ އަދުނާނު ވިދާޅުވެއްޖެ އެވެ.

އެކަމަނާ މިހެން ވިދާޅުވީ އެކްސްގައި ކުރެއްވި ޕޯސްޓެއްގަ އެވެ. އެފަދަ ޕޯސްޓެއް އަލައިކުރާ ކުރެއްވިއިރު އެމްޑީޕީގެ އެކްޓިވިސްޓަކު ވަނީ ރައީސް މުއިއްޒުގެ ދަރިކަލުންނާއި ގުޅޭގޮތުން ބުހުތާނު ދޮގުތަކެއް ފަތުރާ ކުޑަކުއްޖެއްގެ ކަރާމާތަށް އަރައިގެންފަ އެވެ. އެކަން ދިފާއު ކުރަން އެމްޑީޕީގެ ބައެއް ވެެރީން ދަނީ މަސައްކަތް ވެސް ކުރަމުންނެވެ.

އަލައިކާ ވިދާޅުވި ގޮތުގައި ސިޔާސީ ކަންކަމުގައި އެންމެންގެ ވިސްނުމާއި ފިކުރު އެއްގޮތް ނުވެދާނެ އެވެ. އަދި ގައުމަށްޓަކައި އެ ބަޔަކު ގަބޫލުކުރާ ސިޔާސަތުތަކާއި ނިންމުންތަކާއި ކުރާ ތަސައްވުރާމެދު ޖަދަލުކޮށް ބަހުސްތައް ކުރެވޭނެ އެވެ. އެހެން ނަމަވެސް ސިޔާސީ ކަންކަމުގައިވެސް ހައްދުތަކަކާއި މިންތަކެއް އަދި ހުރަސް ނުކުރެވޭނެ ރޮނގުތަކެއް ހުންނާނެ ކަމަށް އަލައިކާ ވިދާޅުވި އެވެ.

Advertisement

އެގޮތުން ކުށެއްނެތް މީހުންނަށާއު ސިޔާސީ ކަންކަމުގައި އެއްވެސް ދައުރެއް ނެތް ކުދީންނާއި އާއިލާތަކަށް ފުރައްސާރަކޮށް ކަރާމާތަށް އަރައިގަތުމަކީ އެ ރޮނގު ހުރަސް ކުރުން ކަމަށް ވިދާޅުވި އެވެ.

އަލައިކާ ވިދާޅުވީ ސިޔާސީ ކަންކަމުގެ ނަމުގައި މީހުންގެ އަމިއްލަ ޒާތީ ދިރިއުޅުމާ ބެހި ކުށެއް ނެތް ކުދީންގެ ބޮލުގައި ދޮގު އިލްޒާމުތައް އަޅުވާ އެފަދަ އާއިލާތަކަށް ބޮޑެތި ހިތާމަތައް ކުރިމަތިކުރުވުން ބިރުވެރި ޓްރެންޑަކަށް ވަމުންދާތަން ފެންނަމުންދާ ކަމަށެވެ.

އެ މީހަކީ ސަރުކާރުގެ އިސް މީހަކަށް ވެގެން ނުވަތަ އިދިކޮޅު ސިޔާސީ ޕާޓީއެއްގެ އިސް މީހަކަށް ވެގެން ނުވަތަ އެހެން ގޮތަކުން ސިޔާސީ މީހަކާއި ގުޅުމެއް އޮތަސް އެފަދަ މީހެއްގެ ނުވަތަ ބައެއްގެ އާއިލާތަކާއި ޅަދަރީންގެ ކަރާމާތަށް އަރައިގަތުމަކީ ދުވަހަކުވެސް ދިފާއުކޮށް ތަހަންމަލު ކުރެވޭނެ ކަންކަން ނޫން ކަމަށާ އެކަންކަން ދިފާއު ކުރަން ދެއްކޭނެ ބަހަނާއެއް ނޯންނާނެ ކަމަށް ވެސް އަލައިކާ ވިދާޅުވި އެވެ.

"ސިޔާސީ ހިޔާލުތަފާތުވުން ކިތަންމެ ބޮޑަށް މައުސޫމް ކުދީންގެ ކަރާމާތް ނަގާލާ އިންޒާރު ދިނުން ފަދަ ކަންކަމަކީ ދިފާއު ކުރެވޭނެ ކަންކަމެއް ނޫން. މި ވިހަ ނުބައި އާދަ ނިމުމަކަށް ގެންނަން ޖެހޭ," އަލައިކާ ވިދާޅުވި އެވެ.