މިއަހަރުގެ ރަމަޟާންމަހުގެ ފުރަތަމަ 10 ދުވަސް ނިމިގެންދިޔައިރު، ދުވާލުގަޑީގައި ކައިގެން އެއްވެސް މައްސަލައެއް ހުށަހަޅާފައެއް ނެތްކަމަށް ފުލުހުންގެ އިދާރާގެ ތަފާސްހިސާބުތަކުން ދައްކައިފިއެވެ.

ފާއިތުވެދިޔަ އަހަރުތަކުގެ ރަމަޟާންމަހު ފުލުހުން އާއްމުކުރާ ތަފާސްހިސާބުތަކަށް ބަލާއިރު، ދުވާލުގަޑީގައި ކައިބޮއެ ހެދުމުގެ މައްސަލަތައް ހިމެނޭކަން ފާހަގަކޮށްލެވެއެވެ. ނަމަވެސް ފުލުހުން މިއަދު އާއްމުކުރި ތަފާސްހިސާބުގައި ރޯދަމަހު ކައިގެން އެއްވެސް މައްސަލައެއް ފުލުހުންނަށް ރިޕޯޓްކޮށްފައެއް ނެތެވެ.

ފުލުހުން އާއްމުކޮށްފައިވާ ތަފާސްހިސާބަށް ބަލާއިރު، ރޯދަމަހުގެ ފުރަތަމަ 10 ދުވަހުގެ ތެރޭގައި ޖުމްލަ 692 މައްސަލަ ހުށަހެޅިފައިވާއިރު، މި މައްސަލަތަކުގައި 148 މީހުން ވަނީ ހައްޔަރުކޮށްފައެވެ. މި މުއްދަތުގެ ތެރޭގައި ފުލުހުންގެ އިދާރާއަށް އެންމެ ގިނައިން ހުށަހެޅިފައިވަނީ އެކްސިޑެންޓްގެ މައްސަލަތަކާއި، ވައްކަމުގެ މައްސަލަތަކެވެ. މީގެ އިތުރުން ދެން އެންމެ ގިނައިން ހުށަހެށިފައިވަނީ މަސްތުވާތަކެތީގެ މައްސަލަތަކެވެ.

- ޓްރެފިކް އެކްސިޑެންޓުގެ: 153 މައްސަލަ

- ވައްކަމުގެ: 147 މައްސަލަ

- މަސްތުވާތަކެތީގެ: 110 މައްސަލަ

- މަކަރާއި ހީލަތް: 70 މައްސަލަ

- ގެއްލުންދީގެން: 48 މައްސަލަ

- އަނިޔާކުރުމުގެ: 40 މައްސަލަ

- ބިރުދައްކައިގެން: 38 މައްސަލަ

- ކުޑަކުދިންނަށް އަނިޔާކޮށްގެން: 16 މައްސަލަ

- ޖިންސީ ކުށުގެ: 15 މައްސަލަ

ފުލުހުންނަށް ހުށަހެޅޭ މައްސަލަތަކަށް ބަލާއިރު، ވައްކަމާއި އެކްސިޑެންޓްގެ މައްސަލަތަކަކީ ރަމަޟާންމަހު އެންމެގިނައިން ރިޕޯޓްކުރާ މައްސަލަތައްކަމަށް ފުލުހުންގެ ތަފާސްހިސާބުތަކުން ދައްކައެވެ. ރަމަަޟާންމަހު އެންމެގިނައިން ވައްކަން ކުރާ ވަގުތުގެ ގޮތުގައި ފާހަގަކުރެވެނީ ފަތިސްވަގުތާއި ހެނދުނެވެ. މީގެ އިތުރުން އެކްސިޑެންޓްތައް އެންމެގިނައިން ހިނގާ ވަގުތެއްގެ ގޮތުގައި ފާހަގަކުރެވެނީ ހަވީރުގެ ވަގުތުކަމަށް ފުލުހުން ހާމަކުރާ މައުލޫމާތުތަކުން އެނގެއެވެ.