ބައިނަލްއަގުވާމީ އެކުވެރިކަމުގެ މެޗެއްގައި މިރޭ ދިވެހިރާއްޖެ އާއި އިންޑިއާ ވާދަކުރި މެޗު ފަސޭހަކަމާއެކު 3-0 ގެ ނަތީޖާއަކުން އިންޑިއާ އިން ކާމިޔާބުކޮށްފިއެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެން ކުޅެ އިންޑިއާ އިން މެޗު ޑޮމިނޭޓްކުރިއިރު، އެޓީމުން މެޗުގެ ލީޑުހޯދީ ފުރަތަމަ ހާފުގެ 35 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ ބެންގަލޫރް އެފްސީގެ ޑިފެންޑަރު ރާހުލް ބެކޭއެވެ. 

މީގެ އިތުރުން ވެސް މިހާފުގައި އިންޑިއާ އިން ރާއްޖޭގެ ގޯލަށް ރަނގަޅު ހަމަލާތަކެއް ފޮނުވާލި ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން އިންޑިއާ ކުރީގައި އޮވެގެންނެވެ.

Advertisement

މެޗުގެ ދެވަނަ ހާފުގައި އިންޑިއާ އިން އިތުރު ދެލަނޑު ކާމިޔާބުކުރިއިރު އެޓީމުގެ ދެވަނަ ލަނޑު ފަހުހާފުގެ 66 ވަނަ މިނެޓުގައި ފޯވާޑް ލިސްޓަން ކޮލަކޯ ކާމިޔާބުކުރިއިރު، ތިންވަނަ ލަނޑު ފަހުހާފުގެ 77 ވަނަ މިނެޓުގައި ކާމިޔާބުކޮށްދިނީ ކެޕްޓަން ސުނިލް ޗެތްރީ އެވެ.

މިއީ އުމުރުން 40 އަހަރުގެ ޗެތްރީ ގައުމީ ޓީމަށް ކާމިޔާބުކުރި 95 ވަނަ ލަނޑެވެ. އަދި މިއީ ގައުމީ ޓީމަށް ކުޅުން ހުއްޓާލިކަން އިއުލާން ކުރުމަށްފަހު އެނބުރި އައިސް ޗެތްރީ ގައުމީ ޓީމަށް ކުޅުނު ފުރަތަމަ މެޗެވެ.