އާސަންދަ ސްކީމުގެ ދަށުން ޕްރައިވެޓް އިންޝުއަރެންސް އޮންނަ މީހުންނަށް ގެނައި ބަދަލު ތަންފީޒު ކުރަން ފަށައިފި އެވެ.
އާސަންދަ ކުންްފުނިން މިއަދު ބުނީ ޕްރައިވެޓް އިންޝުއަރެންސް އޮންނަ މީހުންނަށް އެނދުމަތި ނުވެ ހޯދާ ސިއްހީ ހިދުމަތްތަކަށް އައިޓް ޕޭޝަންޓް ސާވިސް ފުރަތަމަ ޕްރައިވެޓް އިންޝްއަރެންސް ބޭނުންކުރުމާއެކު އާސަންދަ ސްކީމުން އެ ހިދުމަތަށް ކަނޑައަޅާފައިވާ އަދަދުވެސް އެކުއެކީ ލިބޭނެ އިންތިޒާމު ހަމަޖެއްސުމަށްޓަކައި އާސަންދައިގެ ނިޒާމުތަކަށާއި އިންޓްގްރޭޓް ކޮށްގެން ހިދުމަތްދޭ އަމިއްލަ މަރުކަޒުތަކުގެ ސިސްޓަމަށް ގެންނަން ޖެހޭ ބަދަލުތައް ގެނެސްފައިވާ ކަމަށެވެ.
މި ބަދަލާއެކު އިއްޔެއިން ފެށިގެން ޑޮކްޓަރަށް ދެއްކުމަށް ނަގާ ކޮންސަލްޓޭޝަން ފީ ތަންފީޒު ކުރަން ވަނީ ފަށާފަ އެވެ. އައުޓްޕޭޝަންޓް އެހެނިހެން ހިދުމަތްތަކަށް މި އުސޫލަށް އަމަލު ކުރަން ފަށާނީ މި މަހުގެ 27 ވަނަ ދުވަހުން ފެށިގެންނެވެ.
އާސަންދައިން ބުނީ މި ބަދަލާއެެކު ޕްރައިވެޓް އިންޝްއަރެންސް އޮންނަ މީހުން ހިދުމަތް ހޯދާއިރު އެންމެ ފުރަތަމަ ޗާޖު ކުރާނީ ޕްރައިވެޓް އިންޝްއަރެންސް ޕްލޭން އިން ފޯރުކޮށްދޭ މިންވަރު ކަމަށެވެ. އަދި ޕްރައިވެޓް އިންޝްއަރެންސްގެ ޕްލޭން އިން ކަވަރުކުރާ މިންވަރަށް ވުރެ އިތުރުވާ އަސަދު އާސަންދައިގެ ލިމިޓްގެ ތެރެއިން ފޯރުކޮށްދޭނެ ކަމަށެވެ.
އެ ކުންފުނިން ބުނި ގޮތުގައި މިއީ އާސަންދަ ސްކީމް ރިފޯމް މަސައްކަތުގެ ތެރެއިން ތަންފީޒު ކުރެވޭ ބަދަލެއް ކަމަށެވެ.
Advertisement
This content is created and paid for by advertisers and does not involve Voice Journalists
