އިމިގްރޭޝަން ކޮންޓްރޯލްގެ މަގާމުގައި ހުންނެވި މުހައްމަދު ޝަމްއާން ވަހީދު އެ މަގާމުން ވަކިކުރައްވައިފި އެވެ.

އެކަން ސަރުކާރުގެ އިސް އޮފިޝަލަކު ވަނީ ޔަގީންކޮށް ދެއްވާފަ އެވެ. އެ އޮފިޝަލް ވިދާޅުވީ ކޮންޓްރޯލާ އޮފް އިމިގްރޭޝަންގެ މަގާމުން މުހައްމަދު ޝަމްއާން ވަހީދު މިރޭ ވަކިކުރައްވާފައިވާ ކަމަށެވެ.

ވަކި ކުރެެއްވި ސަބަބެއް ވިދާޅެއް ނުވެ އެވެ.

Advertisement

ނަމަވެސް މި ދަނޑިވަޅާ ދިމާކޮށް ފުލުހުން ވަނީ ނޫސްބަޔާނެއް ނެރެފަ އެވެ. 

އިމިގްރޭޝަންގެ ބައެއްގެ މުވައްޒިފުން ބިދޭސީން އަތުން ނާޖައިޒު މަންފާ ހޯދަމުންދާ ކަމުގެ މައުލޫމާތު ލިބުމާއި ގުޅިގެން އެ މައްސަލަ ތަހުގީގު ކުރަމުންދާ ކަމަށެވެ.

މި މައްސަލައާ ގުޅިގެން މިރޭ އޮޕަރޭޝަނެއް ހިންގާފައިވާ ކަމަަށް ވެސް ބުންޏެވެ. އަދި ގެއެއް ބަލާ ފާސްކޮށް ތިން މީހަކު ހައްޔަރު ކޮށްފައިވާ ކަމަށް ފުލުހުން ބުންޏެވެ.

އަދި ބުނީ މި މައްސަލައިގެ ތަހުގީގު ކުރިއަށްދާ މިންވަރަކުން މައްސަލައާ ގުޅޭ އިތުރު ތަފްސީލު ހާމަ ކުރާނެ ކަމަށެވެ.

ކޮންޓްރޯލާ ޖެނެރަލް އޮފް އިމިގްރޭޝަނުގެ މަގާމަށް ޝަމްއާން އައްޔަންކުރެއްވީ ނޮވެންބަރު 19، 2023 ގަ އެވެ. ޝަމްއާން ފާހަގަ ކުރެވުނީ ވަރަށް އެކްޓިވް ހިންގުންތެރި ވެރިއެއްގެ ގޮތުގަ އެވެ.

ބިދޭސީންގެ މައްސަލަ ހައްލު ކުރުމަށް ރައީސް މުއިއްޒުގެ އިރުޝާދުގެ ދަށުން ފެށި މަސައްކަތަށް އާންމުންގެ ވަރަށް ބޮޑު ތައުރީފެއް ޝަމްއާންއާ އިމިގްރޭޝަނަށް އޮތެވެ.