އީމާންކަމާ އެކު، ދަރުމައާއި ސަވާބަށް އެދި، ލައިލަތުލްޤަދުރި ވިލޭރޭ، އަޅުކަންކުރި މީހުންގެ ފާފަތައް މާތް الله ފުއްސަވައިދެއްވާނެ ކަމަށް މިއަދުގެ ހުކުރު ޚުތުބާގައި ބުނެފިއެވެ. 

ލައިލަތުލް ޤަދްރި ވިލޭރޭގެ މާތްކަމުގެ މައްޗަށް އަލިއަޅުވާލައި މިއަދު އިއްވި ހުކުރު ޚުތުބާގައި ބުނީ، މިއަދުގެ ހުކުރު ޚުޠުބާގައި ޚަޠީބު ވިދާޅުވީ ރަމަޟާން މަހުގެ ފަހު ދިހައިގައި ކީރިތި ރަސޫލާ ޞައްލަالله ޢަލައިހި ވަސައްލަމަ ރޭ އަޅުކަމުގައި ގިނަ ވަގުތު ހޭދަކުރެއްވި ކަމަށެވެ. އަދި ލައިލަތުލް ޤަދުރި ހޯދުމަށް މަސައްކަތް ކުރުމަށް އެކަލޭގެފާނު އަމުރުކުރެއްވި ކަމަށް ވިދާޅުވިއެވެ

"ލައިލަތުލް ޤަދުރިއަކީ އެއް ހާސް މައްސަރަށް ވުރެ ހެޔޮކަން ބޮޑު ރެއެކެވެ. އެ ރޭ ކުރާ ހެޔޮ ޢަމަލުގެ ދަރުމަ އެއް ހާސް މައްސަރުގައި ކުރާ ހެޔޮ ޢަމަލަށް ވުރެ މަތިވެރި ކުރައްވާފައިވެއެވެ," ޚަޠީބު ވިދާޅުވިއެވެ.

އީމާންކަމާއެކު ދަރުމައަށް އެދި އެ ރޭ އަޅުކަން ކުރާ މީހުންގެ ފާފަތައް ފުއްސަވައިދެއްވާނެ ކަމަށް ޚަޠީބު ވިދާޅުވިއެވެ.

މާތްނަބިއްޔާ ޞައްލަالله ޢަލައިހި ވަސައްލަމް ޙަދީޘްކުރައްވައިފައި ވެއެވެ. (مَنْ قَامَ لَيْلَةَ الْقَدْرِ إِيْـمَانًا وَاحْتِسَابًا، غُفِرَ لَهُ مَا تَقَدَّمَ مِنْ ذَنْبِهِ).

މާނައީ: "ފުރިހަމަ އީމާންކަމާ އެކު، ސަވާބަށް އެދޭ ޙާލު، ލައިލަތުލްޤަދުރި ވިލޭރޭ އަޅުކަމުގައި ދެމިހުރެއްޖެ މީހާ ދަންނާށެވެ! ފަހެ، ހަމަކަށަވަރުން، އޭނާގެ އިސްވެ ދިޔަ ފާފަތައް ފުއްސެވޭހުއްޓެވެ."

މިއާއެކު އެ ރޭ ކުރުމަށް ކީރިތި ރަސޫލާ އުގަންނަވައިދެއްވި ދުޢާ ޚުތުބާގައި ކިޔައިދީފައިވެއެވެ.

އެ ރޭ ކުރައްވާނީ ކޮން ދުޢާއެއްތޯ މާތް ނަބިއްޔާ ޞޢވ އަރިހުގައި أُمُّ الْمُؤْمِنِيْنَ عَائِشَةَ رَضِيَ اللَّهُ عَنْهَا ސުވާލު ދެންނެވިއެވެ. އެ ހިނދު އިތުރު އެކަލޭގެފާނު ޙަދީޘްކުރެއްވިއެވެ. "ކަމަނާ މިހެން ވިދާޅުވާށެވެ! (اَللّٰهُمَّ إِنَّكَ عَفُوٌّ تُـحِبُّ الْعَفْوَ فَاعْفُ عَنِّي) މާނައީ: "އަޅުގެވެރިރަސްކަލާކޯއެވެ! ހަމަކަށަވަރުން، އިބަރަސްކަލާނގެއީ، ގިނަގިނައިން ޢަފޫކުރައްވާ، ފާފަފުއްސަވާ، އަދި ޢަފޫކުރެއްވުމަށް ލޯބިވެވޮޑިގަންނަވާ ރަސްކަލާނގެއީމުއެވެ. ފަހެ، މި އަޅާއަށް ޢަފޫކުރައްވައި މި އަޅާގެ ފާފަ ފުއްސަވާނދޭވެ!"

ޚުތުބާގައި ވަނީ މި މާތް ދުޢާ، މި މަހުގެ ބާކީ އޮތް ދުވަސްތަކާއި ރޭތަކުގައި ތަކުރާރުކޮށް މި ބަރަކާތްތެރި ދުވަސްތަކާއި ރޭތަކުގައި ހީވާގިވެ ހެޔޮ ޢަމަލުކުރުމުގައި ދެމިތިބުމަށް ނަޞޭހަތްތެރިވެފައެވެ. 

މީގެ އިތުރުން، ރަމަޟާން މަހުގެ ފަހު ދިހައިގައި އިޢުތިކާފަށް އިނުމަކީ ގަދަވެގެންވާ ސުންނަތެއް ކަމަށާއި، އިޢުތިކާފަށް އިންނަ މީހާ ބޭކާރު ކަންތަކުން ދުރުހެލިވެ، އަޅުކަމާއި ޤުރުއާން ކިޔެވުމާއި ޛިކުރުގައި ވަގުތު ހޭދަކުރަންވާނެ ކަމަށް ޚުތުބާގައި ބުންޏެވެ. 

ޚުޠުބާ ނިންމާލަމުން ވަނީ ފިޠުރު ޒަކާތް ނެރުމަށް އަވަސްވުމަށް ގޮވާލާފައެވެ. އެހެނީ، ފިޠުރު ޒަކާތަކީ ރޯދަ މަހު ހިފި ރޯދަތަކުގައި ހުރި އުނިކަން ފޫބައްދައިދޭ ކަމެއް ކަމަށާއި، ޢީދު ނަމާދުގެ ކުރިން މި ޒަކާތް ނެރެންޖެހޭ ކަމަށް ހުތުބާގައި ބުންޏެވެ.