މިއަދު ސޯޝަލް މީޑިއާގައި އެންމެ ވަރަށް ބޮޑަށް ވައިރަލްވި އެއް ވީޑިއޯ އަކީ ދިވެއްސަކު މަގުމަތީ އުޅޭ ވީޑިއޯ އެކެވެ. ބައެއް ޕޭޖު ތަކުން އެ ވީޑިއޯ ހިއްސާކުރުމުން ވަރަށް ބޮޑަށް ވައިރަލްވި އެވެ. ވީޑިއޯގައި ޒުވާނާ ފެންނަނީ ވަރަށް ނިކަމެތި ހާލަތެއްގައި ވަނިކޮށެވެ.

ކާރޫބާރު ބޮޑު މަގުގައި އެ ޒުވާނާ ހުރިއިރު އޭރު އެ ހުރެވުނީ ކޮންތާކު ކަމެއް ވެސް ނޭންގެ އެވެ. ވަރަށް ގިނަ ބަޔަކު އެ ވީޑިއޯއަށް ކޮމެންޓް ކޮށްފައި ވެ އެވެ. ވަރަށް ގިނަ ބަޔަކު އެ ވީޑިއޯ ޝެއާ ކުރި އެވެ. އެ މީހަކަށް ފެނުނު ކޮމެންޓެއް ކޮށްފައި ހުއްޓެވެ.

ނަމަވެސް އެ ވީޑިއޯ ހިއްސާކޮށް އެ ވީޑިއޯއާ ގުޅޭގޮތުން އެކި ކޮމެންޓްތައް ކޮށްފައިވާ މީހުންނަށް ނޭންގި އޮތް ކަމަކީ މިހާރު އޭނާވީ ތަނެވެ. ވީޑިއޯގައި ފެންނަނީ އުމުރުން 41 އަހަރުގެ މީހެކެވެ. މާލެއަށް ނިސްބަތްވާ މީހެކެވެ.

އެ ވީޑިއޯ މިއަދު އާންމުވެ އެންމެ ބޮޑަށް ވައިރަލްވީ ވަގުތަކީ އެ ޒުވާނާ ނިޔާވި ވަގުތެވެ. ޒުވާނާގެ ޖަނާޒާ މިރޭ ވަނީ ބާއްވާފަ އެވެ. ޖަނާޒާ އޮތީ ތަރާވީހު ނަމާދަށް ފަހު އާސަހާރާ މިސްކިތުގަ އެވެ.

ވީޑިއޯ ވައިރަލްވުމުން އާއިލާ އިން ވަނީ އެކަން މީޑިއާތަކަށް ހިއްސާކޮށްފަ އެވެ. އަދި އެ ވީޑިއޯ ނުފެތުރުމަށް އާންމުންގެ ކިބައިން އާއިލާ އިން އެދެ އެވެ.

މީހުންގެ ޢައިބުތައް ހާމަކޮށް ފަލީހަތް ކުރުމަކީ އިސްލާމް ދީނުގައި ވަރަށް ބޮޑަށް މަނާކުރައްވާފައިވާ ކަމެކެވެ.

ބައެއް ޢިލްމުވެރީން ވިދާޅުވާ ގޮތުގައި އެއީ ވަރަށް ބޮޑު ފާފަ އެކެވެ. އަދި އެއީ ވަރަށް ނުރައްކާތެރި ކަމެކެވެ. އެކަމުގެ ސަބަބުން މުޖްތަމައުގައި ބައިބައިވުމާއި ނަފްރަތު އުފައްދާ ކަމެކެވެ.

ދުނިޔެ މަތީގައި މީހެއްގެ އައިބު ފޮރުވުމަކީ ވަރަށް ބޮޑު ދަރުމަ ހުރި ކަމެކެވެ. އިލްމުވެރީން ވިދާޅުވާ ގޮތުގައި ދުނިޔެ މަތީގައި މީހެއްގެ އައިބު ފޮރުވައިފި މީހަކަށް މާތްރަސްކަލާންގެ ގިޔާމަތް ދުވަހު އޭނާގެ އައިބު ފޮރުވައި ދެއްވާނެ އެވެ.

މީހުން ފަލީހަތް ކުރުމާއި މީހުން ލަދުގަންނަ ކަހަލަ ވީޑިއޯތައް އާންމު ކުރުމަކީ ދިވެހި މުޖްތަމައުގައި މިއަދު ވަރަށް އާންމުވެފައިވާ ކަމެކެވެ.

ބައެއް މީހުން އެކަން ކުރަނީ އެ މީހުން ހިންގާ ސޯޝަލް މީޑިއާގެ ޕޭޖުތައް ހިންގާށެވެ. ގިނަ ލައިކްސް ހޯދާށެވެ. މީހުންގެ ސަމާލުކަން ހޯދާށެވެ. ނަމަވެސް މިއީ އާދައިގެ ކަމެއް ކަމަށް ދެކި ކުރަން ހެޔޮވާވަރު ކަމެއް ނޫނެވެ.

މާދަމާ ތިމާއާ ވެސް މިފަދަ ހާލަތެއް ކުރިމަތިވެދާނެ އެވެ. އާއިލާ މީހަކަށް ވެސް ކުރިމަތިވެދާނެ އެވެ. އެ ދުވަހަކުން މިކަމުގެ ނުރައްކާތެރި ކަމާއި ހިތިކަން އިހުސާސު ކުރެވޭނެ އެވެ.

މިއީ ނުބައި ވަބާ މުޖްތަމައުން ފުހެލާން މަސައްކަތް ފަށަން ރަނގަޅު ވަގުތެކެވެ. މި ނުބައި އާދަ ދޫކޮށްލާ ހެއްޔެވެ.