ޚިދުމަތް ދިނުމުގައި އިހުމާލުވި މައްސަލާގައި ތެލެސީމިއާ ސެންޓަރުގެ ބައެއް އިސްވެރިން މަގާމުން ވަކިކޮށްފިއެވެ.
އެގޮތުން މަގާމުން ވަކި ކޮށްފައިވަނީ، ތެލެސީމިއާ ސެންޓަރުގެ ޑިރެކްޓަރ އަހްސަން ހުސައިން އާއި، ބްލަޑް ބޭންކުގެ ޕަބްލިކް ހެލްތު ކޯޑިނޭޓަރ ފައިޞަލް އިބްރާހީމެވެ. އެމީހުން މަގާމުން ވަކިކުރީ އިއްޔެގެ ވަގުތެއްގައެވެ.
ތެލެސީމިއާ ކުދިންނަށް ލޭ ލިބުމުގައި ދިމާވާ މައްސަލަތަކާއި ފިލްޓަރުތަކުގައި މައްސަލަތަކެއް ހުރި ކަމަށް ބުނެ އެ ކުދިންގެ އާއިލާތަކުން އިހަށްރޭ މުޒާހަރާކޮށްފައިވެއެވެ. އެ މުޒާހަރާގައި ޢާއިލާތަކުން ވަނީ މި މައްސަލަތަކަށް އަވަސް ހައްލެއް ހޯދައިދިނުމަށް ގޮވާލާފައެވެ. އަދި ބްލަޑް ބޭންކުގެ ވެރިންގެ އިސްތިއުފާއަށްވެސް ވަނީ ގޮވާލާފައެވެ.
އެއާއެކު ރައީސް މުޢިއްޒު ވަނީ ޖެހިގެން އައިދުވަހުގެ ހެނދުނުގެ ވަގުތެއްގައި އެ ސެންޓަރަށް ވަޑައިގެން، ތަނުގެ ހާލަތު ގާތުން ބައްލަވާފައެވެ. އެފަހުން ދެއްވި ބަސްދީގަތުމެއްގައި އެމަނިކުފާނު ވަނީ، ސެންޓަރާއި ގުޅިގެން ކަންބޮޑުވުންތައް ފާޅުކޮށް އާއިލާތަކުން ސެންޓަރޔގެ ވެރިންނަށް ސިޓީ ފޮނުއްވާފައި ވީ ނަމަވެސް، އެމަނުކުފާނާއި ހަމައަށް އެކަމުގެ ޚަބަރު ނާންނަކަން ފާހަގަކުރައްވާފައެވެ.
އަދި ތެލެސީމިއާ ސެންޓަރުގެ މައްސަލަތަކާއި ގުޅޭގޮތުން ވަރަށް ތަފްސީލީ މަޝްވަރާ ބައްދަލުވުމެއް މިއަދު ބާއްވާފައިވާ ކަމަށާ އެ ބައްދަލުވުނުގައި މުހިންމު ގިނަކަންތައްތަކެއް ކުރިއަށް ގެންދާނެ ގޮތުގެ އިރުޝާދު އެމަނިކުފާނު ދެއްވާފައިވާނެ ކަމަށް ވެސް ވިދާޅުވުއެވެ.
”އެތަން ހިންގަން ހިންގަން ޑިރެކްޓަރ ޖެނެރަލްއެއް ނުލައި 2017 ވަނަ އަހަރުން ފެށިގެން އަންނަ ކަމަށްވަނީ. އެކަން ވަގުތުން ހައްލު ކުރެވޭނެ ގޮތެއް އަޅުގަނޑުވާނީ ދަންނަވާފައި. ހަމައެއާއެކު ނަރުހުން މަދުވާހަކަ އާއި، ނަރުހުން ހޯދޭނެ ގޮތާއު، ސީނިއާ ފިޒިޝަނެއް ހަމަޖެއްސުމަށް، ތަނަށް ބޭނުންވާ އެކިކަހަލަ އާލާތްތައް ހޯދޭނެ ގޮތް. ލެބޯޓްރީއަށް ބޭނުންވާ ވަސީލަތްތައް، އެކި މުވައްޒަފުން، ލެބޯރަޓަރީ ޓެކްނޮލޮޖިސްޓުންނާއި، މިހެންގޮސް ބޭނުންވާ މުވަްްޒަފުން ހޯދުމަށާ، އަދި މަސައްކަތް ކުރާނެ ގަޑިވެސް، ހޮސްޕިޓަލެއްގަ މަސައްކަތް ކުރާ ގޮތަށް ގަޑިތައް އިތުރުކުރުމަށް ބޭނުންވާ ހިޔުމަންރިސޯސް އިތުރުކުރުމަށް. މިހުރިހާ ކަމެއް މިއަދު މަޝްވަރާކޮށް ކުރިއަށް ގެންދާނެ ގޮތް އަޅުގަނޑުވާނީ ދަންނަވާފައި،“ ރައީސް މުޢިއްޒު ވިދާޅުވިއެވެ.
މިއާއެކު ރައީސް ވިދާޅުވީ، މި މަޝްވަރާ ބައްދަލުވުމުގައި ފިނޭންސް މިނިސްޓަރވެސް ބައިވެރިވެވަޑައިގެންނެވި ކަމަށާ، ސެންޓަރުގެ ކަންކަމަށް ބޭނުންވާ ފައިސާ ހަމަޖެއްސުމުގައި އެއްވެސް ދަތިކަމެއް ނޫނީ ހުރަހެއް ނެތް ކަން ޔަގީން ކުރުމަށް މިނިސްޓަރަށް ދެންނެވިކަމަށެވެ. އަދި ސެންޓަރުގެ ކަންކަން ކުރިއަށް ގެންދަވާނެ މުހުލަތުތަކެއްވެސް ދެއްވާފައިވާނެ ކަމަށް ވިދާޅުވުއެވެ.
”ކުރިއަށް އޮތް ދުވަސްތަކުގައި ތެލެސީމިއާ ކަންތަކުގައި މި ދިމާވާ ހުރިހާ ކަމެއްގައި ރަނގަޅު ހައްލުތަކެއް ގެނެސްދޭނަން. ފައިސާގެ ގޮތުން ދަތިތަކެއް ވެގެން ކަމެއް ހައްލުނުވެ ނޯންނާނެކަން އަޅުގަނޑު ސީދާ ޔަގީންކުރާނަން. އެކަން އަޅުގަނޑުވާނީ ޔަގީންކޮށްފައި. ތެލެސީމިއާ ކުދިންނަށް ދިމާވާ ކަންކަން ހައްލުކުރުމުގައި ސީދާ އަޅުގަނޑުގެ ބެލުމުގެ ދަށުންމިކަންކަން ކުރިއަށް ގެންދާނަން.” ރައީސް މުޢިއްޒު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
