އިންޑިއާއިން ފިޔާ އެކްސްޕޯޓްކުރުމަށް ނަގަމުން އައި 20 އިންސައްތަ އެކްސްޕޯޓް ކަނޑާލަން ނިންމައިފިއެވެ.

އިންޑިއާ ސަރުކާރުން ނިންމާފައިވަނީ އެޕްރީލް މަހުގެ ފުރަތަމަ ދުވަހުން ފެށިގެން އެކްސްޕޯޓް ޑިއުޓީ ކަނޑާލުމަށެވެ. ފިޔާ އެކްސްޕޯޓް ޑިއުޓީ ކަނޑާލަން ނިންމީ ފިޔާ ބޭރުކުރުން މަނާކޮށްފައިވާ ދުވަސްވަރަކަށް ފަހުއެވެ.

އިންޑިއާގެ ޑޮމެސްޓިކް މާކެޓަށް ބޭނުންވާ މިންވަރަށް ފިޔާ ލިބޭކަން ކަށަވަރުކުރުމަށް ދޭތެރެ ދޭތެރެއިން އެގައުމުން ފިޔާ ބޭރުކުރާ މިންވަރު ކޮންޓްރޯލްކޮށް، ބައެއް ފަހަރު މަނާކުރެއެވެ. މިދިޔަ ފަސް މަސް ދުވަހު އިންޑިއާއިން ފިޔާ އެކްސްޕޯޓްކުރުން ވަރަށް ބޮޑަށް ކޮންޓްރޯލްކުރިއެވެ. އެގޮތުން އެކްސްޕޯޓްކުރުމުގައި ފިޔާ ވިއްކަން ޖެހޭ އެންމެ ދަށް އަގުވެސް ސަރުކާރުން ކަނޑައެޅިއެވެ.

މިމަހުގެ ނިޔަލަށް ނަގަމުން އަންނަ 20 އިންސައްތައިގެ އެކްސްޕޯޓް ޑިއުޓީ ނަގަން ފެށީ މިދިޔަ އަހަރުގެ ސެޕްޓެމްބަރު މަހުގެ 13 ވަނަ ދުވަހުން ފެށިގެންނެވެ.އިންޑިއާ ސަރުކާރުން ބުނީ ފިޔާ އެކްސްޕޯޓްކުރުމުގައި ހިފެހެއްޓުންތަކެއް ގެންގުޅެނީ ދަނޑުވެރިންނަށް އެކަށީގެންވާ އާމްދަނީއެއް ލިބޭކަން ކަށަވަރުކޮށް، ބާޒާރުގައި ފިޔާ އަގު ބޮޑުވިޔަ ނުދިނުމަށެވެ.

ދުނިޔޭގެ ބާޒާރަށް އެންމެ ގިނައިން ފިޔާ ބޭރުކުރާ އެއް ގައުމަކީ އިންޑިއާއެވެ.