ހއ ގެ ހުރިހާ ރަށެއްގައި އޭޓީއެމް ބަހައްޓާ ޚިދުމަތް ދޭން މިއަދު ފަށައިފި އެވެ.
މިއަދާ ހަމައަށް ހއ ގައި އޭޓީއެމްގެ ޚިދުމަތް ނުލިބޭ އޮތީ ހަތް ރަށެކެވެ. ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިދިޔަ ޖަނަވަރީ ގައި ހއ އަތޮޅުގެ ރަށްތަކަށް ކުރެއްވި ދަތުރުފުޅުގައި ވަނީ މި ރަށްރަށުގައި އޭޓީއެމް ބެހެއްޓުމުގެ މަޝްރޫއު ފައްޓަވައި ދެއްވާފަ އެވެ.
އެ މަޝްރޫއު ފެއްޓެވިތާ ދޮޅު މަހެއްހާ ދުވަހުގެ ތެރޭގައި ހަތް ރަށުގައި ވަނީ އޭޓީއެމް ބަހައްޓާފަ އެވެ. އެއީ ހއ. އުލިގަމާއި ތުރާކުނާއި އުތީމާއި މޮޅަދޫގެ އިތުރުން އެ އަތޮޅު ތަކަންދޫ އާއި މާރަންދޫ އަދި މުރައިދޫ ގަ އެވެ. މި ރަށްރަށު ގައި ބެހެއްޓި އޭޓީއެމްތައް އިފްތިތާޙުކޮށް މިއަދު ވަނީ ޚިދުމަތް ދޭން ފަށާފަ އެވެ.
އެއާއެކު ހއ އަތޮޅުގެ ހުރިހާ ރަށެއްގައި އޭޓީއެމްގެ ޚިދުމަތް ފެށި މިއަދަކީ އެ އަތޮޅަށް ތާރީޚީ ދުވަހަކަށް ވަނީ ވެފަ އެވެ.
މި އަހަރު ނިމުމުގެ ކުރީން ރާއްޖޭގެ ހުރިހާ ރަށެއްގައި އޭޓީއެމް ބަހައްޓާ ޚިދުމަތް ފެށުމަކީ ރައީސް މުޢިއްޒުގެ ވައުދުފުޅެކެވެ.
Advertisement
This content is created and paid for by advertisers and does not involve Voice Journalists
