ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސިޔާސަތަކީ ކުޑަރަށެއް ބޮޑުރަށެއް ނުބަލައި ވަސީލަތްތައް ޤާއިމްކޮށްދިނުން ކަމަށް އިގްތިސާދީ ވަޒީރު މުހައްމަދު ސައީދު ވިދާޅުވެއްޖެއެވެ.

އުތުރުގެ ބައެއް ރަށްތަކުގައި އޭޓީއެމްގެ ހިދުމަތް ފެށުމަށްޓަކައި ހއ އަތޮޅަށް ކުރެއްވި ދަތުރުފުޅުގައި މިއަދު ހއ.އުތީމުގައި ބީއެމްއެލްގެ އޭޓިއެމްގެ ހިދުމަތް ފައްޓަވައިދެއްވުމުގެ ގޮތުން ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ސައީދު ވިދާޅުވީ، މި ސަރުކާރު ވެރިކަމާ ހަވާލުވިއިރު ޤައުމުގެ ކަންކަން އޮތީ ފާލުން ނެއްޓި ދަރަނީގެ ދަންތުރައެއްގައި ޖެހިފައި ކަމަށެވެ. ޤައުމުގެ ކަންކަން ހަމަމަގަށް އެޅުވުމަށް ރައީސް ކުރައްވަމުންގެންދަވާ މަސައްކަތްތައް ފާހަގަކުރައްވަމުން ސައީދު ވިދާޅުވީ، ޤައުމު ބަނގުރޫޓު ވިޔަނުދިނުމަށް ރައީސް ޑރ.މުއިއްޒުގެ އިރުޝާދުގެ ދަށުން މިދިޔަ ދުވަސްތަކުގައި ގިނަ މަސައްކަތްތަކެއް ކުރެވިގެން ގޮސްފައިވާކަމަށެވެ.

އެގޮތުން ރައްޔިތުންގެ މުހުތާދުތަށް ފުއްދައިދިނުމަށް ސަރުކާރުގެ ސިޔާސަތު އޮތްގޮތް ވިދާޅުވެދެއްވަމުން މިނިސްޓަރު ސައީދު ވިދާޅުވީ ސަރުކާރުން ގެންދަނީ ކުޑަރަށެއް ބޮޑުރަށެއް ތަފާތުކުރުމެއްނެތި ރަށްރަށުގައި ރައްޔިތުންގެ ފުދުންތެރިކަމަށް ބޭނުންވާ ވަސީލަތްތައް ޤާއިމްކޮށްދެމުންކަމަށެވެ.

މިގޮތުން އޭޓިއެމް ހިދުމަތަކީވެސް މި ބީދައިން ކުރެވޭ ކަމެއްކަން ފާހަގަކުރައްވަމުން މިނިސްޓަރު ވިދާޅުވީ، އޭޓީއެމް ބެހެއްޓޭނެކަން ގިނަ ބަޔަކު ޤަބޫލުނުކުރާ ކަމަށެވެ. ނަމަވެސް އޭޓީއެމް ބެހެއްޓުމަށް ރައީސް ވެވަޑައިގެންނެވި ވައުދު މިއަދު ފުއްދަވާފައިވާކަމަށް މިނިސްޓަރު ވިދާޅުވިއެވެ. 

ހއ އުތީމުގައި ބެހެއްޓުނު އޭޓީއެމްގެ ހިދުމަތަށް އިޝާރަތްކުރައްވައި މިނިސްޓަރު ސައީދު ވިދާޅުވީ، ކުޑަރަށެއް ބޮޑުރަށެއް ބާކީނުވެ، ރައްޔިތުންނާއި ގާތުން ބޭންކުގެ ޚިދުމަތް ލިބުމަކީ ރައްޔިތުންނަށް ލިބިގެންދިޔަ ބޮޑު ލުއިފަސޭހަކަމެއް ކަމަށެވެ.

އަދުގެ ސަރުކާރުގެ ވައުދަކީ މިއަހަރު ނިމޭއިރު މުޅި ރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމްގެ ހިދުމަތް ޤާއިމްކުރުމެވެ.