ޔުއެފާ ވޯލަޑްކަޕް ކޮލިފައިން ގުރޫޕް ކޭގައި ހޯމަ ދުވަހުގެ އަމިއްލަ ދަނޑުގައި ފަސޭހަކަމާއެކު 3-0 ގެ ނަތީޖާއަކުން ލެޓްވިއާ ބަލިކޮށް އިންގްލޭޑުން ގުރޫޕްގެ އެއްވަނައަށް ކުރިއަށްޖެހިލައިފިއެވެ.

މިއީ އިނގިރޭސި ގައުމީ ޓީމައި ތޯމަސް ޓުޗެލް ހަވާލުވިފަހުން އެޓީމު ޖެހިޖެހިގެން މޮޅުވި ދެވަނަ މެޗެވެ. އަދި އެޓީމު އެންމެ ފަހުން ކުޅުނު އަލްބޭނިއާ އަތުން 2-0 ގެ ނަތީޖާއަކުން މޮޅުވެފައިވާއިރު، ލެޓްވިއާ އެންމެ ފަހުން ކުޅުނު މެޗުގައި އެޓީމުން ވަނީ 1-0 ގެ ނަތީޖާއަކުން އެންޑޯރާ ބަލިކޮށްފައެވެ.

މެޗުގެ ފުރަތަމަ ހާފުގައި އިންގްލޭންޑުން ލެޓްވިއާގެ ގޯލަށް 17 ހަމަލާއެއް ފޮނުވާލި ނަމަވެސް އެޓީމަށް މިހާފުގައި ކާމިޔާބުކުރެވުނީ އެންމެ ލަނޑެކެވެ. މިލަނޑު ފުރަތަމަ ހާފުގެ 38 ވަނަ މިނެޓުގައި އެޓީމަށް ކާމިޔާބުކޮށްދިނީ ޑިފެންޑަރު ރީސް ޖޭމްސްއެވެ.

އިންގްލޭންޑުން ލީޑުފުޅާކުރި ލަނޑު ފަހުހާފުގެ 68 ވަނަ މިނެޓުގައި ކެޕްޓަން ހެރީ ކޭން ކާމިޔާބުކުރިއިރު، އެޓީމުގެ ތިންވަނަ ލަނޑު 76 ވަނަ މިނެޓުގައި ކާމިޔާބުކޮށްދިނީ ކްރިސްޓަލް ޕެލެސްގެ މިޑްފީލްޑަރު އެބެރެޗީ އެޒޭ އެވެ.

މިނަތީޖާއެކު ގުރޫޕް ސްޓޭޖުގައި ކުޅުނު ދެމެޗުން ވެސް މޮޅުވެ ހަ ޕޮއިންޓާއެކު ގުރޫޕްގެ އެއްވަނައިގައި އިންގްލޭންޑް މިވަގުތު އޮތްއިރު، މިމެޗުން ބަލިވި ލެޓްވިއާ ކުޅުނު ދެމެޗުން ލިބުނު ތިން ޕޮއިންޓާއެކު ލަނޑުގެ ތަފާތުން އެޓީމު މިވަގުތު އޮތީ ގުރޫޕްގެ ތިންވަނައިގައެވެ. އަދި މިދެޓީމުގެ އިތުރުން މިގުރޫޕްގައި ދެންހިމެނެނީ އަލްބޭނިއާ، ސާބިއާ އަދި އެންޑޯރާ އެވެ.