ޤާނޫނު އަސާސީން ލިބިދޭ ހާއްސަ ރައްކާތެރިކަން ބޭނުންވާ ކުދިންނަށް ހަޖޫޖަހައި، ޓީވީތަކުން ކޮންޓަންޓް ގެނެސްދޭނަމަ، ލައިސަންސް ބާތިލްކުރަންޖެހިދާނެކަމުގެ އިންޒާރު، ބްރޯޑްކާސްޓިން ކޮމިޝަނުން ދީފިއެވެ.

ރާއްޖެ ޓީވީން ގެނެސްދިން ޕްރޮގްރާމެއްގައި ވާހަކަ ދައްކަވަމުން ރައްޔިތުން މަޖިލީހުގެ ނޮޅިވަރަމް ދާއިރާގެ ކުރީގެ މެންބަރު މުހައްމަދު ނަޝީދު އަބްދުالله (މޮސްޓާ) އާއި ކުރީގެ ކާނަލް އަހުމަދު ފަޔާޒް އަލީ ރިޒާ (ޕާޕާ ފަޔާޒް)، ވަނީ ސިޔާސީ ކަންކަމާއި ޑައުންސިންޑްރޯމް އަދި އޯޓިޒަމް ކުދިންގެ ޙާލަތާއި ގުޅުވައިގެން މިސާލު ޖައްސަވާފައެވެ.

މިކަމާ ގުޅިގެން ޓީވީތަކުގެ ބަލަދުވެރިފަރާތް ބްރޯޑްކާސްޓިން ކޮމިޝަނުން މިއަދު ނެރުނު ބަޔާނެއްގައި ބުނެފައިވަނީ، ޤާނޫނު އަސާސީގެ 35 ވަނަ މާއްދާއިން ހާއްސަ ރައްކާތެރިކަން ލިބިދޭ ފަރާތްތަކާއި ގުޅޭގޮތުން ކޮންޓެންޓް ގެނެސްދޭނަމަ، ހަމަޖެހިފައިވާ އުސޫލުން ޤަނޫނުން ޖާގަދޭ އެންމެ ހަރުކަށި ފިޔަވަޅު އަޅާނޭކަމަށެވެ. ބްރޯޑްކާސްޓިންގައި އެންމެ ހަރުކަށި އަދަބެއްގެ ގޮތުގައި އޮންނަނީ ޖޫރިމަނާކޮށް އެތަނެއްގެ ލައިސަންސް ބާތިލްކުރުމެވެ.  

ބްރޯޑްކޮމްއިން ބުނީ، ދިވެހި ޖުމްހޫރިއްޔާގެ ޤާނޫނު އަސާސީގައި ބަޔާންކޮށްފައިވާ ކުޑަކުދިންނާއި ޅަފުރައިގެ ކުދިންނާއި އުމުރުން ދުވަސްވީ މީހުންނާއި ހާއްސަ އެހީއަށް ބޭނުންވާ ހާއްސަ ރައްކާތެރިކަން އަދި ބްރޯޑްކާސްޓް ކުރުމުގެ ޤަނޫނުގައި ބަޔާންކޮށްފައިވާ ކޯޑް އޮފް ޕްރެކްޓިސްއާ ގައިޑްލައިންތަކާ ތައާރަޒްވާ ކޮންޓެންޓް ގެނެސްދިންކަމުގެ މައުލޫމާތު އެ ކޮމިޝަަނުގެ ސަމާލުކަމަށް އަައިސްފައިވާކަމަށެވެ. މިފަދަ ކޮންޓެންޓް ތަހުގީގުކޮށް އެކަންކަން ރަނގަޅުކުރުމަށް ކުރަންޖެހޭ އެންމެހާ ކަންކަން ކުރުމުގެ ފުރިހަމަ އިހްތިސާސް ކޮމިޝަނަށް ލިބިގެންވާކަން ފާހަގަކުރަމުން އެ ކޮމިޝަނުން ބުނީ، ހުށަހެޅޭ މިފަދަ ކޮންޓެންޓް ބަލައި ޤާނޫން ޖާގަދޭ އެންމެ ހަރުކަށި ފިޔަވަޅު އަޅާނޭކަމަށެވެ.

ބްރޯޑްކާސްޓިން ކޮމިޝަނުން ވަނީ ޤާނޫނުތަކަށް އިހްތިރާމްކޮށް އެއްވެސް ފަރާތެއްގެ އަބުރާއި ކަރާމާތް ނުގެއްލޭގޮތަށް ކޮންޓެންޓް އުފެއްދުމަށް ޓީވީތަކަށް އިލްތިމާސްކޮށްފައެވެ. 

ރާއްޖެޓީވީގެ ޕްރޮގްރާމްގައި މޮސްޓާ އަަދި ޕާޕާ ދެއްކި ވާހަކަަތަކަށް މީސްްްމީޑިއާގެ އެކި ވަސީލަތްތަކުގައި އެ ފަރާތްތަކަށް ބޮޑެތި ފާޑުކިއުންތަކެއް އަމާޒުވެފައިވާކަން ފާހަގަކޮށްލެވެއެވެ. އެ ޓީވީން ގެނެސްދިން ކާލާ ބައިސާ ޕްރޮގްރާމުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ނޫސްވެރިޔަކަށް ފޯނުން ގުޅުއްވާފައި އިންޒާރުދިން ވާހަކަ ދައްކަވައި ސަރުކާރަށް ފާޑުވިދާޅުވަމުން ޕާޕާ އެންމެ ފުރަތަމަ ވިދާޅުވީ، ރައީސް މުޢިއްޒު އެފަދައިން ކަން ކުރެއްވީ ގޮތް ހުސްވެގެން ކަމަށެވެ. އަދި ގޮތް ހުސްވުމުން މީހުން އަތުންފައިން ގޯސް ހަދާނެކަމަށް ވިދާޅުވެ، އެކަން ދެން ގުޅުވާލީ އޯޓިޒަމާއެވެ. 

"ގޮތް ހުސްވެ، ހަތަރު އުދަރެސް ފެނުޖެހުނީމާ އަތުންފައިން ގޯސް ހަދާނެ. އަސްލު މީނައަކީ (ރައީސް މުޢިއްޒަކީ) އޮޓިސްޓިކް ގޮތެއް ހުންނަ މީހެއްހެން ހީވަނީ އޮޕަރޭޓް ކުރާ ގޮތުން." ޕާޕާ ފަޔާޒު ވިދާޅުވިއެވެ.

އޭނާ މިހެން ވިދާޅުވުމުން މޮސްޓާ ވަނީ އެއަށް ބާރުދެއްވައި ޖޯކު ޖައްސަަވަމުން ރައީސްގެ "އޮޓިސްޓިކް އެކަންޏެއް ނޫން ޑައުންސިންޑްރޮމްވެސް ހުންނަހެން ހީވާ." ކަމަށް ވިދާޅުވެފައެވެ.