ރާއްޖެ ޓީވީގެ ”ކާލާ ބައިސާ“ ޕްރޮގްރާމްގައި ނުކުޅެދުންތެރިކަން ހުންނަ ފަރާތްތަކަށް ނިސްބަތްވާގޮތަށް ދެއްކި ވާހަކަތައް ހިއުމަން ރައިޓްސް ކޮމިޝަން އޮފް ދަ މޯލްޑިވްސް އިން ކުށްވެރިކޮށްފިއެވެ.

މިކަމާ ގުޅިގެން އެޗްއާރުސީއެމުން ނެރުނު ބަޔާނުގައި ބުނެފައިވަނީ، މިދިޔަ ހޮނިހިރުދުވަހުގެ ރޭ ރާއްޖެ ޓީވީގެ ”ކާލާ ބައިސާ“ ޕްރޮގްރާމްގައި ނުކުޅެދުންތެރިކަން ހުންނަ ފަރާތްތަކަށް ކުޑައިމީސްކޮށް ނުކުޅެދުންތެރިކަން ހުންނަ ފަރާތްތަކަކީ ދަށް ބައެއްގެ ގޮތަށް އަދި މަލާމާތް ރައްދުވާ މޭރުމަކުން ވާހަކަދައްކާފައިވާތީ އެކަން މި ކޮމިޝަނުން ކުށްވެރިކުރާ ކަމަށެވެ. އެޗްއާރުސީއެމުން ބުނީ،  މުޖުތަމައުގެ އެހެންމީހުންނެކޭ އެއްގޮތަށް ނުކުޅެދުންތެރިކަން ހުންނަ ފަރާތްތަކަށްވެސް އިންސާނީ ހައްޤުތައް އެއްހަމައެއްގައި ލިބިދީފައިވާކަމަށެވެ.

ކޮންމެ މީހަކަށްވެސް އަބުރުވެރިކަމާ ކަރާމާތްތެރިކަމާއެކު ދިރިއުޅުމުގެ ހައްޤު ލިބިދީފައިވާކަން ފާހަގަކުރަމުން އެޗްއާރުސީއެމުން ވަނީ  އެފަދަ އަމަލުތައް ނުކުރުމަށް ގޮވާލާފައެވެ. މީގެ އިތުރުން މީޑިއާތަކުން ކޮންޓަންޓް ގެނެސްދިނުމުގައި މުޖުތަމައުގެ އެއްވެސް ފަރުދެއްގެ އިންސާނީ ހަައްޤާއި އިންސާނީ ކަރާމާތަށް އުނިކަން ނާންނާނެފަދަ ގޮތަކަށް ގެނެސްދިނުމަށް ސަމާލުކަން ދިނުމަށް އެޗްއާރުސީއެމުން ވަނީ ހުރިހާ މީޑިއާތަކަށް ގޮވާލާފައެވެ.

މީގެ އިތުރުން އެޗްއާރުސީއެމުން ވަނީ މިފަދަ މައްސަލަތައް ބެލުމަށް ކަމާގުޅުންހުރި އިދާރާތަކަށް ގޮވާލާފައެވެ.

ރާއްޖެ ޓީވީ ޕްރޮގްރާމްގައި ހާއްސަ އެހީއަށްބޭނުންވާ ފަރާތްތަކަށް ނިސްބަތްކުރެވޭ ނަންތައް ބޭނުންކޮށްގެން ދެއްކި ވާހަކަތަކާ ގުޅިގެން ބްރޯޑްކާސްޓިން ކޮމިޝަނުންވެސް ވަނީ އެކަން ކުށްވެރިކޮށް، އެފަދަ ވާހަކަތައް ގެނެސްދޭނަމަ އެންމެ ހަރުކަށި ފިޔަވަޅު އަޅާނޭކަމުގެ އިންޒާރުދީފައެވެ.