ހދ.ކުޅުދުއްފުށީ ރީޖަނަލް ހޮސްޕިޓަލަށް ގިނަ އަދަދެއްގެ ސްޕެޝަލިސްޓް ޑޮކްޓަރުން ހޯދުމަށް އިއުލާނުކޮށްފިއެވެ.

ކުޅުދުއްފުށީ ހޮސްޕިޓަލުން ވަނީ މުހިންމު 5 ދާއިރާއަކުން ހާއްސަ ޑޮކްޓަރުން އެ ހޮސްޕިޓަލަށް ހޯދުމަށް އާއްމުކޮށް އިއުލާނުކޮށްފައެވެ. މީގެ ތެރޭގައި ހަމުގެ ހާއްސަ ޑޮކްޓަރުންނާއި، ލޮލުގެ ބަލިތަކަށް ހާއްސަ ޑޮކްޓަރުންގެ އިތުރުން، ކުޑަކުދިންގެ ހާއްސަ ޑޮކްޓަރުން ފާހަގަކޮށްލެވެއެވެ. 

ކުޅުދުއްފުށީ ރީޖަނަލް ހޮސްޕިޓަލުން ކޮށްފައިވާ އިއުލާނަށް ބަލާއިރު،އެ ހޮސްޕިޓަލަށް ކުޑަކުދިންގެ ހާއްސަ ދެ ޑޮކްޓަރުން ބޭނުންވާއިރު، އިތުރު ދާއިރާތަކަށް ޑޮކްޓަރުން ހޯދުމަށްވެސް ވަނީ އިއުލާނުކޮށްފައެވެ.

މަގާމުތަކަށް އެދުމުގެ ސުންގަޑިއަކީ އަންނަ އޭޕްރިލް މަހުގެ 10 ވަނަ ދުވަހެވެ.

މީގެ 42 އަހަރުކުރިން ވުޖޫދަށް އައި އެ ހޮސްޕިޓަލް، އިތުރަށް ބޮޑުކޮށް ދޭ ހިދުމަތްތައް މީގެ ދެއަހަރުކުރިން ފުޅާކުރިއިރު، ސަރުކާރުން މިހާރުވެސް އަންނަނީ އެ ހޮސްޕިޓަލުގެ ވަސީލަތްތައް ތަރައްޤީ ކުރުމުގެ މަސައްކަތް ކުރަމުންނެވެ.

މިގޮތުން މި ހޮސްޕިޓަލަކީ ސަރުކާރުން ޓާޝަރީ ފެންވަރަށް ތަރައްޤީ ކުރަމުންގެންދާ ހޮސްޕިޓަލެކެވެ. ކުޅުދުއްފުށީ ރީޖަނަލް ހޮސްޕިޓަލަކީ ރާއްޖޭގެ އުތުރުގައި ހުންނަ އެންމެބޮޑު ހޮސްޕިޓަލެވެ މި ހޮސްޕިޓަލަކީ ހދ.އަތޮޅުގެ އިތުރުން ވަރަށްގިނަ އަތޮޅުގެ މީހުން ފަރުވާ ހޯދުމަށް ޒިޔާރަތްކުރާ ހޮސްޕިޓަލެކެވެ.