މި އަހަރުގެ ފިތުރު އީދު ދުވަސްވާނީ މި މަހުގެ 31ވާ ހޯމަ ދުވަހަށް ކަމަށް ޢިލްމުވެރިޔާ ޑރ. ހަސަން ހަމީދު ވިދާޅުވެއްޖެ އެވެ.

ގައުމީ ޔުނިވާސިޓީގެ ޗާންސެލަރުކަން ވެސް ކުުރައްވާފައިވާ ޑރ. ހަސަން މިހެން ވިދާޅުވީ "އީދު ހަނދު ފެނުމާއި ރޯދަ މަހުގެ ހަނދު ސާބިތުވި ގޮތް" މި ނަމުގައި ލިޔުއްވާފައިވާ ލިޔުއްވުމެއްގަ އެވެ.

ހަސަން ވިދާޅުވީ މި އަހަރު ރޯދަމަހު ހަނދު ރާއްޖެއަކަށް ނުފެނުނު ކަމަށެވެ. އެއީ ވިއްސާރަކަމުން ވީކަމެއް ކަމަށް ބެލި ނަމަވެސް ތުއްތު ސާހިބުގެ ކްރައިޓީރިއާ އަކުން އެ ދުވަހު ރާއްޖެއަކަށް ހަނދެއް ނުފެންނާނެ ކަމަށް ވިދާޅުވި އެވެ. 1 މާޗް ރޯދަމަހުގެ ފުރަތަމަ ދުވަހަށް ދިވެހިރާއްޖެއަށް ވީ، ސައުދީ އެރެބިޔާއަށް ހަނދު ފެނިގެން ކަމަށް ވެސް ހަސަން ވިދާޅުވި އެވެ.

ފިތުރު އީދުގެ ހަނދު ފެންނަ ދުވަސް ބެލުމަށް އެންމެ ފުރަތަމަ ކުރަންޖެހޭނެ ކަމަކީ، އެ ހަނދު އުފަންވާ ވަގުތު ބެލުން ކަމަށް ވިދާޅުވެ މުޅި އޭޝިއާގެ ބައްރަށް 29 މާޗްގައި ހަނދެއް ނުފެންނާނެ ކަމަށް ވިދާޅުވި އެވެ. 

އެެހެން ކަމުން ޖެހިގެން އަންނަ ދުވަސް (30 މާޗު) އީދަށް ނުވާނެ ކަމަށާ ފިޠުރު ޢީދު ދުވަހަކަށް ވާނީ 31 މާޗް 2025 ވާ ހޯމަ ދުވަސް ކަމަށް ހަސަން ލިޔުއްވާފައިވެ އެވެ. މި ލިޔުއްވުމުގައި ވަަރަށް ތަފްސީލުކޮށް ސަބަބުތައް ބަޔާން ކޮށްދެއްވާފައިވެ އެވެ.

މާރިޗު 30 ވާ އާދީއްތަ ދުވަހަކީ މިއަހަރުގެ ފިޠުރު ޢީދު ދުވަހަށް ވާނެ ކަމަށް ވަރަށް ބޮޑަށް ޔަޤީން ކުރެވޭ ކަމަށް ދީނީ ޢިލްމުވެރިޔާ އަދި ކުރީގެ ރައީސް ޢަލްއުސްތާޛު މައުމޫން ޢަބްދުލްޤައްޔޫމް ވަނީ ވިދާޅުވެފަ އެވެ.

އެމަނިކުފާނު ވަނީ އެކަން ބަޔާންކުރައްވާ "އީދު ހަނދު" މި ނަމުގައި "ވޮއިސް" އަށް ޚާއްސަ އާޓިކަލެއް ލިޔުއްވާފަ އެވެ.

އެ ލިޔުއްވުމުގައި އެމަނިކުފާނު ވަނީ ސަޢޫދީ ޢަރަބިއްޔާ އާއި، މިޞުރާއި، ތުރުކީ އާއި، މޮރޮކޯ ފަދަ އިސްލާމީ ޤައުމުތަކަށް މި ހިނގާ މާރިޗު މަހުގެ 29 ދުވަހު  އިރުއޮއްސުމަށްފަހު، ހަނދު ނޯއްސި 8 މިނެޓާއި 20 މިނެޓާ ދެމެދުގެ މިންވަރަކަށް ހުންނާނެކަމަށް ފަލަކީ ހިސާބުން ދައްކާތީ، ޖެހިގެން އަންނަ ދުވަހަކީ (މާރިޗު 30 ވާ އާދީއްތަ ދުވަހަކީ) މިއަހަރުގެ ފިޠުރު ޢީދު ދުވަހަށް ވާނެ ކަމަށް ވަރަށް ބޮޑަށް ޔަޤީން ކުރެވޭ ކަމަށް ވިދާޅުވެފަ އެވެ.

ކުރީގެ ރައީސް ޢަލްއުސްތާޛު މައުމޫން ޢަބްދުލްޤައްޔޫމް

މާރިޗު މަހުގެ 29 ވަނަ ދުވަހަކީ ރަމަޟާން މަހުގެވެސް 29 ވަނަ ދުވަސް ކަމަށާ އެދުވަހު ދިވެހިރާއްޖެއަށް އިރުއޮއްސެނީ 18 ގަޑި 14 މިނެޓުގައެވެ. ހަނދު އޮއްސެނީވެސް، ހަމަ އެގަޑީގައި ކަމަށް ލިޔުއްވާފައިވެ އެވެ.

"އެހެންކަމުން، ވިދިގެން އަންނަ ދުވަހަކީ ދިވެހިރާއްޖެއަށް ފަލަކީގޮތުން ޝައްވާލު މަހުގެ 1 ވަނަ ދުވަސް ކަމަށް ވުމާއި ނުވުމާ މެދު ބަހުސެއް އޮތްނަމަވެސް، ވަރަށް ގިނަ އިސްލާމީ ޤައުމުތަކަށް އެދުވަހަކީ ޝައްވާލު މަހުގެ 1 ވަނަ ދުވަސް ކަމަށް ވާނެތީ، މާރިޗު މަހުގެ 30 ވަނަ ދުވަހަކީ، ރާއްޖެއަށް ވެސް ޝައްވާލު މަހުގެ 1 ވަނަ ދުވަސް ކަމުގައި ވާނެކަމަށް ފެނެއެވެ," މައުމޫން ލިޔުއްވާފައިވެ އެވެ.

އެއީ، ހަނދު ސާބިތު ކުރުމުގައި ޢަމަލު ކުރަމުން އަންނަ އުޞޫލުތަކާ ހަމަތަކުގެ އަލީގައި ވިދާޅުވާ ވިދާޅުވުމެއް ކަމަށް ވެސް ބަޔާން ކުރައްވާފައިވެ އެވެ.