ޔުއެފާ ވޮމެންސް ޗެންޕިއަންސް ލީގު ކުއާޓާ ފައިނަލުގެ ވަނަ ލެގުގައި ބުދަ ދުވަހުގެ ރޭ އަމިއްލަ ދަނޑުގައި 3-0 ގެ ނަތީޖާއަކުން ރެއާލް މެޑްރިޑް ބަލިކޮށް އާސެނަލް މުބާރާތުގެ ސެމީފައިނަލުން ޖާގަ ހޯދައިފި އެވެ.

މިދެޓީމުގެ މެދުގައި މިމަހުގެ 18 ވަނަ ދުވަހުގެ ރޭ ރެއާލް މެޑްރިޑްގެ ދަނޑުގައި ކުޅެވުނު ކުއާޓާ ފައިނަލް ފުރަތަމަ ލެގުގެ މެޗު 2-0 ގެ ނަތީޖާއަކުން ރެއާލް ކާމިޔާބުކޮށްފައިވާއިރު، އާސެނަލް އިން ސެމީގެ ޖާގަ ކަށަވަރުކުރީ 3-2 ގެ އެގްރިގޭޓް ނަތީޖާއަކުންނެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފައްޓައިގެން ކުޅެ އާސެނަލް އިން މެޗު ޑޮމިނޭޓްކުރި ނަމަވެސް މިހާފުގައި ދެޓީމުންކުރެ ކޮންމެ ޓީމަކަށް ވެސް އިދިކޮޅު ޓީމުގެ ގޯލާއި އަމާޒުކޮށް ފޮނުވާލެވިފައި ވަނީ އެންމެ ހަމަލާއެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި އާސެނަލްގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، ދެވަނަ ހާފު ފެށިގެން ފުރަތަމަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ފޯވާޑް އެލެސިއާ ރޫސޯ އެވެ. އަދި އޭގެ ތިން މިނެޓް ފަހުން އެޓީމުގެ ލީޑު ފުޅާކޮށްދިނީ ފޯވާޑް މަރިއޯނާ ކެލްޑެންޓީ އެވެ.

މިމެޗުގައި އާސެނަލަ އިން ކާމިޔާބުކުރި ތިންވަނަ ލަނޑު ފަހުހާފުގެ 59 ވަނަ މިނެޓުގައި ކާމިޔާބުކޮށްދިނީ އެޓީމުގެ ފުރަތަމަ ލަނޑު ވެސް ކާމިޔާބުކޮށްދިން ފޯވާޑް އެލެސިއާ ރޫސޯ އެވެ. އަދި މިއީ މިމުބާރާތުގައި އެލެސިއާ ކާމިޔާބުކުރި ހަ ވަނަ ލަނޑެވެ.

މުބާރާތުގެ ސެމީ ފައިނަލުގައި އާސެނަލް ނުކުންނާނީ ފްރާންސްގެ ލިއޯން އާއި ދެކޮޅަށެވެ. ލިއޯން ސެމީފައިނަލުން ޖާގަ ހޯދީ ކުއާޓާ ފައިނަލުގައި 6-1 ގެ އެގްރިގޭޓް ނަތީޖާއަކުން ބަޔާން މިއުނިކް ބަލިކުރުމަށްފަހު އެވެ.

ސެމީގެ ފުރަތަމަ ލެގުގެ މެޗު އެޕްރިީލް 19 ވަނަ ދުވަހު އާސެނަލްގެ ދަނޑުގައި ކުޅޭއިރު، ބަޔާންގެ ދަނޑުގައި ކުޅޭ ދެވަނަ ލެގުގެ މެޗު ކުޅުމަށް ހަމަޖެހިފައިވަނީ އެޕްރީލް 24 ވަނަ ދުވަހު އެވެ.