ރަމަޟާން މަހުގެ 27 ވިލޭރޭ މައްކާގެ މަސްޖިދުލް ހަރާމަށް އަޅުކަމަށް ދިޔަ މީހުންގެ އަދަދު 3.4 މިލިއަނަށް އަރައިފައިވާކަމަށް ސައުދީ ގެޒެޓުން ރިޕޯޓުކޮށްފިއެވެ. މިއީ އައު ރެކޯޑެއްކަމަށް ވެސް ބުނެފައިވެއެވެ.

ރޭގައިވެސް ދުނިޔޭގެ އެކި ކަންކޮޅުތަކުން ގިނަ އަދަދެއްގެ މުސްލިމުން މައްކާގެ މަސްޖިދުލް ހަރާމާއި މަދީނާގެ މަސްޖިދުއް ނަބަވީއަށް ޒިޔާރަތްކޮށް ތަރާވީޙް އަދި ތަހައްޖުދު ނަމާދު އަދާކުރިއެވެ. ރަމަޟާން މަހުގެ ފަހު ދިހައަކީ ގިނަ މުސްލިމުން ލައިލަތުލް ޤަދުރު ހޯދުމަށް މަސައްކަތްކުރާ ރޭތައް ކަމަށްވާތީ ފަހު ދިހައެއްގެ ހުރިހާ ރެއެއްގައިވެސް މަސްޖިދުލް ހަރާމަށް އަޅުކަމަށް ދާމިހުންގެ އަދަދު ގިނަވެއެވެ. ޚާއްސަކޮށް، އޮނަހިރި ރޭ ތަކުގައި އެ އަދަދު އިތުރުވެއެވެ. 

އެކަމަށްޓަކައި ތައްޔާރު ވުމަށް މަސްޖިދުލް ހަރާމުގެ މަތާފް ސަރަހައްދުގައި ގަޑިއިރަކު 107،000 މީހުންނަށް ތަވާފުކުރެވޭ ގޮތަށް އިންތިޒާމުތައް ހަމަޖައްސާފައިވާކަމަށް ސައުދީ އަރަބިއްޔާއިން ބުނެފައިވެއެވެ. މީގެ އިތުރުން 428 އެސްކަލޭޓަރާއި 28 ލިފްޓު ހަރުކޮށްފައިވާ ކަމަށާއި، 1،300 ސްޕީކަރު ހިމެނޭ އަޑުގެ ނިޒާމެއް ޤާއިމުކޮށްފައިވާ ކަމަށްވެސް ބުނެފައިވެއެވެ. އަދި މަސްޖިދުލް ހަރާމް ފިނިކުރުމަށް 90،000 ޓަނުގެ ކެޕޭސިޓީ ހުރި ކޫލިންގ ސިސްޓަމެއް ބޭނުންކުރާ ކަމަށްވެސް ބުނެފައިވެއެވެ.

މައްކާ ސަރަހައްދުގެ ހެލްތު އެފެއާޒް ޑިޕާޓްމަންޓުން މަސްޖިދުލް ހަރާމާއި އޭގެ ގޯތިތެރޭގައި މެޑިކަލް ސެންޓަރުތައް ޤާއިމުކޮށް، ޙައްޖު އަދި އުމްރާ ޒިޔާރަތްތެރިންނަށް ޞިއްޙީ ޚިދުމަތް ފޯރުކޮށްދިނުމަށް އިތުރު މަސައްކަތްތަކެއް ކޮށްފައިވާ ކަމަށްވެސް ސައުދީ ގެޒެޓުން ރިޕޯޓުކޮށްފައިވެއެވެ.

ދިވެހިރާއްޖެއިންވެސް މި ރަމަޟާން މަހުގައި ޢުމްރާގެ އަޅުކަން އަދާކުރުމަށް މައްކާއަށް ގިނަ އަދަދެއްގެ ދިވެހިން ޒިޔާރަތްކޮށްފައިވެއެވެ. 

ލައިލަތުލް ޤަދުރަކީ އިސްލާމްދީނުގައި އެންމެ މުހިންމު ރޭތަކުގެ ތެރެއިން އެއް ރޭކަމަށްވާއިރު، މި ރޭގެ އަޅުކަން ހާސް މަހަށްވުރެ ހެޔޮވެގެންވާކަމަށް ޤުރުއާނުގައި ބަޔާންކޮށްފައިވެއެވެ. ލައިލަތުލް ޤަދުރު ވަކި ރެއެއްކަން ކަނޑައެޅިގެން އެނގެން ނެތްނަމަވެސް، އެ ރޭ އަކީ ރަމަޟާން މަހުގެ އޮނަހިރި ރޭ ތަކުގެ ތެރެއިން ރެ އެއް ކަމަށް ހަދީޘްގެ އަލީގައި ޢިލްމުވެރިން ވިދާޅުވެއެވެ.