އައްޑޫ ސެންޓްރަލް ޕަވަރ ސްޓޭޝަންގެ ޖެނެރޭޝަން ކެޕޭސިޓީ އިތުރު ކުރުމަށް އިންޑިއާއިން ގެނެވުނު 1.8 މެގަވަޓް ގެ އައު އިންޖީނު އިންސްޓޯލް ކުރުމުގެ މަސައްކަތް ފަށައިފިއެވެ.

އައްޑޫއަށް ކަރަންޓްގެ ޚިދުމަތް ދިނުމުގެ މަސައްކަތް ކުރަމުންދާ ފެނަކައިން ބުނީ، އެ ޖެނެރޭޓަރ ސެޓް ގެންދިޔަ ދޯނި މިހާރު އައްޑޫ އަށް ބަނދަރު ކޮށްފައިވާ ކަމަށެވެ.

އަދި އެ އަންލޯޑްކޮށް، 48 ގަޑިއިރުތެރޭ މި އިންޖީނު އިންސްޓޯލްކޮށް ޚިދުމަތް ދޭން ފެށުމަށް ޓެކްނިކަލް ޓީމުން މަސައްކަތް ކުރަމުންދާ ކަމަށްވެސް ބުނެފައިވެއެވެ. 

‏މިއާއެކު ފެނަކައިން ވަނީ ކަރަންޓުގެ ކެނޑުމުގެ ގިނަގުނަ ތަކުލީފުތަކާއެކުވެސް، އައްޑޫސިޓީގެ ރައްޔިތުން ކެތްތެރިކަން އިސްކޮށް، ދައްކާ ފުރިހަމަ ނަމޫނާއާއި، މައްސަލަތައް ޙައްލުކުރުމަށް ކުންފުނިން ކެނޑިނޭޅި ކުރަމުންދާ މަސައްކަތްތަކަށް ދެމުންދާ އެއްބާރުލުމަށް ޝުކުރު އަދާކޮށްފައެވެ. 

އައްޑޫ ސިޓީގެ ރަށްތަކަށް ކަރަންޓު ފޯރުކޮށްދިނުމަށް 19 ޖަނަރޭޓަރު ބޭނުންކުރެއެވެ. ފެނަކައިން ބުނެފައިވާގޮތުން އައްޑޫ ކަރަންޓް މައްސަލަ ބޮޑަށް ދިމާވާންފެށީ، އެ ޖެނެރޭޓަރ ތަކުގެ ތެރެއިން، ގިނަ އިންޖީނުތަކެއް އޯވަހޯލް ނުކޮށް ދިގުލައިގެންދިއުމުން އެޖަނަރޭޓަރުތަކެއް ހަލާކުވުމުންނެވެ.

އެ މައްސަލަ ހައްލު ކުރުމަށް، މި ފާއިތުވި 3 މަސްދުވަހުގެ ތެރޭގައި އެސިޓީއަށް 3 ޖަނަރޭޓަރު ފޮނުވާފައިވެއެވެ.