ޢަލީ ރަމީޒު އިސްވެ ދާދިފަހުން އުފެއްދި ޖަމިއްޔާ 'މަންފާ' އަށް އެހީވުމަށް އޭނާ ފޭސްބުކްޕޭޖުގައި ޖެހި ޕޯސްޓާއެކު ޢާއްމުންގެ ދީލަތި އެހީތައް އެ ޖަމިއްޔާއަށް އޮއްސާލައިފިއެވެ.

މަންފާގެ ރައީސް ޢަލީ ރަމީޒު އިއްޔެ ފޭސްބުކުގައި ކުރި ޕޯސްޓްގައި އޭނާ ވަނީ ކޮންމެ މީހަކުވެސް އެންމެ ވިހި ރުފިޔާ އެ ޖަމިއްޔާއިން ކުރިއަށް ގެންދާ ދީނީ ހަރަކާތްތަކަށް އެހީވުމަށް ހަދިޔާ ކުރުމަށެވެ. އެ ޕޯސްޓުގައި އޭނާ ވަނީ މަންފާގެ އެމް.އައި.ބީ އެކައުންޓާއި ބީ.އެމް.އެލް އިސްލާމިކް އެކައުންޓު ހިއްސާ ކޮށްފައެވެ.

އެއާއެކު ގިނަ ބަޔަކު ވަނީ އެކަމަށް އިޖާބަދީ އެ ޖަމިއްޔާއަށް އެހީތެރިކަން ’އޮއްސަން‘ ފަށާފައެވެ. އެގޮތުން ގާތްގަނޑަކަށް 6 ގަޑި އިރުގެތެރޭގައި 1300 މީހުން އެމީހުން މަންފާއަށް އެހީތެރިވެއްޖެކަމަށް ބުނެ 'ޑަން' ޖަހައި ކޮމެންޓު ކޮށްފައިވެއެވެ.

Advertisement

މިކަމާ ގުޅޭގޮތުން ވޮއިސްއިން ކުރި ސުވާލަކަށް ޖަވާބުދެއްވަމުން ޢަލީ ރަމީޒު ވިދާޅުވީ ބައެއް ފަރާތްތަކުން 20 ރުފިޔާއަށްވުރެ ގިނައިން ހަދިޔާކޮށްފައިވާ ކަމަށެވެ. އަދި މަންފާއަށް ޢާއްމުން އެވަރުގެ ސަޕޯޓެއް ދިނީތީ ވަރަށްބޮޑަށް އުފާކުރާ ކަމަށާ މިކަމުން އެނގިގެންދިޔައީ މި ޖަމިއްޔާއަށް އާއްމުން ކުރާ އިތުބާރުކަމަށެވެ. އޭގެ އިތުރުން ޢަލީ ރަމީޒުގެ ދައުވަތުގެ މަސައްކަތަށްވެސް ޢާއްމުން އިތުބާރު ކުރާ މިންވަރު ހާމަވެގެން ހިނގައްޖެކަމަށާއި އެ އިތުބާރު އިންޝާالله އަބަދުވެސް ހިފަހައްޓާނެކަމަށް ޢަލީ ރަމީޒު ވިދާޅުވިއެވެ.

"މާލީ ގޮތުން ލިބުނު އެހީތެރިކަމަށްވުރެ ބޮޑަށް އުފާވީ ޢާއްމުން އަޅުގަނޑުމެންނަށް ކުރާ އިތުބާރު ފެނި ޔަގީންވުމުން. އަލްޙަމްދުލިالله." ޢަލީ ރަމީޒު ވިދާޅުވިއެވެ.

"މަންފާ ޖަމިއްޔާއަކީ ދީނީ އަދި އިޖްތިމާޢީ އެކިއެކި މަސައްކަތްތައް ކުރުމަށް އަޅުގަނޑާއި އަޅުގަނޑުގެ އެންމެ ގާތް އެކުވެރިންކޮޅެއް ވެގެން އުފެއްދި ޖަމިއްޔާއެއް. މި ޖަމިއްޔާ އަދި މިއޮތީ ވަރަށް ޅަފަތުގަ. ދީނީ ދަޢުވަތު ކުރިއަށް ގެންދިއުމަށް ވަރަށްގިނަ ކަންކަން އެބަ ބޭނުންވޭ. ވަރަށްގިނަ އިކުއިޕްމަންޓްސް އެބަ ބޭނުންވޭ. އަޅުގަނޑުމެން މިފެށީ ޒީރޯ އިން. މި ޖަމިއްޔާއަށް އަބަދުވެސް ޢާއްމުންގެ ދީލަތި އެހީތެރިކަން ބޭނުންވޭ. އަޅުގަނޑު އެދެން މި 20 ރުފިޔާ ކޮންމެ މަހަކުވެސް މަންފާ އެކައުންޓަށް ޢާއްމުން ޖަމާކޮށްދިނުމަށް. އެއީ އަޅުގަނޑުގެ ވަރަށްބޮޑު އެދުމެއް. އަޅުގަނޑުމެން ދާދި އަވަހަށް ވަރަށް ވަރުގަދަ ކަމެއް އިޢުލާނު ކުރާނަން އިންޝާالله." ޖަމިއްޔަތުއްސަލަފު އުފައްދައި 19 އަހަރު އެ ޖަމިއްޔާގައި އިސްކޮށް ހަރަކާތްތެރިވުމަށްފަހު ދާދި ފަހުން އެ ޖަމިއްޔާއިން އިސްތިއުފާ ދެއްވި އެ ޖަމިއްޔާގެ އެއް މުއައްސިސް ޢަލީ ރަމީޒު ވިދާޅުވިއެވެ.