މުއުމިނުންނަކީ ވަކި މަހެއްގައި ނުވަތަ ވަކި މޫސުމެއްގައި އެކަނި އަޅުކަންކުރަންޖެހޭ ބައެއް ނޫން ކަމަށް މިއަދުގެ ހުކުރު ޚުތުބާގައި ބުނެފިއެވެ.

ރަމަޟާން މަހަށް ފަހު ހެޔޮ ޢަމަލު ކުރުމުގައި ދެމިތިބޭށެވެ މައުޟޫއަށް މިއަދު އިއްވި ހުކުރު ޚުތުބާގައި ބުނީ، ރަމަޟާން މަސް އަހަރެމެންނާ އަލްވަދާޢުކީ ނަމަވެސް އެ މަހުގެ ވެރި الله ދިރިދެމިވޮޑިގެންވާ ކަމަށެވެ. އަދި ފުރިހަމަ މުއުމިނަކު، ދުވަހަކު ވެސް ހެޔޮ ޢަމަލުކުރުމަކަށް އަލްވަދާޢެއް ނުކިޔާނެ ކަމަށާ އެހެންކަމުން އަހަރެމެންނަށް އޮތީ ހެޔޮ ޢަމަލު ކުރުންމަތީ ދެމިތިބުން ކަމަށެވެ. 

"އަޅުކަންކުރުމަކީ، ހަމައެކަނި ވަކި މޫސުމަކާ ގުޅިފައި އޮންނާންވާނޭ ކަމެއް ނޫނެވެ. އެހެނީ ރަމަޟާންމަހުގެ ވެރި الله އަކީ، އެހެނިހެން މަސްތަކުގެ ވެސް ވެރި اللهއެވެ. މުއުމިނުންނަކީ، ވަކި މަހެއްގައި، ނުވަތަ ވަކި މޫސުމެއްގައި، اللهއަށް އަޅުކަންކުރާން ޖެހޭ ބައެއްނޫނެވެ. މުއުމިނުންގެ މުޅި ޙަޔާތުގައި ވެސް އަޅުކަންކުރާން ޖެހޭނެއެވެ. ބައެއް މޫސުންތަކުގައި އަޅުކަންކުރުން ގިނަވެއެވެ. ރަމަޟާން މަހަކީ އެ ފަދަ މޫސުމެކެވެ. އެއީ އެ މޫސުމުގެ ބޭނުން ހެޔޮ ގޮތުގައި ހިފުމަށެވެ. އަދި އެ މަސް ނިމުނީމާ ވެސް މުސްލިމުން އަޅުކަމުގައި ދެމިތިބޭނެއެވެ.," ޚުތުބާގައި ބުނެފައިވެއެވެ.

މީގެއިތުރުން ޚުތުބާގައި، ރަމަޟާން މަހަށްފަހު ވެސް ހެޔޮ ޢަމަލު ކުރުމުގައި ދެމިތިބުމަށް އިރުޝާދު ދީފައިވެއެވެ. އަދި ޝައްވާލު މަހުގެ ހަ ރޯދަ ހިފުމުގެ މުހިންމުކަމާއި، އިސްތިޣުފާރުކުރުމުގެ މާތްކަން ބަޔާންކޮށްފައިވެއެވެ.

"ރަމަޟާން މަހުގައި ފަރުޟު ފަސް ނަމާދު ޤަވާއިދުން ބަރާބަރަށް ކުރި ފަދައިން އެ މަހަށް ފަހުގައި ވެސް އެ ގޮތުގައި ދެމިހުންނާށެވެ! ކޮންމެ ދުވަހަކު ޤުރްއާނުން ޞަފުޙާއެއް ނަމަވެސް ކިޔެވޭތޯ ބަލާށެވެ!" ޚުތުބާގައި ނަސޭހަތްތެރިވެފައިވެއެވެ.

މިއާއެކު ފިޠުރު ޒަކާތުގެ މުހިންމުކަން ފާހަގަކޮށް، އެ ޒަކާތް ނެރުމަށް އަވަސްވެގަތުމަށް ޚުތުބާގައި ގޮވާލާފައިވެއެވެ. އަދި ފިޠުރު ޒަކާތަކީ ރޯދަ މަހު ރޯދަހިފި އިރު ކުރެވިފައިވާ އުނި ކަންކަން ފޫބައްދައިދޭ ކަމެއްގެ ގޮތުގައި ބަޔާންކޮށްފައިވެއެވެ.