ކެފޭ އުސޫލުން މާލޭގައި މަސްތުވާތަކެތީގެ ވިޔަފާރިކުރަމުންދިޔަ 14 ތަނެއް، މިއަހަރުގެ ތެރޭގައި ބަންދުކޮށްފައިވާކަމަށް ފުލުހުން ބުނެފިއެވެ.

ފުލުހުންގެ އިދާރާއިން ބުނީ، މަސްތުވާތަކެތީގެ މައްސަލަ ހައްލުކުރުމަށް ކުރަމުންގެންދާ މަސައްކަތުގެ ދަށުން މިމަހުގެ 15 ވަނަ ދުވަހުގެ ނިޔަލަށް ކެފޭ އުސޫލުން މަސްތުވާ ތަކެތީގެ ވިޔަފާރިކުރަމުންދިޔަ 14 ތަނެއް ބަންދުކޮށްފައިވާކަމަށެވެ. ފުލުހުން ބުނީ، ކެފޭ އުސޫލުން މަސްތުވާތަކެތީގެ ވިޔަފާރި ކުރަމުންދާ 60 ތަން ހުރިކަން ފާހަގަކުރެވިފައިވާކަމަށެވެ. އެގޮތުން މިހާރުވެސް މާލޭގައި މިފަދަ 6 ތަނެއް ހިންގަމުންދާކަން ފާހަގަކުރެވިފައިވާ ކަމަށާއި، އެތަންތަން ބަންދުކުރުމަށް ގޮންޖެހުންތަކެއް ހުރި ކަމަށެވެ. 

އެތަންތަން ބަންދުކުރުމަށް ހުރި ގޮންޖެހުންތަކުގެ ތެރޭގައި ގޭގެ ބެހެނިވެރިން އިތުރުވުމާއި، އާއިލީ މީހުން ހެކިބަސް ދިނުމުގައި ފަސްޖެހުމާއި، ގިނަ ބަޔަކަށް އެގްރިމަންޓްކޮށްފައި ހުރުމުން ފިޔަވަޅު އަޅަންޖެހޭ ފަރާތް ދެނެގަތުމުގައި ހުރި ދަތިތައް ހިމެނޭކަމަށް ފުލުހުން ބުންޏެވެ.

Advertisement

މީގެ އިތުރުން މިފަދަ ތަންތަން ބަންދުކުރުމުގައި ހުރި އެންމެ ބޮޑު ގޮންޖެހުމަކީ މަސްތުވާތަކެއްޗާ ބެހޭ ގާނޫނު މިހާރު އޮތްގޮތުން ހުރި ހުރަސްތައް ކަމަށާއި، މިކަން ހައްލުކުރުމަށްޓަކައި މަސްތުވާތަކެއްޗާބެހޭ ގާނޫނަށް އިސްލާހުތަކެއް ހުށަހަޅާފައިވާ ކަމަށް ފުލުހުން ބުނެއެވެ. އެގޮތުން މި އިސްލާހުތަކުގެ ތެރޭގައި، މިފަދަ ތަންތަން ކޯޓު އަމުރަކާ ނުލައި 72 ގަޑިއިރަށް ފުލުހުންނަށް ބަންދުކުރެވޭ ގޮތަށް ހަމަޖެއްސުމާއި، ގިނަވެގެން 90 ދުވަހަށް ބަންދުކުރުމަށް ކޯޓަށް އަމުރުކުރެވޭނެ ގޮތް ހެދުން ހިމެނެއެވެ.

ފުލުހުން ބުނީ އެފަދަ ތަންތަން ހިންގިޔަ ނުދިނުމަށްޓަކައި އާއްމު ރައްޔިތުންގެ އެހީތެރިކަން ބޭނުންވާކަން ފާހަގަކޮށްފައެވެ. އެގޮތުން އާއިލީ މީހަކު ނަމަވެސް އޭނާ ފަރުވާގެ ނިޒާމުގެ ތެރެއަށް ވައްދައި އެފަދަ ތަންތަން ހިންގުމުގެ ފުރުސަތު ނުދިނުމާއި، ގެތައް ކުއްޔަށްދޭއިރު ސަމާލުވާންޖެހޭކަމަށް ފުލުހުން ބުނެއެވެ.