ކުރީގެ އިމިގްރޭޝަން ކޮންޓްރޯލާ ޝަމްއާން ވަހީދު ދިރިއުޅޭ ގެއިން 257،475 ރުފިޔާއާ 10،000 ޑޮލަރު ފެނުނު ކަމަަށް ފުލުހުން ބުނެފި އެވެ.

ބިދޭސީން އަތުން ނާޖައިޒު މަންފާ ހޯދުމުގެ ތުހުމަތުގައި ޝަމްއާން ހައްޔަރު ކުރީގެ މި މަހުގެ 21 ވަނަ ދުވަހުގެ ރޭގެ ވަގުތެއްގަ އެވެ. ޝަމްއާންގެ ބަންދާމެދު ގޮތް ނިންމަން ކޯޓަށް ހާޒިރު ކުރުމުން 15 ދުވަހުގެ ބަންދުގެ މުއްދަތެއް ޖަހާފައިވެ އެވެ.

ފުލުހުން މިރޭ ވަނީ ޝަމްއާން ހައްޔަރު ކުރި މައްސަލައާ ގުޅޭ ތަފްސީލީ ބަޔާނެއް ނެރެފަ އެވެ. އެ ބަޔާނުގައި ބުނީ މާޗް މަހުގެ 12 ވަނަ ދުވަހު އިމިގްރޭޝަންގެ މުވައްޒިފުން މާފަންނުގައި ހުރި ގެއެއްގައި ދިރިއުޅޭ ބިދޭސީ މަސައްކަތްތެރީންނަށް އަމާޒު ކޮށްގެން އޮޕަރޭޝަނެއް ހިންގާފައިވާ ކަމަށެވެ. އޮޕަރޭޝަން ހިންގީ ޝަމްއާން ވަހީފަށް އެނގިގެން ކަމަށާ ނަމަވެސް އެފަދަ އޮޕަރޭޝަނަކަށް ބޭނުންވާ ލިޔެކިޔުންތައް ވެސް ފުރިހަމަ ނުކޮށް އިމިގްރޭޝަނުން އަމަލު ކުރަމުންދާ އުސޫލާ ހިލާފަށް ކަން ތަހުގީގަށް އެނގިފައިވާ ކަމަށެވެ.

Advertisement

ފުރަތަމަ އެ ގެއަށް ދިޔައީ އޮޕަރޭޝަންތައް ހިންގުމުގެ ވަޒީފާގެ މަސްއޫލިއްޔަތު ނެތް ތިން މުވައްިފުން ކަމަށާ އެއީ ކޮންޓްރޯލާ ޖެނެރަލްގެ ބިއުރޯގައި އަދި ބިއުރޯގެ ދަށުން ހިންގާ ޕްލޭނިން އަދި މީޑިއާގައި މަސައްކަތް ކުރާ ތިން މުވައްޒިފުން ކަމަށެވެ.

އެ އޮޕަރޭޝަންގައި ހަތް ބިދޭސީއަކު ފާސްކޮށް އެ މީހުންގެ ތެރެއިން އެކަކު އަތުން ގިނަ އަދަދެއްގެ ފައިސާ ފެނުނު ކަމަށާ އެ މީހާ މާޗް 13 ވަނަ ދުވަހު މ. ސްޓާ ކްލައުޑްގައި ހިންގާ އިމިގްރޭޝަންގެ އޮފީހަށް ގެންގޮސް އެ މީހާ ދޫކޮށްލީ ޝަމްއާންގެ އިރުޝާދުގެ ދަށުން "އާޖެންޓް" ކަމެއްގެ ގޮތުގައި އަމަލު ކުރަން އަންގައިގެން ކަމަށް ތަހުގީގަށް އެނގިފައިވާ ކަމަށް ވެސް ފުލުހުން ބުންޏެވެ.

އަދި އޭނާގެ އަތުން ފެނުނު ފައިސާ ކޮތަޅަކަށް އަޅާ އަނބުރާ ހަވާލުކުރި ކަމަށާ އޭގެ ފަހުން އިމިގްރޭޝަންގެ މުވައްޒިފުން ސައިކަލެއްގައި ވެލާނާ ބިލްޑިން ކައިރިއަށް ގޮސް އިމިގްރޭޝަންގެ ވެހިކަލަކުން ފައިސާ އެޅި ކޮތަޅު ނަގާ ޝަމްއާންގެ ގެއަށް ގެންގޮސްފައިވާ ކަމަށެވެ.

އެ ގެއިން  257،475 ރުފިޔާއާ 10،000 ޑޮލަރު ފެނުނު ކަމަށާ އަދި އިތުރު ސާމާނު ހޯދާ ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ބުންޏެވެ.