ސަޢޫދީ އަރަބިއްޔާގެ އެންމެ މުއްސަނދި އާއްމު ރައްޔިތު މީހާ ކަމުގައިވާ، ސުލައިމާން ބިން އަބްދުލް އަޒީޒް އަލް ރާޖިހީ، އޭނާގެ މުދަލުން 16 ބިލިއަން ޑޮލަރު ޞަދަޤާތްކޮށް، އަމިއްލައަށް ބިލިއަނަރުންގެ ލިސްޓުން އޭނާގެ ނަން ވަނީ ދާދިފަހުން އުނިކޮށްފައެވެ.

ރާޖިހީ ޢާއިލާއަކީ ސަޢޫދީ އަރަބިއްޔާގެ ރަސްކަމުގެ ޢާއިލާ ފިޔަވައި އެންމެ މުއްސަނދި ޢާއިލާ ކަމުގައި ސައުދީ މީޑިއާތައް ބުނެއެވެ. އަދި މި ޢާއިލާއަކީ ދުނިޔޭގެ އެންމެ ބޮޑެތި ޗެރިޓީ ހިންގާ ޢާއިލާތަކުގެ ތެރޭގައި ހިމެނޭ ޢާއިލާއެކެވެ.

1929 ވަނަ އަހަރު އުފަންވެފައިވާ ސުލައިމާން ބިން އަބްދުލް އަޒީޒް ބިން ސާލިހް އަލް ރާޖިހީ ބޮޑުވެފައިވަނީ ފަގީރު ޢާއިލާއެއްގައި، ދަތި ޙާލަތެއްގައެވެ. އެގޮތުން، އިންޓަވިއުއެއްގައި ސުލައިމާން ބިން އަބްދުލް އަޒީޒް އަލް ރާޖިހީ ވިދާޅުވެފައިވަނީ އޭނާގެ ދިރިއުޅުމުގައި ދެފަހަރެއްގެ މަތިން ފަގީރުވެފައިވާ ކަމަށެވެ.

Advertisement

ސުލައިމާން އަލް ރާޖިހީ އުމުރުން 9 އަހަރުގެ އުމުރުގައި ރިޔާދުގެ އަލް ޚަދްރާ މާރުކޭޓުގައި ޕޯޓަރެއްގެ ގޮތުގައި މަސައްކަތް ފަށާފައިވެއެވެ. 12 އަހަރުގެ އުމުރުގައި ކަދުރު ބަގީޗާއެއްގައި މަހަކު 6 ސަޢޫދީ ރިޔާލަށްވުރެ މަދުން މުސާރަ ލިބޭގޮތަށް މަސައްކަތް ކުރަން ފަށާފައިވެއެވެ. އޭނާ ނިދަނީ މަސައްކަތްކުރާ ތަނުގައި ހިލަގަނޑުތަކުގެ މަތީގައި، މަސައްކަތުގެ ހެދުމާއެކުގައެވެ.

ނަމަވެސް މަސައްކަތްތެރިކަމާއި ކެތްތެރިކަމާއެކު އޭނާ ވަނީ ދުނިޔޭގެ އެންމެ ކާމިޔާބު ވިޔަފާރިވެރިންގެ ތެރެއިން އެކަކަށް ވެފައެވެ.

އެގޮތުން، 1957 ވަނަ އަހަރު ސުލައިމާން ބިން އަބްދުލް އަޒީޒް އަލް ރާޖިހީ އާއި އޭނާގެ ތިން އަޚުން އަލް ރާޖިހީ ބޭންކު އުފައްދާފައިވެއެވެ. މި ބޭންކަކީ މިހާރު ދުނިޔޭގެ އެންމެ ބޮޑެތި އިސްލާމިކް ބޭންކުތަކުގެ ތެރެއިން އެއް ބޭންކެވެ. މި ބޭންކުގެ ސަބަބުން އަލް ރާޖިހީއަށް ބިލިއަނުން ފައިސާ ލިބިފައިވެއެވެ.

އޭނާގެ މުއްސަނދިކަމާއި ނުފޫޒު ބޭނުންކޮށްފައިވަނީ ހެޔޮކަންތައްތަކަށެވެ. ފުރަތަމަ އޭނާ ހޭދަކޮށްފައިވަނީ ފަގީރުންނަށް އެހީވުމަށެވެ. އެފަހުން، ތަޖުރިބާކާރުންނާއި ދީނީ ޢިލްމުވެރިންގެ ލަފާގެ މަތިން، 1983 ވަނަ އަހަރު ޗެރިޓީ ފައުންޑޭޝަނެއް އުފައްދާފައިވެއެވެ.

ކޮންމެ އަހަރަކު، މި ފައުންޑޭޝަނުން ސަޢޫދީ އަރަބިއްޔާގެ 13 ސަރަޙައްދެއްގައި ހިމެނޭ 130 އަށްވުރެ ގިނަ ސިޓީތަކާއި ރަށްތަކުގައި 1,200 އަށްވުރެ ގިނަ ޗެރިޓީ މަޝްރޫޢުތަކަށް އެހީތެރިކަން ފޯރުކޮށްދެއެވެ. މި މަޝްރޫޢުތައް ހޮވަނީ ސަޢޫދީ މުޖުތަމަޢުގެ ބޭނުންތަކަށް ބަލައިގެންނެވެ.

އޭނާގެ ހެޔޮފޯރުންތައް ދެމެހެއްޓެނިވި ގޮތެއްގައި ކުރިއަށް ގެންދިޔުމަށް، ސުލައިމާން އަލް ރާޖިހީ ވަނީ އޭނާގެ މުދަލުގެ ބޮޑު ބައެއް ވަގުފުކުރުމަށް ނިންމާފައެވެ. މިއީ އިސްލާމީ ތާރީޚުގައި އެންމެ ބޮޑެތި ވަގުފުތަކުގެ ތެރެއިން އެއް ވަގުފު ކަމުގައި ރިޕޯޓްތައް ބުނެއެވެ.

ސުލައިމާން ބިން އަބްދުލް އަޒީޒް އަލް ރާޖިހީ ޗެރިޓަބަލް ފައުންޑޭޝަން މިހާރު ވަނީ ސަޢޫދީ އަރަބިއްޔާގެ އެންމެ މުހިންމު ހެޔޮއެދޭ މުއައްސަސާތަކުގެ ތެރެއިން އެއް މުއައްސަސާއަށް ވެފައެވެ. މި ފައުންޑޭޝަނުން އަމާޒުކުރަނީ ތަޢުލީމީ، ޞިއްޙީ، އިޖުތިމާޢީ އަދި ދީނީ ދާއިރާތަކުގައި މަސައްކަތްކުރާ ރަޖިސްޓަރީކޮށްފައިވާ، ފައިދާ ނުނަގާ ޖަމްޢިއްޔާތަކަށް އެހީތެރިވުމަށެވެ.