ދީނީ ޢިލްމު އުނގެނުމަކީ ކޮންމެ މުސްލިމަކަށްވެސް ވާޖިބުވެގެންވާ ކަމެއް ކަމުގައި މިއަދުގެ ޚުތުބާގައި ބުނެފިއެވެ.

ޢިލްމު އުނގެނުމުގެ މާތް ކަމަށް އަލިއަޅުވާލައި މިއަދު އިއްވި ހުކުރު ޚުތުބާގައި ޤުރްއާނާއި ޙަދީޘުން ހެކިދައްކައި، ޢިލްމުވެރިންގެ މަތިވެރިކަމާއި ދަރަޖަ ވަނީ ބަޔާންކޮށްދީފައެވެ.

މިއާއެކު ޚުތުބާގައި މާތް اللهއަށް އެންމެ ބޮޑަށް ބިރުވެތިވެ، ތަޤްވާވެރިވާ މީހުންނަކީ، ޢިލްމު އުނގެނި އެ ޢިލްމާ އެއްގޮތަށް ޢަމަލުކުރާ މީހުން ކަމަށެވެ. އަދި އެ މީހުން މާތްالله އަށް ތަޤްވާވެރިވާނެ ކަމަށެވެ.

ތަޤްވާވެރީންނަކީ އެންމެ މާތް މީހުންކަމުގައި އަންގަވައި މާތްالله ވަޙީކުރައްވައިފައި ވެއެވެ. މާނައީ: "ހަމަކަށަވަރުން، اللهގެ ޙަޟްރަތުގައި ތިޔަބައިމީހުންކުރެ އެންމެ މާތްކަން ބޮޑީ، ތިޔަބައިމީހުންކުރެ އެންމެ ތަޤްވާވެރި މީހާއެވެ. ހަމަކަށަވަރުން، اللهއީ، މޮޅަށް ދެނެވޮޑިގެންވާ، ޚަބީރުވަންތަ ރަސްކަލާނގެއެވެ."

ޚުތުބާގައި އިތުރަށް ބުނީ ނަބިއްޔާ ﷺ ޙަދީޘްކުރައްވާފައިވާ ގޮތުގައި ނަބީބޭކަލުން މީސްތަކުންނަށް ވާރުތަކުރެއްވީ ޢިލްމު ކަމަށެވެ. އަދި އަޅުވެރިޔާގެ މައްޗަށް ޢިލްމުވެރިޔާ މާތްވެގެންވަނީ ތަރިތަކުގެ މައްޗަށް ހަނދު މާތްވެގެންވާ ފަދައިން ކަމަށެވެ. 

މާތް ނަބިއްޔާ ޞޢވ ޙަދީޘްކުރައްވައިފައި ވެއެވެ. (إِذَا مَاتَ اِبْنُ آدَمَ اِنْقَطَعَ عَمَلُهُ إِلَّا مِنْ ثَلَاثٍ: صَدَقَةٍ جَارِيَةٍ، أَوْ عِلْمٍ يُنْتَفَعُ بِهِ، أَوْ وَلَدٍ صَالِـحٍ يَدْعُوْ لَهُ) މާނައީ: "އިންސާނާ މަރުވުމުން ތިންކަމަކުން މެނުވީ އޭނާގެ ޢަމަލުތައް ނިމެއެވެ. އެއީ ދެމިގެންދާ ޞަދަޤާތަކުން، ނުވަތަ ފައިދާހުރި ޢިލްމަކުން، ނުވަތަ އޭނާ ދޫކޮށް ދިޔަ، އޭނާއަށްޓަކައި ހެޔޮދުޢާކުރާނޭ ޞާލިޙު ދަރިއެއްގެ ފުށުން މެނުވީއެވެ."

އަދިވެސް މާތް ނަބިއްޔާ ޞޢވ ޙަދީޘްކުރައްވައިފައި ވެއެވެ. (فَقِيْهٌ وَاحِدٌ أَشَدُّ عَلَى الشَّيْطَانِ مِنْ أَلْفِ عَابِدٍ) މާނައީ: "އެއް ހާސް އަޅުވެރީންނަށް ވުރެ، އެންމެ ފަޤީހެއްގެ ބާރު ޝައިޠާނާގެ މައްޗަށް ގަދަވެގެންވެއެވެ."

ޚުތުބާގައި ފާހަގަކުރި ގޮތުގައި ޢިލްމު އުނގެނުމަކީ ތިމާއަށާއި އެހެން މީހުންނަށް ނުހަނު ފައިދާ އާއި ލާބަހުރި ކަން ކަމަށެވެ. އަދި ޢިލްމުވެރިޔާ މަރުވުމަށް ފަހުގައި ވެސް، އޭނާ އުނގެނި، އެހެން މީހުންނަށް ފޯރުކޮށްދީފައިވާ ޢިލްމެއްގެ ފައިދާ ކުރާނެ ކަމަށެވެ. 

ޚުތުބާ ނިންމާލަމުން، ދީނީ ޢިލްމު އުނގެނުމަށް ގަދައަޅައި މަސައްކަތް ކުރުމަށާއި، އެ ކަމުގެ މާތް ދަރަޖައާއި ހެޔޮކަން ލިބިގަތުމަށް އިރުޝާދު ދީފައިވެއެވެ.