އީރާނުގެ ނިއުކްލިއާ މައްސަލައާމެދު އެމެރިކާ އާއި އެކު ސީދާ ވާހަކަތައް ފެށުމަށް ހަމަޖެހިފައިނުވާކަމަށް އީރާނުގެ ހާރިޖިއްޔާއިން ބުނެފިއެވެ.

އެމެރިކާގެ ރައީސް ޑޮނާލްޑް ޓްރަމްޕް އިއްޔެ ވައިޓް ހައުސްގައި ވާހަކަދައްކަވަމުން ވަނީ، ނިއުކްލިއާ މައްސަލާގައި އީރާނާއެކު ސީދާ ވާހަކަތައް ބެއްވުމަށް އެމެރިކާއިން ނިންމާފައިވާކަން ހާމަކޮށްފައެވެ. މިކަމަށް އީރާނުން އެއްބަސްވެފައިވާ ކަމަށްވެސް ޓްރަމްޕް ވިދާޅުވިއެވެ. ޓްރަމްޕް ވިދާޅުވީ ދެޤައުމުގެ އެންމެ މަތީ ފަންތީގެ އޮފިޝަލުންގެ މެދުގައި ބޭއްވިގެންދާ މި ވާހަކަތައް އޮންނާނީ އަންނަ ހޮނިހިރުދުވަހު ކަމަށްވެސް ވިދާޅުވެފައެވެ.

ޓްރަމްޕްގެ މި ވާހަކަތަކާ ގުޅިގެން އީރާނުގެ ހާރިޖީ ވަޒީރު، އައްބާސް އަރްގްޗީ އެކްސްގައި ކުރެއްވި ޕޯސްޓެއްގައި ވިދާޅުވީ، އީރާނާ އެމެރިކާ އާ ދެމެދު ކުރިއަށްދާނީ ނުސީދާ ގޮތެއްގައި ކަމަށް ވިދާޅުވެފައެވެ. މިގޮތުން އޮމާންގައި ކުރިއަށްދާ ވާހަކަތަކުގައި މެދުވެރިއެއްގެ ބައި އަދާކުރާނީ އެޤައުމުން ކަމަށްވެސް އޭނާ ވިދާޅުވިއެވެ.

އީރާނުން ނިއުކްލިއާ ބާރުވެރިކަން އުސޫލްތަކާ ހިލާފަށް ހޯދަމުންދާކަމަށް ތުހުމަތުކޮށް، އެޤައުމުން ވަނީ އެކަމުގައި މަޝްވަރާތައް ބޭއްވުމަށް އިންޒާރުދީފައެވެ. ނަމަވެސް އީރާނުން އަދިވެސް ބުނަމުންގެންދަނީ ނިއުކްލިއާ މައްސަލާގައި އެމެރިކާ އާއެކު ދައްކާނެ ވާހަކަތަކެއް ނޯންނާނޭކަމަށް ބުނެފައެެވެ. މި މައްސަލާގައި އީރާނުން ގެންގުޅެމުންދާ ސިޔާސަތުތަކާމެދު ހިތްހަމަ ނުޖެހިގެން ޓްރަމްޕް ވަނީ އީރާނަށް ބޮންއަޅަން ޖެހިދާނެކަމުގެ އިންޒާރުވެސް ދީފައެވެ. ޓްރަމްޕްގެ ވާހަކަތަކަށް ރައްދުދެމުން އީރާނުން ބުނެފައިވަނީ އެޤައުމަށް ބޮންއަޅައިފިނަމަ ރައްދުގައި އެމެރިކާއަށްވެސް ހަމަލާތައް ދޭނޭކަމަށެވެ. 

މިފަހުން އެމެރިކާއިން އީރާނަށް ދެމުން އަންނަ އިންޒާރުތައް ވަރުގަދަކޮށްފައިވަނީ، އެޤައުމުން ހޫތީންނަށް ހަތިޔާރު ފޯރުކޮށްދެމުންދާތީކަމަށް ރިޕޯޓްތައް ބުނެއެވެ.