އެމެރިކާއަށް ދުނިޔޭގެ އެކި ގައުމުތަކުން އެތެރެކުރާ މުދަލުން ބޮޑެތި ޓެރިފްތަކެއް ނަގަން ނިންމައި، 'ވިޔަފާރީގެ ހަނގުރާމަ'އެއް ފެށުމާއި ގުޅިގެން، އެމެރިކާއާ ދެކޮޅަށް ގުޅިގެން މަސައްކަތްކުރަން ޗައިނާއިން ހުށަހެޅި ހުށަހެޅުމަށް އޮސްޓްރޭލިއާއިން ދެކޮޅު ހަދައިފިއެވެ.

އޮސްޓްރޭލިއާގެ ބޮޑުވަޒީރުގެ ނައިބު ރިޗަޑް މާލްސް ވިދާޅުވީ އޮސްޓްރޭލިއާއިން މަސައްކަތްކުރާނީ އެގައުމުގެ ވިޔަފާރިތައް ސިންދަފާތުކޮށް، ޗައިނާއަށް ބަރޯސާވާ ބަރޯސާވުން ނިމުމަކަށް ގެނައުމަށްކަމަށެވެ. އޮސްޓްރޭލިއާގެ ބައިނަލްއަގްވާމީ ވިޔަފާރީގެ އެންމެ ބޮޑު ބައިވެރިޔަކީ ޗައިނާއެވެ.

އެމެރިކާއާ ދެކޮޅަށް ޓެރިފްގެ މައްސަލައިގައި އަތުގުޅާލައިގެން މަސައްކަތްކުރުމަށް އޮސްޓްރޭލިއާއަށް ހުށަހެޅުއްވީ ޗައިނާއިން އޮސްޓްރޭލިއާއަށް ކަނޑައަޅާފައި ހުންނަވާ ސަފީރު ޝާއޯ ކިއާން، އޮސްޓްރޭލިއާގެ ދި އޭޖް ނޫހުގައި ލިޔުއްވި އޮޕީނިއަން އާޓިކަލްއެއްގައެވެ. ޗައިނާ ސަފީރުގެ ހުށަހެޅުއްވުމާ ދެކޮޅު ހައްދަވަމުން އޮސްޓްރޭލިއާގެ ބޮޑުވަޒީރުގެ ނައިބު ވިދާޅުވީ މިހާރު ދުނިޔޭގައި ކުރިއަށްދާ އެއްވެސް ވާދަވެރިކަމެއްގައި ޗައިނާއާއެކު މަސައްކަތްކުރުމުގެ ވިސްނުން އޮސްޓްރޭލިއާގެ ނެތްކަމަށެވެ. އަދި އެގައުމުން މަސައްކަތްކުރާނީ ޔޫރަޕިއަން ޔޫނިއަންއާއި، އިންޑޮނީޝިއާ، އިންޑިއާ، އިނގިރޭސިވިލާތް އަދި މެދުއިރުމައްޗާއެކު ކުރާ ވިޔަފާރި އިތުރުކޮށް، ސިންދަފާތުކުރުމަށްކަމަށްވެސް އޭނާ ވިދާޅުވިއެވެ.

އެމެރިކާގެ ރައީސް ޑޮނަލްޑް ޓްރަމްޕް ބައެއް ގައުމުތަކަށް އިއުލާންކުރެއްވި ބޮޑެތި ޓެރިފްތައް ނެގުން ވަގުތީ ގޮތުން ފަސްކުރަން މިހާރު ވަނީ ނިންމަވާފައެވެ. އެހެންނަމަވެސް ޗައިނާއިން އެތެރެކުރާ މުދަލުން ނަގަން އެންމެ ފަހުން އިއުލާންކުރި 104 އިންސައްތައިގެ ޓެރިފް މިހާރު ވަނީ 125 އިންސައްތައަށް ބޮޑުކޮށްފައެވެ. ކުރިން އިއުލާންކުރި ޓެރިފް ލިސްޓްގައި އޮސްޓްރޭލިއާ އޮތީ އެންމެ ކުޑަކޮށް ޓެރިފްނަގާނެ ގައުމުތަކުގެ ތެރޭގައެވެ. އެގޮތުން އޮސްޓްރޭލިއާއިން އެތެރެކުރާ މުދަލުން 10 އިންސައްތަ ޓެރިފް ނެގުމަށް ވަނީ ނިންމާފައެވެ.