މުދައްރިސުންނަކީ ދުނިޔެއާއި އާޚިރަތުގެ ހެޔޮ މަގަށް އަލިކޮށްދޭ ދަންމަރުތަކެއް ކަމަށާ، އެ ބޭފުޅުން އެ ކުރައްވާ މަސައްކަތަކީ ނަބީބޭކަލުން ކުރެއްވި މަސައްކަތްޕުޅު ކަމުގައި މިއަދުގެ ހުކުރު ޚުތުބާގައި ބުނެފިއެވެ. 

އައު ދިރާސީ އަހަރު ފެށުމާ ގުޅިގެން ދެވުނު މި ޚުތުބާގައި ތަޢުލީމާއި ތަރުބިޔަތުގެ މުހިންމުކަމާއި، މުދައްރިސުންގެ މަތިވެރި ދައުރުގެ މައްޗަށް އަލިއަޅުވާލާފައިވެއެވެ.

އެގޮތުން ޚުތުބާގައި ބުނީ، މާތް ނަބިއްޔާ مُـحَمَّدٌ ﷺ ތަޢުލީމު ފެތުރުއްވުމަށް ވަރަށް ބޮޑު އިސްކަމެއް ދެއްވި ކަމަށެވެ. އަދި މުސްލިމުންގެ ހިތްތަކުގައި ކީރިތި ރަސޫލާ ﷺ އިންދަވައިދެއްވި ޢިލްމުގެ އޮށްތަކުން ފެޅި ގަސްތައް ބިޔަވެ، ޒަމާނާއި، ޙާލަތާ ފައިހަމަވާ ބަޔަކު ބިނާކުރި، އުފެއްދުންތެރި އުއްމަތަކަށް އިސްލާމީ އުއްމަތް ވި ކަމަށެވެ.

Advertisement

މިއާއެކު ޚުތުބާގައި ވަނީ މި ފެށުނު ދިރާސީ އަހަރު، އިސްލާމް ދީނާއި ދުންޔަވީ ރޮނގުތަކުން އިތުރު ކުރިއެރުންތަކެއް ލިބޭތޯ ގަދައަޅައި މަސައްކަތްކުރާން ދަރިވަރުންނަށް ނަޞޭޙަތްތެރިވެފައެވެ.

މީގެ އިތުރުން ޚުތުބާގައި ވަނީ، އެދުރުންނަކީ ކިޔަވައިދެއްވާ ކުދިން، ނަމޫނާއަކަށް ބަލާނޭ ބައެއްކަން ފާހަގަކޮށް، އެ ކުދީންނަށް ރަނގަޅު ކަމުގައި ފެންނާނީ، އެދުރުން އެކުދީންނަށް ރަނގަޅުކަމުގައި ދެއްކި ކަމެއް ކަމުގައި ބުނެފައެވެ.

އަދި ދަރިވަރުންނަށް އިސްލާމްދީނާއި ޤައުމު ދެކެ ލޯބިވާ، ޤައުމުގެ މިނިވަންކަމާއި ސިޔާދަތު ދަމަހައްޓަން ދަންނަ ބަޔަކަށް ހެދުމަށް މުދައްރިސުންނަށް ގޮވާލާފައި ވެއެވެ. އަދި ދަރިވަރުންނަށް ވެސް އިސްލާމްދީނާއި ދިވެހި ޤައުމު ދެކެ ލޯބިވާ ދަރީންނަށް ވުމަށް އިލްތިމާސްކޮށްފައެވެ.

ޚުތުބާގައި ވަނީ ތަރައްޤީގެ އަސާސަކީ ތަޢުލީމާއި ތަރުބިޔަތު ކަމަށް ބަޔާންކޮށް، މި ދާއިރާއަށް އިސްކަންދިނުމުގެ މުހިންމުކަން ފާހަގަކޮށްފައެވެ.