އަވައްޓެރި އިންޑިއާ އަދި ނޭޕާލުގައި އާދަޔާހިލާފަށް ގުގުރައި ހޮނުއެޅުމުގެ ސަބަބުން 69 މީހުން މަރުވެއްޖެެވެ.

އިންޑިއާގެ ބިހާރު ސްޓޭޓުގެ އޮފިޝަލުން މިއަދު ބުނި ގޮތުގައި ބުރާސްފަތި ދުވަހާއި ހުކުރު ދުވަހު ކުރިމަތިވި ގުގުރުމާއި ހޮނުއެޅުމުގެ ހާދިސާގެ ސަބަބުން 61 މީހުން މަރުވެފައިވާ ކަމަށެވެ. އިންޑިއާގެ މޫސުމާބެހޭ އިދާރާއިން ލަފާކޮށްފައިވާ ގޮތުގައި ބިހާރު ސްޓޭޓަށް މިއަދުވެސް ބޯކޮށް ވާރޭވެހި ގުގުރުމުގެ ފުރުޞަތު ބޮޑު ކަމަށެވެ.

ނޭޕާލްގެ އޮފިޝަލުން އޭއެފްޕީއަށް މަޢުލޫމާތު ދިން ގޮތުގައި މި ދެދުވަހު ކުރިމަތިވި ގުގުރުމާއި ހޮނުއެޅުމުގެ ސަބަބުން 8 މީހުން މަރުވެފައިވެއެވެ. އެޤައުމަށްވެސް ކުރިއަށްއޮތީ މޫސުން ގޯސް ދުވަސްވަރެއްކަމަށް މޫސުމާ ބެހޭ އިދާރާއިން ބުނެއެވެ.

ފާއިތުވި އަހަރުތަކުގައި މޫސުމަށް އަންނަމުންދިޔަ ބަދަލުތަކުގެ ސަބަބުން އިންޑިއާގައި ހޮނުއެޅުމުގެ ހާދިސާތައް ވަނީ ގިނަވެފައެވެ. އާބާދީގެ ގޮތުން ދުނިޔޭގެ އެންމެ ބޮޑު ޤައުމު ކަމުގައިވާ އިންޑިއާގައި މިފަދަ ހާދިސާތަކުގައި އަހަރަކު 1,900 އާ ގާތްކުރާ މިންވަރަކަށް މީހުން މަރުވެއެވެ.

ކޮންމެ އަހަރަކުވެސް ފެންބޮޑުވުމާއި ވިއްސާރައިގެ ސަބަބުން ގިނަ އަދަދަކަށް މީހުން މަރުވަމުންދެއެވެ. މިގޮތުން ދުނިޔޭގެ ފިނިހޫނުމިން މައްޗަށް ދިއުމުގެ ސަބަބުން މޫސުމަށް އަންނަ ބަދަލުތައް އިތުރުވެ، އާދަޔާ ޚިލާފު މޫސުމީ ނުރައްކާތައް އިތުރުވަމުންދާ ކަމަށް ސައިންޓިސުވެރިން އިންޒާރު ދެއެވެ.

..