އިންޑިއާގައި އެޤައުމުގެ ސަރުކާރުގެ ބާރު އޮންނަގޮތަށް މުސްލިމުންގެ ވަޤްފް ބިންތަކުގެ މައްޗަށް ފާސްކުރި ބިލްގެ މައްސަލާގައި ވެސްޓް
ބެންގާލް ސްޓޭޓްގައި ކުރިއަށްގެންދިޔަ މުޒާހަރާތަކުގައި ތިން މީހަކު މަރުވެއްޖެއެވެ.
މުޒާހަރާ ހޫނުވީ ސަލާމަތީބާރުތަކުން ބާރުގެ ބޭނުންކުރަން ފެށުމުންނެވެ. އެގޮތުން ސިފައިން ވަނީ މުޒާހަރާގެ ބައިވެރިންނަށް އަމާޒުކޮށް ކަރުނަގޭސް ޖަހާފައެވެ. މުޒާހަރާގެ ތެރޭގައި ހިނގާދިޔަ ހަމަނުޖެހުންތަކަށްފަހު އެންމެފަހުން ކުޑަކުއްޖެއް ހިމެނޭހެން ޖުމްލަ ތިން މީހަކު މަރުވެފައިވާ ކަމަށް ފުލުހުން ވަނީ ހޮނިހިރިދުވަހު އޭއެފްޕީއަށް މައުލޫމާތު ދީފައެވެ.
ބެންގާލް ސްޓޭޓްގެ ފުލުހުންގެ އިސް އޮފިޝަލެއް ކަމަށްވާ ޖާވިދު ޝަމީމް ވިދާޅުވީ، ހަމަނުޖެހުންތަކާ ގުޅިގެން މިހާތަނަށް 118 މީހަކު ހައްޔަރުކޮށްފައިވާ ކަމަށެވެ. އެ ސްޓޭޓްގެ ހައި ކޯޓުން ވަނީ ފެޑެރަލް ސިފައިން ނެރެގެން މުޒާހަރާ ކޮންޓްރޯލްކުރަން އަންގައިފަ އެވެ.
ސަރުކާރުން ބުނާ ގޮތުގައި ގާނޫނަށް ގެނައި އިސްލާހުތަކާ އެކު، މުސްލިމުންގެ ވަގުފް މުދާތައް ކޮންޓްރޯލް ކުރާ ވަގުފް ބޯޑުތައް ޖަވާބުދާރީ ކުރުވައި، އެ ކަންކަމުގައި ހާމަކަން ބޮޑުވެގެން ދާނެއެވެ. ނަމަވެސް އިދިކޮޅު ފަރާތްތަކުން ބުނަމުން ދަނީ މިއީ އިންޑިއާގެ މުސްލިމުންނާ މެދު ގެންގުޅޭ ތަފާތުކުރުން ހާމަވާ އިންސާފުން އެއްކިބާވެފައިވާ ބަދަލުތަކެއް ކަމަށެވެ. އަދި މިއީ ބޮޑުވަޒީރު ނަރެންދުރަ މޯދީގެ ބާރަތިޔާ ޖަނަތާ ޕާޓީ (ބީޖޭޕީ) ހަރުކަށި ފިކުރަށް ތާއީދު އިތުރުކުރުމުގެ ނިންމުމެއް ކަމަށް ވެސް ދަނީ ބުނަމުންނެވެ.
Advertisement
This content is created and paid for by advertisers and does not involve Voice Journalists
