ޖަނަވަރީ1, 2007 އިން ފެށިގެން އުފަންވެފައިވާ / އުފަންވާ ހުރިހާ ކުދިން ދުންފަތުގެ ބާވަތްތައް ގަތުމާއި ވިއްކުމާއި، ދުންފަތުގެ އިސްތިއުމާލު ކުރުން ހިމެނޭގޮތަށް “ޖެނެރޭޝަނަލް ބޭން” އެއް ތަންފީޒުކުރަން ވަޒީރުންގެ މަޖިލީހުން މިއަދު ނިންމައިފި އެވެ.

ވަޒީރުންގެ މަޖިލީސް މިއަދު އެއްވީ ދުންފަތުގެ އިސްތިއުމާލުކުރުމުން ދުރުކުރުމަށް، “ޖެނެރޭޝަނަލް ބޭން” ކަނޑައެޅުއްވުމާމެދު ގޮތެއް ނިންމެވުމަށެވެ.

ކެބިނެޓްގެ ނިންމުން ދެންމެ ވަނީ ހާމަކޮށްފަ އެވެ. އެ ނިންމުމުގައި ބުނެފައި ވަނީ ދިވެހިރާއްޖޭގައި ދުންފަތުން ރައްކާތެރިކުރެވިފައިވާ ޖީލެއް ބިނާކުރުމަށް ޖަނަވަރީ 1، 2007 އިން ފެށިގެން އުފަންވެފައިވާ/އުފަންވާ ހުރިހާ ކުދިން ދުންފަތުގެ ބާވަތްތައް ގަތުމާއި ވިއްކުމާއި، ދުންފަތުގެ އިސްތިއުމާލު ކުރުން ހިމެނޭގޮތަށް “ޖެނެރޭޝަނަލް ބޭން” އެއް ތަންފީޒުކުރަން ނިންމާފައިވާ ކަމަށެވެ.

Advertisement

އަދި މި ޖެނެރޭޝަނަލް ބޭން ތަންފީޒުކުރުމަށް ޤާނޫނާއި ގަވާއިދުތަކަށް ގެންނަންޖެހޭ އިޞްލާޙުތައް ގެނައުމަށްޓަކައި، ތަންފީޒީ އިދާރާތަކުން ކުރަންޖެހޭ ކަންކަން ކުރުމާއި މިގޮތުން މި ޤާނޫނަށް އިޞްލާޙު ގެނެސް ތަޞްދީޤުކުރާ ތާރީޚުން ފެށިގެން ޤާނޫނަށް ޢަމަލުކުރުމަށް 6 މަސްދުވަހުގެ މުއްދަތެއް ދިނުމަށް ފަހު، ނޮވެންބަރު 1، 2025 ގައި މި ޤާނޫނު ތަންފީޒުކުރަން ފެށުމަށް ވަނީ ނިންމާފަ އެވެ.

މީގެ އިތުރުން، ޓޮބޭކޯ ސިޒޭޝަންގެ ޚިދުމަތްތައް އިތުރަށް ހަރުދަނާކުރުމަށްޓަކައި ކުރަންޖެހޭ ކަންކަން ކުރުމަށްޓަކައި، މިނިސްޓްރީ އޮފް ފިނޭންސް އެންޑް ޕްލޭނިން އިން މިނިސްޓްރީ އޮފް ހެލްތަށް ދޭންޖެހޭ އެއްބާރުލުން ދިނުމަށް ވެސް ވަނީ ނިންމާފަ އެވެ.

މިއަދުގެ ވަޒީރުންގެ މަޖިލީހުގެ ޖަލްސާއަށް ވަޑައިގެންނެވުމުގެ ކުރިން އާއްމު ކުރެއްވި ވީޑިއޯ މެސެޖެއްގައި ރައީސް މުޢިއްޒު ވަނީ، ދުންފަތުގެ އިސްތިޢުމާލުގެ ސަބަބުން ފުރާނަ އަށާއި ސިއްޙަތައް ނުރައްކާވާކަން ފާހަގަކުރައްވައި، ތަފާސް ހިސާބު ތަކުގެ އަލީގައި އެކަންކަން ސާބިތު ކޮށްދެއްވާފައެވެ. 

މީގެ އިތުރުން 2021 ވަނަ އަހަރުގެ ތެރޭގައި ހެދުނު، ގައިން ގަޔަށް ނާރާ ބަލިތައް ޖެހޭ ސަބަބު ތަކާ ބެހޭ ސާވޭ ދައްކާ ގޮތުގައި، 15 އަހަރާއި 29 އަހަރާ ދޭތެރޭގެ 21.8 އިންސައްތަ ޒުވާނުންނަކީ ދުންފަތުގެ އިސްތިޢުމާލުކުރާ މީހުންކަން އެނގޭކަމަށް ރައީސް ވިދާޅުވިއެވެ. 

ހަމަ އެހެންމެ، މުޅި ދުނިޔޭގައި ހެދުނު ގްލޯބަލް ޔޫތް ޓޮބޭކޯ ސާވޭ ދައްކާގޮތުން، ސުކޫލު އުމުރު ފުރައިގެ ކުދިންގެ ތެރެއިން 45 އިންސައްތަ ކުދިންނަކީ ދުންފަތުގެ އިސްތިޢުމާލު ކުރާ ކުދިންކަން ވެސް ރައީސް ފާހަގަކުރެއްވިއެވެ. 

ރައީސް އިތުރަށް ވިދާޅުވީ، ރާއްޖޭގެ އާބާދީއަކީ، ހަތަރު ލައްކަ އެގާރަހާސް ހަތް ސަތޭކަ ސާޅީސް އެކެއް ކަމުގައިވާއިރު، ގައިން ގަޔަށް ނާރާ ބަލިތަކުން ޖެހޭ ނިސްބަތް އާބާދީއާ ބަލާއިރު ވަރަށް ބޮޑު ކަމަށެވެ. އެގޮތުން، ޖެހޭ ކެންސަރު ބައްޔާއި، ހިތުގެ ބަލި ފަދަ ބަލިތަކުން ސަލާމަތްކޮށްދިނުމަށް އެންމެން ގުޅިގެން މަސައްކަތް ކުރަންޖެހޭ ކަމަށް ރައީސް ވިދާޅުވިއެވެ.