ޗައިނާގެ އުތުރަށް ގަދަ ވައިޖެހޭނެ ކަމުގެ އިންޒާރު ދީފައިވާތީ، އެ ސަރަހައްދުހައްދުގައި ދިރިއުޅެމުންދާ މިލިއަނެއްހާ ރައްޔިތުން ގޭގައި ތިބުމަށް އިރުޝާދު ދީފިއެވެ.

ޚާއްޞަކޮށް 50 ކިލޯއަށްވުރެ ލުއި މީހުން "ފަސޭހައިން ވިއްސައިގެން ހިނގައިދާނެ" ކަމަށް ބުނެ، އެފަދަ މީހުން ގޭގައި ތިބުމަށް އިރުޝާދު ދީފައިވެއެވެ.

މޮންގޯލިއާއިން ޗައިނާގެ އުތުރަށް ޖެހޭ މި ގަދަ ވައިގެ ސަބަބުން، ބީޖިންގ، ޓިއަންޖިން އަދި ހެބެއި ސަރަހައްދުގައި ގަޑިއިރަކު 150 ކިލޯމީޓަރުގެ ބާރުމިނުގައި ވައިޖެހޭނެ ކަމަށް ލަފާކުރެވެއެވެ. މިއީ ވޭތުވެދިޔަ 10 އަހަރު ތެރޭގައި އެންމެ ގަދައަށް ވައިޖެހޭނެ ކަމަށް ލަފާކުރެވޭ ދުވަސްވަރެވެ.

Advertisement

ބީޖިންގ މެޓިއޮރޮލޮޖިކަލް ސަރވިސްއިން ބުނެފައިވަނީ، "މި ގަދަ ވައި ވަރަށް ނުރައްކާތެރި، ދިގު މުއްދަތަކަށް ދެމިގެންދާނެ، އަދި ފުޅާ ސަރަހައްދަކަށް އަސަރުކުރާނެ" ކަމަށެވެ.

މިދިޔަ ހޮނިހިރު ދުވަހު އެންމެ ގަދައަށް ވައިޖެހިފައިވާއިރު، ބީޖިންގގެ ފިނިހޫނުމިން 24 ގަޑިއިރުގެ ތެރޭގައި 13 ޑިގްރީ ސެލްސިއަސް ދަށަށް ދިޔަ ކަމަށް ވެސް ބުނެފައިވެއެވެ.

މި ހާލަތާ ގުޅިގެން، މަސައްކަތްތެރިންނަށް އަވަހަށް ގެއަށް ދިއުމަށް އަންގާފައިވާއިރު، ސްކޫލްތައްވެސް ބަންދު ކޮށްފައިވެއެވެ. އަދި ބޭރުގައި ބޭއްވުމަށް ހަމަޖެހިފައިވާ ހުރިހާ ހަރަކާތެއް ވެސް މެދުކަނޑާލާފައިވެއެވެ. މީގެ ތެރޭގައި ދުނިޔޭގެ ފުރަތަމަ ހިއުމަނޮއިޑް ރޮބޮޓް ހާފް މެރަތަން ވެސް ހިމެނެއެވެ. މި އިވެންޓް މިހާރު ބޭއްވުމަށް ހަމަޖެހިފައިވަނީ 19 އޭޕްރިލްގައެވެ.

އާންމު ރައްޔިތުންނަށް ބޭރަށް ނުނިކުތުމަށް އިރުޝާދު ދީފައިވާއިރު، ޕާކުތަކާއި ފަތުރުވެރިކަމުގެ މަންޒިލްތައްވެސް ބަންދުކޮށްފައިވެއެވެ. އަދި އިމާރާތްކުރުމުގެ މަސައްކަތްތަކާއި ބައެއް ރޭލް ޚިދުމަތްތައް ވެސް ވަނީ ހުއްޓާލާފައެވެ.

ވައިގައި ގަސްތައް ވެއްޓުނަ ނުދިނުމަށްޓަކައި، މުޅި ސިޓީގައި ހުރި ގަސްތައް ވަނީ ވަރުގަދަކޮށް، ހަރުކޮށްފައެވެ. ނަމަވެސް މިހާތަނަށް 300 އެއްހާ ގަސް ވެއްޓި ބައެއް ގޭގޭގެ ފުރާޅު ވިއްސައިގެން ގޮސްފައިވާ ކަމަށް ރިޕޯޓް ކޮށްފައިވެއެވެ.

މި ގަދަ ވައި މި ހަފްތާ ތެރޭގައި މަޑުވާން ފަށާނެ ކަމަށް ލަފާކޮށްފައިވާއިރު، އޭގެ ކުރިން ސަމާލުވެ ތިބުމަށް ވަނީ އިރުޝާދު ދީފައެވެ.