ޔުވެންޓަސްގެ ރަސްމީ އިންސްޓަގްރާމް ޕޭޖުގައި އިއްޔެ އާއްމު ކުރި، އދ މަހިބަދޫ ޕެލޭ ސްޓޭޑިއަމްގެ ޕޯސްޓާއެކު، އެ ދަނޑަށް ދުނިޔޭގެ ސަމާލުކަން ލިބިއްޖެއެވެ. 

އިޓަލީގެ މަޝްހޫރު ފުޓްބޯޅަ ޓީމު ކަމަށްވާ ޔުވެންޓަސްގެ 127 ވަނަ އަހަރީ ދުވަސް ފާހަގަކުރަން ’އެކްސްޓްރީމް ފީލްޑްސް' ގެ ނަމުގައި ދުނިޔޭގެ އެކި ހިސާބުތަކުން ފާހަގަކުރެވޭ އާދަޔާހިލާފު ތިން ފުޓްބޯޅަ ދަނޑެއްގައި ޚާއްސަ ހަރަކާތެއް ބާއްވާފައިވާއިރު، އެތަނުން އެއް ސްޓޭޑިއަމަކީ އދ މަހިބަދޫ ޕެލޭ ސްޓޭޑިއަމެވެ. 

މަހިބަދޫގެ ދަނޑު ޚިޔާރުކުރަން ޔުވެންޓަސް ނިންމި ސަބަބަކީ، އެ ދަނޑު ލޮކޭޝަނެވެ. އެގޮތުން، އަތިރިއާއި މޫދާއި ކައިރީގައި ހުންނަ އެ ދަނޑުގެ ޑްރޯން ފޮޓޯ ތަކަކީ މީގެ ކުރިންވެސް ދުނިޔޭގެ ފުޓުބޯޅަ ޕޭޖު ތަކަށް އަރާފައިވާ ރީތި ފޮޓޯ ތަކެކެވެ. ޚާއްސަކޮށް އެ ރަށަށް ނިސްބަތްވާ މުޙައްމަދު ނައުޝާދު ނަގާފައިވާ ފޮަޓޯތައް ވަރަށް ގިނަ ފޮލޯވަރުން ތިބޭ ޕޭޖުތަކުން ވަނީ ފެނިފައެވެ. 

އެހެން ކަމުން، ޔުވެންޓަސް ފޭން ޓީމުން މަހިބަދޫއަށް ޒިޔާރަތް ކުރުމަށް ނިންމައި، އެކަން ހަމަޖެއްސުމުގެ ކަންކަން ރޭވުމަށް ކޮންޓެކްޓް ކުރީވެސް އޭނައާއެވެ. 

މަހިބަދޫގެ އިތުރުން ޔުވެންޓަސްގެ އަހަރީ ދުވަހުގެ ހަރަކާތްތައް ބާއްވަން ކަނޑައެޅުނީ، އެމެރިކާގެ ނިއު ޔޯކާއި، ފެރޯ އައިލެންޑްސް އެވެ.

މަހިބަދޫގައި ޔުވެންޓަސްގެ ހަރަކާތް ބޭއްވުމަށް ޓީމުގެ ސަޕޯޓަރުންނާއި، އެ ޓީމުގެ ކުރީގެ މިޑްފީލްޑަރު ނެދަލެންޑްސްގެ އެޑްގާ ޑާވިޑްސް އދ. މަހިބަދޫ އަށް ޒިޔާރަތް ކޮށްފައިވާއިރު، މިމަހު 12 ވަނަ ދުވަހު ވަނީ ޚާއްސަ ފުޓުބޯޅަ މެޗެއް ބާއްވާފައެވެ. 

އެ މެޗުގައި، ޑޭވިޑްސް އާއި، ޔުވެންޓަސްގެ ފޭން ޓީމުން އައި މީހުންގެ އިތުރުން މަހިބަދޫގެ ކުޅުންތެރިންވެސް ކުޅެފައިވެއެވެ. 

އެފަހުން، އިއްޔެ، ޔުވެންޓަސްގެ އިންސްޓަގްރާމް ޕޭޖުގައި ހިއްސާ ކުރި، މެޗުގެ  ވީޑިއޯ އަކާއި ޑޭވިޑްސް އެކަނި ހިމެނޭހެން ނަގާފައިވާ ޑްރޯން ވީޑިއޯއެއް މިލިއަނަކަށްވުރެ ގިނަ މީހުން ބަލާފައިވާއިރު، އެއަށް ކޮމެންޓް ކުރި މީހުން ވަނީ ވީޑިއޯ އިން ފެންނަ ދަނޑުގެ ރީތި މަންޒަރަށް ތަޢުރީފް ކޮށްފައެވެ. 

ޔުވެންޓަސް އަކީ އިޓަލީގެ ޗެމްޕިއަންކަން 36 ފަހަރު ހޯދާފައިވާ ޓީމެވެ. ޔޫރަޕުގެ ޗެމްޕިއަންކަން ވެސް އެ ޓީމުން ދެ ފަހަރު ހޯދި އެވެ. އެ ޓީމަށް ވަނީ ކްރިސްޓިއާނޯ ރޮނާލްޑޯ ޖިއަންލުއިޖީ ބުފޮން، މިޝޭލް ޕްލެޓިނީ، ޒައިނުއްދީން ޒިދާން، ފަބިއޯ ކަނަވާރޯ، އަދި ރޮބާޓޯ ބާޖިއޯ ފަދަ ތަރިން ކުޅެފަ އެވެ.