ކުދީންނާއި ގުޅުވާ ދޮގު ވާހަކަތައް ފެތުރުމަކީ ވަރަށް ހިތްދަތިވެ ދެރަވާ ކަމެއް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ މިއަދު އާންމުކުރި "ސްޕޮޓް އޮން"ގެ ފުރަތަމަ އެޕިސޯޑްގައި ވާހަކަފުޅުދައްކަވަމުންނެވެ.
ވޭޕް މަނާކުރުމަށް ސަރުކާރުން ނިންމި ނިންމުމާއި ގުޅުވާ ރައީސްގެ ދޮށީ ފިރިހެން ދަރިކަލުންނާއި ގުޅޭގޮތުން އިދިކޮޅުގެ ބައެއް ސަޕޯޓަރުން ގެންދަނީ ހަގީގަތެއް ނެތް ދޮގު ވާހަކަތަކެއް ފަތުރަމުންނެވެ. އެފަދަ ވާހަކަތައް ސިޔާސީ ބައެއް ވެރީން ވެސް ދައްކަވަ އެވެ.
އެ ވާހަކަތަކާއި ގުޅޭގޮތުން ސުވާލު ކުރުމުން ރައީސް ވިދާޅުވީ އެމަނިކުފާނުގެ އާއިލާއާ ކުދީން ދެކެ ވަރަށް ވަރަށް ބޮޑަށް ލޯބިވާ ކަމަށެވެ. އަދި އާއިލާއާ ކުދީންނާއި ގުޅުވާ ދޮގު ވާހަކަތައް ފެތުރުމަކީ ވަރަށް ހިތްދަތިވާ ކަމެއް ކަމަށެވެ.
އެމަނިކުފާނަކީ ވެސް އިންސާނެއްގެ ހައިސިއްޔަތުން އެފަދަ ވާހަކަތަކުން އަސަރު ކުރާނެ ކަމަށާ ނަމަވެސް އެފަދަ ކޮންމެ ކަމެއްގައި ކެތްތެރިކަން އިސްކުރައްވާ ކަމަށެވެ.
ރައީސް ވަނީ އެމަނިކުފާނުގެ ބޭފުޅުންނަށް ފުރިހަމައަށް އިތުބާރު ކުރައްވާ ކަމަށް ވިދާޅުވެފަ އެވެ.
“އެ ކުދީން ވަރަށް ރަނގަޅު ވާނެ. ނަމާދު ކުރާނެ. ވަރަށް އަހްލާގު ރަނގަޅު ވާނެ. ދުވަހަކު ވެސް ގޯސް ކަމެއް މިހާތަނަށް ކޮށްފައެއް ނެތް، ނުވެސް ކުރާނެ. ޔަގީން،”
ރައީސް ވިދާޅުވީ އެމަނިކުފާނު "ޕާސަނަލީ ވަރަށް ކެތްތެރިވަން" ކަމަށާ ނަމަވެސް އެހެން އާއިލާތަކަށް އެފަދަ ކަންކަމުގެ ހިތްދަތިކަން ބަރުދާސް ކުރަން ޖެހޭ ހާލަތަށް ދިއުމުން މުޅި ގައުމުގެ ހައްގުގައި ކުރަން ޖެހޭ ކަންކަން ކުރައްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
