މާލޭގެ ގެއެއްގެ ފުރާޅުމައްޗަށް އަންހެނަކު ވެއްޓުނު ހާދިސާއާ ގުޅުވާ ޓްރާސްޕޯޓް މިނިސްޓަރު މުހައްމަދު އަމީނަށް ތުހުމަތު ކޮށް ދައްކާ ވާހަކަތަކާއި ގުޅިގެން މިނިސްޓަރު އަމީން ވާހަކަ ދައްކަވައި ފަތުރަމުންދާ ވާހަކަތައް ދޮގު ކުރައްވަައިފި އެވެ.

އަމީން ވަނީ އެކްސްގައި ކުރެއްވި ޕޯސްޓެއްގައި އެކަން ދޮގު ކުރަައްވާ ސްޓޭޓްމަންޓެއް އާންމު ކުރަައްވާފަ އެވެ.

އިމާރާތުގެ މަތީން ވެއްޓި މިވަގުތު ވަރަށް ކްރިޓިކަލް ހާލަތެއްގައި އޮތް އުމުރުން 21 އަހަރުގެ އަންހެން މީހާއަށް އަވަސް ޝިފާއަކަށް އެދިވަޑައިގެން އަމީން ވިދާޅުވީ އޭނާ ދިރިއުޅޭ އިމާރާތުގައި މި މަހުގެ 18 ވަަނަ ދުވަހުގެ ރޭ ހިނގި ކަންކަމާ އެއްވެސް ގުޅުމެއް ނޯންނާނެ ކަމަށެވެ.

Advertisement

އަދި އެއީ މިނިސްޓަރުގެ އެޕާޓްމަންޓްގައި ހިނގި ކަމެއް ނޫން ކަމަށާ އެކަމުގެ އެއްވެސް މައުލޫމާތެއް ވެސް އެނގިވަޑައިނުގަންނަވާ ކަމަށެވެ. މިނިސްޓަރު ވިދާޅުވީ އެމަނިކުފާނުގެ އެޕާޓްމަންޓުން ބޭރުން ހިނގާ ކަމެއް ހުއްޓުވުމުގެ ބާރެއް ނޯންނާނެ ކަމަށެވެ.

އެކަމުގައި އަމީންގެ ދެ ކޮއްކޮއެއް ހިމެނޭ ކަމަށާ އެ މީހުންނާއި ސުވާލުކޮށްފައިވާ ކަމަށް ވެސް ވިދާޅުވި އެވެ. މިނިސްޓަރު ވިދާޅުވި ގޮތުގައި އެ ރޭގެ ހާދިސާގެ މައުލޫމާތު ފުރަތަމަ ލިބުނީ ވެސް އަނެއް ދުވަހުގެ ހަވީރު އެވެ.

އަދި އެމަނިކުފާނަކީ ތަހުގީގީ އެއްވެސް އިދާރާއެއްގެ މެންޑޭޓް އޮތް މިނިސްޓްރީއެއް ހިންގަވާ ބޭފުޅެއް ނޫން ކަމަށާ އެ މައްސަލައިގެ އެއްވެސް މައުލޫމާތެއް ހޯދުމަށް ތަހުގީގީ އެއްވެސް އިދާރާއަކަށް ނުފޫޒު ފޯރުވުމަށް އެއްވެސް ކަމެއް ނުކުރާ ކަމަށެވެ. އަދި ސަރުކާރުގެ އެއްވެސް ވެރިއަކަށް އެ މައްސަލާގައި ގުޅާފައި ވެސް ނުވާނެ ކަމަށް ވިދާޅުވި އެވެ.

މިނިސްޓަރު ވަނީ ސޯޝަލް މީޑިއާގައި ފަތުރަމުންދާ ވާހަކަތަކުގެ އެއްވެސް ހަގީގަތެއް ނެތް ކަމަށް ވިދާޅުވެފަ އެވެ.