އިސްރާއީލުގެ ނިރުބަވެރިން ޣައްޒާއަށް ދެމުންދާ ހަމަލާތައް އިތުރަށް ހަރުކަށިވެ، އިއްޔެ ހޮނިހިރު ދުވަހު އެކަނި 40 އަށްވުރެ ގިނަ ފަލަސްތީނުން ޝަހީދުކޮށްލައިފިއެވެ.

މި ހަމަލާތައް ދީފައިމިވަނީ ޣައްޒާގެ ބޯޑަރުތައް ބަންދު ކުރުމުގެ ސަބަބުން އެ ތަނުގެ މުސްލިމުން "ބަނޑަށްޖެހިފައިވާ" ކަމަށް އެހީގެ ޖަމާއަތްތަކުން އިންޒާރުދެމުންދާ ދަނޑިވަޅެއްގައެވެ.

ޤަތުލު އާއްމު މެދުކަނޑާލުމަށްފަހު މާރިޗު 18 ގައި އަލުން ފަށާފައިވާއިރު، އިސްރާއިލުން ދަނީ ހުއްޓުމެއްނެތި ޣައްޒާއަށް ބޮން އަޅަމުންނެވެ.

ހަމާސް އިން ބުނެފައިވާ ގޮތުގައި، އެ ޖަމާއަތުން މިސްރުގެ ވެރިރަށް ކައިރޯގައި ހަނގުރާމަ ހުއްޓުވުމާއި، ގައިދީން ދޫކޮށްލުމާއި، ޣައްޒާ އަލުން އާރާސްތުކުރުމުގެ މަސައްކަތްތައް ހިމެނޭ ފުރިހަމަ އެއްބަސްވުމަކަށް ވާސިލުވުމުގެ މަޝްވަރާތައް ދަނީ ކިރަމުންނެވެ. މި މަޝްވަރާތަކުގައި ބައިވެރިވި ހަމާސްގެ ވަފުދުގެ އިސްވެރިޔާއަކީ މުޖާހިދު މުޙައްމަދު ދަރުވީޝްއެވެ.

މި ބައްދަލުވުމުގައި ޣައްޒާގެ އިންސާނީ ހާލަތާ ބެހޭ ގޮތުން ވެސް މަޝްވަރާކުރެވުނު. ދެ މަސް ދުވަހުގެ މުއްދަތަށް އެއްކޮށް ޣައްޒާ ބަންދު ކުރުމަށްފަހު، އެހީއާއި ކާބޯތަކެތި ވެއްދުން ހުއްޓުވާފައިވާ ކަން ފާހަގަކުރެވުނު،" ހަމާސް އިން ބުނެފައިވެއެވެ.

މި ދަނޑިވަޅުގައި، އެމެރިކާއިން ޔަމަނުގެ ހޫތީންނާ ދެކޮޅަށް ހިންގަމުންދާ ހަމަލާތައް ވެސް ދަނީ ކުރިއަށެވެ. މީޑިއާ ރިޕޯޓުތަކުން ބުނާ ގޮތުގައި، ޔަމަނުގެ ވެރިރަށް ސަނާގެ އެކި ސަރަހައްދުތަކަަހައްދުތަކަށް އެމެރިކާއިން ދިން ހަމަލާތަކުގައި މަދުވެގެން 8 މީހުން ޒަޚަމްވެފައިވެއެވެ.

ޣައްޒާގެ ސަރުކާރުގެ މީޑިއާ އޮފީހުން އަޕްޑޭޓްކޮށްފައިވާ ތަފާސްހިސާބުތަކުން ދައްކާ ގޮތުގައި، މިހާތަނަށް 61,700 އަށްވުރެ ގިނަ ފަލަސްތީނުން ޝަހީދުވެފައިވެއެވެ. މީގެ ތެރޭގައި ހަލާކުވެފައިވާ އިމާރާތްތަކުގެ ތެރެއިން ނުފެނި ގެއްލިފައިވާ މީހުން ހިމެނެއެވެ. އަދި މަދުވެގެން 51,495 ފަލަސްތީނުން ޝަހީދުވެފައިވާކަން ކަށަވަރުވެފައިވާ އިރު، 117,524 މީހުން ޒަޚަމްވެފައިވެއެވެ.