ފަރަންސޭސިވިލާތުން އުފައްދާ ރަފޭލް މަރުކާގެ 26 ހަނގުރާމަމަތީ ޖެޓް ގަތުމަށް އިންޑިއާއިން ހޯމަ ދުވަހު އެއްބަސްވުމެއްގައި ސޮއިކޮށްފިއެވެ.
މި 26 ޖެޓްގެ އަގު 7.41 ބިލިއަން ޑޮލަރަށް އަރައެވެ. މި ޖެޓްތައް ގަތުމަށް އިންޑިއާގެ ސެކިއުރިޓީ ކެބިނެޓުން މިމަހުގެ ކުރީކޮޅު ވަނީ ރުހުން ދީފައެވެ. ފަރަންސޭސީ ފަހުގެ ޖެޓްތައް ގަތުމަށް އިންޑިއާއިން އަނެއްކާވެސް އެއްބަސްވުމެއްގައި ސޮއިކޮށްފައި މިވަނީ އެގައުމުގެ ދިފާޢީ ވަސީލަތްތައް ޒަމާނީކޮށް ތަރައްޤީކުރުމަށް ބޮޑުވަޒީރު ނަރެންދްރަ މޯދީ ގެންގުޅުއްވާ ސިޔާސަތުގެ ތެރެއިންނެވެ. މި ސިޔާސަތުގެ ތެރެއިން އިންޑިއާއިން ކުރަމުންދާ އެއް މަސައްކަތަކީ ރަޝިޔާގެ އަސްކަރީ އުފެއްދުންތަކަށް ބަރޯސާވެފައިވާ އޮތުން ކުޑަކުރުމެވެ.
އިންޑިއާއިން ގަންނަން އުޅޭ ބާވަތުގެ ޖެޓެއް... ފޮޓޯ: ފައިނޭންޝަލް ޓައިމްސް
އިންޑިއާގެ ވައިގެ ސިފައިންގެ ގިނަ ޖެޓްތަކަކީ ރަޝިޔާގެ އުފެއްދުންތަކެވެ. އެހެންނަމަވެސް މިހާރުވެސް ފަރަންސޭސީ އަސްކަރީ ހާޑްވެއަރ އިންޑިއާއިން ބޭނުންކުރެއެވެ. އެގޮތުން 1980 ގެ އަހަރުތަކުގައި ގަތް މިރާޖް 2000 މަރުކާގެ އަސްކަރީ ޖެޓްތަކާއި ފަރަންސޭސީ ސްކޯޕީން ކްލާސް ސަބްމެރިން ހިމެނެއެވެ.
މިފަހަރު އޯޑަރު ދިން ރަފޭލް ޖެޓްތަކަކީ އިންޑިއާގެ ކަނޑުގެ ސިފައިންގެ ބޭނުމަށް އޯޑަރުކުރި ޖެޓްތަކެވެ. އިންޑިއާގެ ވައިގެ ސިފައިން މިހާރުވެސް 36 ރަފޭލް ޖެޓް ބޭނުންކުރިނަމަވެސް ކަނޑުގެ ސިފައިން މައިގަނޑު ގޮތެއްގައި ބޭނުންކުރަނީ ރަޝިޔާގައި އުފައްދާ މިގް-29 ޖެޓްތަކެވެ.
Advertisement
This content is created and paid for by advertisers and does not involve Voice Journalists
