އިސްރާއީލޭ ކިޔާ ޤައުމެއް ފަލަސްތީނުގެ ބިމުގައި ގަދަކަމުން އުފެއްދުމުގެ އެތަކެއްހާސް އަހަރުކުރިއަށް ބަލާއިރު، ފަލަސްތީނަކީ ދަނޑުވެރިކަމަށް އެންމެ ފާހަގަކޮށްލެވޭ އެއް ޤައުމެވެ. ފަލަސްތީނުގެ ދަނޑުވެރިކަމުގެ ތާރީހު އަނެއްފުށަށް ޖެހުނީ އިސްރާއީލް ނަމުގައި ޤައުމެއް އުފައްދައި ފަލަސްތީނު ރައްޔިތުންނަށް ދުއްތުރާކުރަން ފެށި ހިސާބުންނެވެ. އިސްރާއީލް އުފެއްދުމަށްފަހު 1967 ވަނަ އަހަރަށްފަހު އެޤައުމުން ދިޔައީ ފަލަސްތީނުގެ ދަނޑުވެރިކަމަށް އެކިގޮތްގޮތުން ހުަރަސްތައް ކުރިމަތިކުރުވަމުންނެވެ. އެގޮތުން ދަނޑުތަކަށް ފެންފޯރުކޮށްދިނުމުގެ ނިޒާމު ފުނޑާލުމާއި ފަލަސްތީނުގެ ދަނޑުވެރިންގެ ތަކެތި އެޤައުމުން ބޭރަށް އެކްސްޕޯޓްކުރުމަށް އިސްރާއީލުން ދިޔައީ ފިއްތުންތައް ކުރިމަތިކުރުވަމުންނެވެ.

ފަލަސްތީނުގެ ތާރީހުގައިވެސް އިސްރާއީލްގެ ފަރާތުން އެޤައުމުގެ ދަނޑުވެރިންނަށް އެންމެބޮޑު މުސީބާތަކާ ކުރިމަތިލާންޖެހުނީ ވޭތުވެދިޔަ އަހަރުތަކުގައެވެ. އެގޮތުން 2023 ވަނަ އަހަރުގެ އޮކްޓޯބަރުމަހުން ފެށިގެން އިސްރާއީލުން ޢައްޒާގައި ހިންގަންފެށި ހަނގުރާމައިގެ ޖަރީމާތަކުގައި ފަލަސްތީނުގެ ދަނޑުވެރިކަން މުޅިންހެންވަނީ ފުނޑާލާފައެވެ. 

އިރެއްގައި ތަރުކާރީއާއި މޭވާގެ އިތުރުން އެއްގަމު މަސް ކައިގެން އުޅުނު ފަލަސްތީނުގެ ރައްޔިތުން މިއަދު ތިބީ ކާނެގޮތެއްނެތިފައެވެ. ފަލަސްތީނުގެ ރައްޔިތުންގެ ތެރެއިން ހާއްސަ ގޮތެއްގައި ޢައްޒާސިޓީގެ ރައްޔިތުން މިއަދު އުޅެމުންދަނީ ބަނޑުހައި ހޫނުކަންމަތީގައެވެ. ޢައްޒާގައި މިއަދު ތަރުކާރީ އާއި މޭވާއަކީ މަހުޖަނުންނަށް ނޫނީ ނުގަނެވޭނެ އަގުބޮޑު ތަކެއްޗެވެ. އެއްގަމު މަހަކީ މިހާރު ޢައްޒާއިން ލިބޭ އެއްޗެއް ނޫނެވެ. އަނެއްކޮޅުން ޢައްޒާއަށް ކާބޯތަކެތި ހިފައިގެންދާ ޓްރަކްޓަރުތައްވެސް އިސްރާއީލުން އޮތީ ހިސޯރުކޮށްފައެވެ. އިސްރާއީލް ސިފައިންގެ ދަތިކުރުންތަކާހެދި ޢައްޒާއަށް ކާނާގެ ބާވަތްތައް ވެއްދޭނެ ގޮތެއް ނެތެވެ.

މިހާލަތުގައި ޢައްޒާގެ ރައްޔިތުން މިހާރު ބަނޑުހައިހޫނުން ސަލާމަތްވުމަށް ކެއުމަށް ބޭނުންކުރަމުންދަނީ ވެލާމަހެވެ. ހާން ޔޫނިސްގެ ޓެންޓްތަކުގައި އުޅެމުންދާ މަސްވެރިން ކޮންމެ ދުވަހަކުމެ ވެލާ ހިފުމަށް ނިކުންނައިރު، ވެލާ މަހަކީ ޢައްޒާގެ ރައްޔިތުންނާ ވަރަށް ބީރައްޓެހި އެއްޗެކެވެ.

"މިއީ މީގެކުރިން އަހަރުމެން ކައި އުޅުނު އެއްޗެއް ނޫން. އެކަމް މިހާރު މި ނޫން އެއްޗެއް ނުލިބޭ" ހާން ޔޫނިސްގެ މޫދު ސަރަހައްދުގައި ޓެންޓް ޖަހައިގެން އުޅޭ އަބްދެލް ހާލިމް އަލް ޖަޒީރާއާ ވާހަކަދައްކަމުން ބުންޏެވެ. 

ޢައްޒާގެ ރައްޔިތުން ވެލާމަސް ހޯދުމަށް ކުރާ ދަތުރަކީވެސް ބިރުވެރިކަމުން ފުރިގެންވާ ދަތުރެކެވެ. އިސްރާއީލްގެ ސިފައިން އޮންނަނީ ފަލަސްތީނަށް ނިސްބަތްވާ ރައްޔިތުންނަށް މޫދަށްއެރި މަސްހިފުން މަނާކޮށްފައެވެ. މޫދަށް މަސްހިފަން ފައިބައިފިކަން އެނގިއްޖެނަމަ ވައިގެމަގުން އައިސް ހަމަލާދެއެވެ.

"ވެލާ ހިފުމަކީވެސް އަހަރުމެންނަށް ފަސޭހަކަމެއްނޫން. އަހަރެމެން މޫދުގައި ތިއްބާ ކިތަންމެ ދުވަހަކު ހަމަލާދީފައި އެބަހުރި. މިކަންކުރަނީ ފުރާނަ އަތްމައްޗަށް ލައިގެން. އެކަން ކީއްކުރާނީ ބަނޑުހައިހޫނުން ސަލާމަތްވާން މިނޫން އެހެންގޮތެއްނެތް" އަބްދެލް ބުންޏެވެ.

އިސްރާއީލުން ފަލަސްތީނު ރައްޔިތުންނަށް ދެމުންގެންދާ ހަމަލާތަކުގައި މިދިޔަ އަހަރު އެކަނިވެސް ފަލަސްތީނަށް ނިސްބަތްވާ 200 އަށްވުރެ ގިނަ މަސްވެރިންވަނީ ޝަހީދުކޮށްލާފައެވެ. މީގެ އިތުރުން މަސްވެރިކަމުގެ ވަސީލަތްތަކަށްވެސް ވަނީ ބޮޑެތި ގެއްލުންތަކެއްދީފައެވެ.