މިއަހަރުގެ ފުރަތަމަ ކުއާޓަރުގައި އުރީދޫ މޯލްޑިވްސްއަށް 168 މިލިއަން ރުފިޔާގެ ފައިދާއެއް ލިބިފައިވާކަމަށް އެކުންފުނިން ބުނެފިއެވެ.

އުރީދޫއިން ނެރެފައިވާ މިއަހަރުގެ ފުރަތަމަ ކުއާޓަރުގެ މާލީބަޔާނަށް ބަލާއިރު މި ކުއާޓަރުގައި އެކުންފުންޏަށް ވަނީ 547 މިލިއަން ރުފިޔާގެ އާމްދަނީގެ ލިބިފައެވެ. މިދިޔަ އަހަރުގެ ފުރަތަމަ ކުއާޓަރުގައި އުރީދޫއަށް އާމްދަނީގެ ގޮތުގައި ލިބިފައިވަނީ، 554 މިލިއަން ރުފިޔާއެވެ.

ފުރަތަމަ ކުއާޓަރުގައި އުރީދޫއަށް 168 މިލިއަން ރުފިޔާ ލިބުނުއިރު މިއީ މިދިޔަ އަހަރުގެ މި މުއްދަތާ އަޅާބަލާއިރު، 4 އިންސައްތަ އިތުރުވުމެކެވެ. މިދިޔަ އަހަރުގެ ފުރަތަމަ ކުއާޓަރުގައި އުރީދޫއަށް ފައިދާގެ ގޮތުގައި ލިބިފައިވަނީ 162 މިލިއަން ރުފިޔާއެވެ.

މިދިޔަ ކުއާޓަރުގެ މާލީބަޔާނުގެ ރިޕޯޓަށް ބަލާއިރު އެ ކުއާޓަރުގެ ތެރޭގައި އުރީދޫއިން ވަނީ ކަސްޓަމަރުންނަށް އަމާޒުކޮށް ގިނަ ހަރަކާތްތަކެއް ހިންގާފައެވެ. މީގެ ތެރޭގައި ރަމަޟާންމަހަށް ހާއްސަކޮށްގެން ކުރިއަށްގެންދިޔަ ކަރާފެޅުން ޕްރޮމޯޝަނާއި، ރޯދައިގެ ނޫރު ފާހަގަކޮށްލެވެއެވެ.

އުރީދޫ މޯލްޑިވްސްގެ އަހަރީ އާންމު ޖަލްސާގައި، މިއަހަރުގެ މާޗްމަހު ބޭއްވިއިރު، މިދިޔަ އަހަރު ލިބުނު ފައިދާއިން ހިއްސާއަކަށް 3.43 ރުފިޔާ ފައިދާގެ ގޮތުގައި ބެހުމަށް ވަނީ ފާސްކޮށްފައެވެ. އުރީދޫއިން ގެންދަނީ ރާއްޖޭގެ އާބާދީގެ 80 އިންސައްތައަށް 5ޖީ ނެޓްވަރކްގެ ހިދުމަތް ފޯރުކޮށްދެމުންނެވެ. މީގެ އިތުރުން އުރީދޫއިން ވަނީ ވަރަށް ފަހުން އެޕަލް ގަޑިއަށް އުރީދޫ އީ ސިމްގެ ހިދުމަތްވެސް ދޭން ފަށާފައެވެ.