ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއާ އެއްވެސް މައްސަލައެއް ނެތް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސުލްޖުމްހޫރިއްޔާގެ އޮފީހުގައި މިއަދު އޮތް ނޫސްވެރީންގެ ބައްދަލްވުމުގައި ރައީސް މުއިއްޒާއި އަބްދުއްރަހީމާއި އޮތް ގުޅުމާއި ގުޅޭގޮތުން ސުވާލު ކުރުމުން އެމަނިކުފާނު ވިދާޅުވީ ދެ ބޭފުޅުންގެ މެދުގައި އެއްވެސް މައްސަލައެއް ނެތް ކަމަށެވެ.
"އަބްދުއްރަހީމާއި އަޅުގަނޑަކާ އެއްވެސް މައްސަލައެއް ނެތް. އަބްދުއްރަހީމަކީ އަޅުގަނޑާއި އޭރުވެސް މިހާރުވެސް ރަހްމަތްތެރި ދެ މީހުން," ރައީސް ވިދާޅުވި އެވެ.
ރައީސާއި އަބްދުއްރަހީމްގެ ގުޅުން ގޯސްވެފައިވާ ކަމަށް އަޑުފެތުރިފައިވާތާ ދުވަސްތަކެއް ވެއްޖެ އެވެ. އެ ވާހަކަތައް ދެކެވެމުން ދަނިކޮށް ޓޫރިޒަމް މިނިސްޓަރު ކަމުން އިބްރާހިމް ފައިސަލް ވަކިކުރެއްވި އެވެ. ފައިސަލް އަކީ އަބްދުއްރަހީމްގެ ދޮށީ ދަރިކަލުންނެވެ. އޭގެ ފަހުން އަބްދުއްރަހީމްގެ ގާތް ބައެއް ބޭފުޅުން ވަނީ މަގާމުތަކުން ވަކި ކުރައްވާފަ އެވެ.
އަދި ރައީސް މުއިއްޒު, ރައީސް ކަން ކުރައްވާ ޕީއެންސީގެ ހިންގުމުން އަބްދުއްރަހީމް ދުރުކުރި ކަމަށް އަޑުފެތުރުނެވެ. އަބްދުއްރަހީމަކީ ޕީއެންސީގެ ކުރީގެ ރައީސެވެ. މިހާރުގެ ޗެއާޕާސަން އެވެ.
މި ސަރުކާރުގެ ކުރީކޮޅު އަބްދުއްރަހީމް ހުންނެވީ ރައީސްގެ ސްޕެޝަލް އެޑްވައިޒަރަކަށެވެ. ރައީސްގެ ދިފާއުގައި ކުރީން އަބްދުއްރަހީމް ދައްކަވަމުން ގެންދެވި މިންވަރާއި ގާތަށް ވެސް މިހާރު ވާހަކައެއް ނުދައްކަވަ އެވެ.
Advertisement
This content is created and paid for by advertisers and does not involve Voice Journalists
